VOV4.K’ho- Drim ngai 07/10, Ƀộ Nội vụ bơyai lơh Pơrjum broă lơh atbồ dà lơgar bè mpồl, kes priă mpồl bơtiàn, kes priă lơh broă niam. Tus tŭ do, gùt lơgar geh rlau 93 rbô mpồl, mờr 30 rbô kes priă. Uă mpồl, kes priă neh tă pơgồp uă ngan tàm ală broă lơh mpồl bơtiàn, dong kờl kòn bơnus. Kuơmàng, tàm broă lơh rơcang sơndră kòp Kovid-19, neh hòi jà tă pơgồp geh priă jền, phan ngui sa pal geh uă ngan, dong làng bol tiah kòp bơtờp kung bè tă pơgồp tàm kes priă sơnơm vaccine kơryan kòp Kovid-19 bơh Cíñ phủ dê.

Pơrjum broă lơh atbồ dà lơgar bè mpồl, kes priă mpồl bơtiàn, kes priă lơh broă niam

Tàm nam 2021, kờp jơh priă ai bơh ală kes priă dê là rlau 3 rbô 468 tơmàn đông, mờ neh tă dong kờl rlau 2 rbô 425 tơmàn đông. Bulah bè hơ̆, broă lơh bơh uă mpồl, kes priă dê gam cèng bơta ờ ngan ngồn, mìng đơs lơm gời; 2, 3 mpồl gam ai tơnggŏ bơta sơmờm bơta kuơ, geh mpồl gam ờ ring bal tàm mpồl, lơh gơlik bơta tam pìt, lah yă jŏ jòng; uă kes priă ờ hềt gàr bơta loh làng song dơpă bè priă jền tàm tŭ hòi jà dờp dong kờl.

VOV Tây Nguyên- Cau mblàng K’Duẩn