VOV4.K’ho- Tơnơ̆ tŭ tơn jơh pơrjum nisơna dơ̆ dùl, Củ tịc Quôk hội ồng Vương Đình Huệ neh sồr, Cíñ phủ, Thủ tướng Cíñ phủ mờ ală anih lơh broă geh gơ rềng mhar lam lơh jat gờñ, di tŭ ală nghị quyết pa geh ring bal, bơsong bơta “bồ nam rơlĕ rơlùn, lồi nam gơ jă gơ jal”.

Mờ nùs nhơm geh kơnòl uă tềng đap dà lơgar, làng bol mờ cau tĕ khà, pơrjum nisơna dơ̆ dùl, Quôk hội khóa 15 neh pờ tê ring bal 1 Adat mờ 4 Nghị quyết mờ bơta ring bal uă ngan. Nghị quyết bè broă lơh nam priă jền, broă lơh priă jền nàng dong kờl lam lơh broă lơh bơtàu tơnguh wơl mờ bơtàu tơnguh lơh sa- mpồl bơtiàn là dùl tàm ală tơngume tờm bơh pơrjum do dê. Củ tịc Quôk hội ồng Vương Đình Huệ đơs là, nàng lam lơh di tŭ, geh cồng nha ală broă lơh nam priă jền, broă lơh priă jền, Quôk hội sồr Cíñ phủ, ală kấp, ală gah broă lơh, lơh jat gùng dà, jơnau ai tơlik lài bơh Đảng, ală Nghị quyết bơh Quôk hội dê, kơ̆ dơn gàr kơ̆ kơljap sùm broă lơh sa dờng, tơnguh cồng nha lơh geh, bơta pràn tàm pơrlòng, bơta lơh tờm is, bơta pràn kong jai, gơ dờp bơh rài lơh sa dê, lơh jat di tŭ jơnau kờñ tềng đap mat mờ jŏ jòng, tơrbŏ bal nền nòn mờ ală broă rơndap lơh 5 nam, tơngai bơh nam 2021 tus nam 2025 neh geh Quôk hội ring bal mờ broă lơh tơrgùm jơh ală bơta bè rơcang sơndră kòp Kovid-19. Củ tịc Quôk hội ồng Vương Đình Huệ đơs: “Nghị quyết bơh Quôk hội dê kung jàu Cíñ phủ, ală Ƀộ, gah broă lơh dà lơgar mờ kấp hơ đơm in jat kơnòl broă lơh jat Nghị quyết do; tơnguh kơnòl broă cau atbồ tàm broă đơng lam, pơlam lơh jat, lam lơh di gùng dà, jơnau kờñ, loh làng, song dơpă, geh cồng nha mờ gơtùi lam lơh ngan ngồn; sền gròi tus broă lùp sền, sền sơ wì, bơ tơl bơh sơn rờp ờ lời gơlik geh tìs, sơmờm broă dong kờl, sa kuề sa kuà, hoàc huơr, bơta ờ niam mờ lơh glài kràñ ală broă lơh tìs, ngan là tàm tŭ tơngai rơndap ai priă jền dờng ngan tàm tŭ tơngai lơyah”.

