VOV4.K’ho- Pơn jat tai pơrjum dơ̆ 16, ngai 12/10, Ủy ƀan Thường vụ Quôk hội ai jơnau đơs bè broă lam lơh jat Nghị quyết sồ 54 bơh Quôk hội khoă 14 dê bè lam lơh tơrlòng lài kơrnuat boh lam, broă lơh krơi is bơtàu tơnguh ƀòn dờng Hồ Chí Minh mờ ai tơlik jơnau sồr lơh sir ală kơrnuat boh lam, broă lơh lam lơh tơrlòng lài ai ƀòn dờng Hồ Chí Minh in; jơnau yal sền wơl 3 nam lơh jat Nghị quyết sồ 115 bơh Quôk hội khoă 14 dê bè kơrnuat boh lam, broă lơh priă jền, kes priă krơi is gơ wèt mờ ƀòn dờng Hà Nội. Sền sơwì, ring bal jơnau sồr bơh Thủ tướng Cíñ phủ dê bè broă tơn jơh kơnòl Đại sứ bơh lơgar Việt Nam dê. Ai jơnau đơs bè broă rơcang tus pơrjum dơ̆ 4 bơh Quôk hội dê mờ bè broă lơh bơsong kòl yan, bơta ờ niam tàm 2, 3 anih ai priă halà rơndap broă lơh BOT.

Lài hơ̆, tàm dơ̆ pơrjum ngai 11/10, Ủy ƀan Thường vụ Quôk hội ring bal yal Quôk hội in broă rơndap lơh tam gơl priă nhai, priă nhai jơh sơnam rê rlô lơh broă, dong kờl ƀảo hiểm xã hội mờ dong kờl cau geh màng mờ dà lơgar tàm nam 2023. Ƀộ trưởng Ƀộ Tài cíñ ồng Hồ Đức Phớc pà git, kờp dŭ tam gơl priă nhai, priă nhai jơh sơnam rê rlô lơh broă, dong kờl ƀảo hiểm xã hội mờ dong kờl cau geh màng mờ dà lơgar sơn đờm bơh ngai 01/7/2023.

VOV Tây Nguyên- Cau mblàng K’Duẩn