VOV4.K’ho- Mho ngai 22/02, tàm Hà Nội, Kụk Kảñ sát ătbồ sră pơ àr bè rơndăp tăp sèng mpồl bơtiàn, Ƀộ Kwang àng bơyai lơh pơrjum ƀăo pà tài khoản sơnđan măt điện tử ai làng bol in bơh broă lơh sră kăn kươk làng bol. Digơlan tus lồi nhai 02 do, Ƀộ Kwang àng geh lơh sơnđan măt điện tử ai làng bol in nàng lơh ală sră nggal bơh tàm internet. Tài khoản sơnđan măt điện tử là bơtòm tơrgùm jơh geh mat pờ, jơnau ndơ̆p ndơr halà broă dờp gĭt ngan ngồn ndai geh lơh gơs tài bơh ală sơnđan mat mờ dờp gĭt điện tử bơh Ƀộ Kwang àng dê.

Tài khoản do geh ătbồ mờ dờp geh tàm phan ngui sơnđan măt điện tử dà lơgar bơh Ƀộ Kwang àng dê lơh gơlik. Tŭ làng bol tus anih lơh broă Kwang àng quận, kơnhoàl, càr, ƀòn dờng lơh sră pơ àr lơh, tam gơl, lơh pa wơl kăn kươk làng bol crăp cip den gơtùi lơh dan pà tài khoản sơnđan măt điện tử. Jơh tơl nă làng bol ndrờm gơtùi dan cih tài khoản sơnđan măt điện tử dilah geh jơnau kờñ ngui. Kwơmàng, broă gàr ndơ̆p jơnau yal tơngĭt làng bol dê, ờ gơtùi lơh blăc pơrlồm, dipal mờ mìng dùl lơm tài bơh jơnau yal tơngĭt geh dờp gĭt ngan ngồn bơh sră nggal dà lơgar bè làng bol ơm kis là sră nggal tờm geh Cíñ phủ jàu Ƀộ Kwang àng in ătbồ.

Cau mblàng Lơ Mu K’Yến