Gùt anih pơrjum

Nghị quyết pơrjum nisơna dơ̆ dùl, Quôk hội khóa 15 neh tam gơl gơs thể cế jơnau pơn dut bơh Ƀộ Cíñ trị dê bè broă lơh rơcang sơndră kòp Kovid-19 tơngai bơh nam 2022 tus nam 2023 mờ broă lơh bơtàu tơnguh wơl mờ bơtàu tơnguh lơh sa- mpồl bơtiàn. Mờ Nghị quyết do, Củ tịc Quôk hội ồng Vương Đình Huệ pà git, Quôk hội sồr Cíñ phủ, Thủ tướng Cíñ phủ đơng lam ală Ƀộ, gah broă lơh, ală tiah lam lơh mhar, jơh nùs mờ tơnguh khà cit sơnơm vaccine mờ cit ding bơ tơl ai cau dờng in, kơlôi sơnơng nền nòn mờ geh broă rơndap lơh tŭ tơngai dipal, jak chài nàng cit sơnơm vaccine ai cau hơ đơm 18 sơnam in, ngan là kơnòm dềt. Củ tịc Quôk hội ồng Vương Đình Huệ sồr: “Sền gròi tus broă pơlam, lùp sền, sền sơ wì, sơlơ tơnguh kơrnuat pal jat, tơnguh nùs nhơm lơh broă dà lơgar, tam gơl gơs kơnòl cau dùl nă să dê, ngan là kơnòl bơh cau atbồ dê gơ rềng tus broă lam lơh kơ cế, broă lơh dong kờl tàm broă bơtàu tơnguh wơl, bơtàu tơnguh lơh sa- mpồl bơtiàn mờ rơcang sơndră kòp bơtờp, di tŭ git gŏ, lơh glài kràñ ală broă lơh tìs sa kuề sa kuà, hoàc huơr, bơta ờ niam; tơrgùm cau lơh broă, sơbac mhar, jơh nùs, rề ơnàng lùp khàu lơh loh broă jàu kơnòl, kơlôi sơnơng, sền sơ wì, tàm jàu, ai gơnoar ngui, cribơyai khà priă, yal tơnggit jơnau, mblàng yal, pà khà jờng, lam lơh sa, bơta niam phan bơna mờ broă tac kít xét nghiệm kòp Kovid-19 bơh Kông ty Việt Á dê; kơnòl bơh mpồl bal, cau dùl nă să geh gơ rềng dê nàng lơh loh bơta geh ngan bơh broă lơh tìs dê”.

Nàng ală Nghị quyết bơh pơrjum nisơna dơ̆ dùl, Quôk hội khóa 15 ngan ngồn geh ngui tàm rài kis, Củ tịc Quôk hội ồng Vương Đình Huệ sồr, Cíñ phủ, Thủ tướng Cíñ phủ, Ủy ƀan Thường vụ Quôk hội, Hội đồng Zân tộk, ală Ủy ƀan bơh Quôk hội dê, ală kấp, ală gah broă lơh, ală anih lơh broă tàm mpồl duh broă dà lơgar, ală Mpồl kwang bàng Quôk hội, ală kwang bàng Quôk hội mhar lam lơh jat gờñ, di tŭ ală adat, Nghị quyết pa geh ring bal, gờñ lơh geh cồng nha mờ ngui ngan ngồn tàm rài kis, bơsong bơta bồ nam rơlĕ rơlùn, lồi nam gơ jă gơ jal.

Củ tịc Quôk hội ồng Vương Đình Huệ

Củ tịc Quôk hội ồng Vương Đình Huệ đơs là, mờ broă bơyai lơh geh cồng nha pơrjum nisơna dơ̆ 1, bol he geh jơnau bơsram mờng chài kuơmàng ngan nàng ală dơ̆ pơrjum nisơna gơ gơs broă lơh bè ờs bơh Quôk hội dê kờñ lơh jat di tŭ jơnau sồr jal mhar bơh bơta geh ngan dê. Nùs nhơm mờ cồng nha bơh pơrjum nisơna dơ̆ 1, Quôk hội khóa 15 dê neh lơh gơlik ală nùs nhơm pa, tŭ niam pa bal mờ ală broă lơh pa geh ai tơlik, bơta đơng pơlam jơh nùs bơh Cíñ phủ dê, bơta lơh bal bơh ală kấp, ală gah broă lơh mờ jơh gùt anih lơh broă cíñ trị dê, bơta ring bal, dùl nùs bal bơh làng bol, ală mpồl lơh sa kă bro dê, bol he pin dờn geh lam lơh geh cồng nha kơnòl broă bơtàu tơnguh lơh sa- mpồl bơtiàn nam 2022 mờ jơh gùt tơngai bơh nam 2021 tus nam 2025, dà lơgar geh pơn jat tai bơtàu tơnguh kơ̆ kơljap, rài kis làng bol geh tơnguh niam, bơta pin dờn bơh làng bol dê geh ngai sơlơ geh gàr kơ̆ kơljap.

Cau mblàng K’Duẩn