VOV4.K’ho- Ngai 29/08, Ƀộ Giáo zụk mờ Đào tạo geh sră pơyua Kwang ătbồ Sở Giáo zụk mờ Đào tạo càr mờ ƀòn dờng in bè broă lam lơh bàr pe broă lơh bồ nam bơsram pa 2022- 2023. Dùl tàm ală broă lơh mờ Ƀộ Giáo zụk mờ Đào tạo sồr ală hìu bơsram lơh hơ̆ là lơh jăt di jơnau sồr bè ătbồ tă, dơ̆ ngui mờ yal loh làng ală bơnah priă tă, dơ̆ ngui bồ nam bơsram pa.

Ƀộ kung sồr ală Sở Giáo zụk mờ Đào tạo bơyai lơh mblàng yal mờ lam lơh jăt kơnòl broă tờm nam bơsram 2022- 2023, mờ tơngume nam bơsram là “Tam klăc, bơceh lơh, ai jơh pràn lơh ngan lơh gơs niam ală kơnòl broă mờ jơnau kờñ tam gơl pa, lơh geh wơl mờ tơnguh uă cồng nha bơto mờ bơtê”. Rơcăng lài kờp sền, ai, rơndăp tăp sèng hìu bơsram, ơdŭ bơsram, cau pơgru, cau lơh broă dipal mờ bơta geh ngan bơh tiah he dê mờ cau lơh broă sa priă nhai geh jàu jăt jơnau ai.

Ală Sở Giáo zụk mờ Đào tạo pal sồr ală hìu bơsram lam lơh broă lơh gàr niam lơngăp lơngai, ờdo ờdă hìu bơsram, tàm hơ̆ sền ngac ală broă lơh rơcăng lài rơcăng, kơryan mờ dră wơl gơtùi mờ trồ tiah lơh aniai, kòp Kovid-19 mờ ală kòp bơtờp ndai.

Cau mblàng Lơ Mu K’Yến