VOV4.K’ho - Broă tă tơm priă drơng broă sền gàr brê bal mờ ală broă lơh geh cồng nha bơh Kes priă sền gàr mờ tơnguh bơtàu brê càr Kon Tum gam pơn jăt tai pơgồp bal lơh tam gơl jơnau git wă bơh làng bol, mpồl cau tờm brê tàm broă atbồ, sền gàr mờ tơnguh bơtàu brê tàm càr do.

Lam bol añ tus còp 15 lồ brê lơh sa bơh 25 hìu làng bol kis tàm ƀòn Đăk Rô Gia, xã Đăk Trăm, bi A Ngực, Ƀí thư Ci ƀộ, kwang atbồ ƀòn pà git, mìng is hìu bi geh 7 sào ù, tài tam bùm blàng uă nam den tàng ù gơtìp klàr cồng nha tơnhào ờ uă, pah nam tơnhào bùm mìng tăc geh di pơgăp 13 tơlăk đong. Mờ nùs nhơm lam lài, nam lài bi neh tam gơl tam tờm ƀạc đàn mờ hòi jà làng bol kis tàm ƀòn tam bal. Bi A Ngực đơs, làng bol kis tàm ƀòn Đăk Rô Gia geh nùs nhơm pin dờn bè bơta kwơ bơh broă tam brê dê, tài làng bol neh gŏ geh cồng nha bơh broă tus bal atbồ sền gàr brê nàng dờp priă tơm bơh broă sền gàr tiah kis brê bơh bă brê geh Kông ty TNHH MTVlâm nghiệp Đăk Tô jào: “Ƀòn geh atbồ brê hòn is tàm bă brê dềt 289, kờp jơh bă brê là 288 lồ. Kông ty lâm nghiệp tơm là pah quý dùl dơ̆ geh 45 tơlăk đong. Geh quý gơguh tài gàr geh tiah brê niam. Gah, mpồl lơh broă tàm ƀòn pơrjum mờ Kông ty ală cau tus bal tơn tàm ƀòn pah ngai lòt sền gàr, atbồ brê, hơ̆ sồng gàr ƀòn, cih măt mùl màl tàm broă tơm priă ală cau in”.

         Bi A Ngực (cau dơ̆ bàr bơh đah ma) cri bơyai bè kỹ thuật sơndră mờ kòp tờm bạch đàn hìu nhă tam

Xã Đăk Trăm, kơnhoàl Đăk Tô, càr Kon Tum geh khà kờp làng bol rơlao 5 rơbô nă, tàm hơ̆ làng bol kòn cau Sơdàng geh tus rơlao 95%. Nam do, xã Đăk Trăm geh kơnhoàl Đăk Tô jào tam pa bơh 120 tus 140 lồ brê. Bè jŏ jòng bă brê tam geh ală hìu nhă tàm xã Đăk Trăm geh tai priă. Geh bơta kwơ neh gŏ mơ tềng đăp măt là pleh mờ broă gơtìp hoàc huơr gơì ù tiah. Mờ bă ù tam phan gam tai, làng bol geh tus bal uă rơlao tàm broă lơh ngan tơnguh cồng nha, bơta niam nàng lơh geh cồng nha lơh sa tàm dùl bă ù. Ồng Trương Đình Tuệ, Củ tịc UɃÑZ xã Đăk Trăm pà git, cồng nha mùl màl bơh broă lơh jăt broă tơm priă sền gàr tiah kis brê neh pơgồp bal tàm broă lơh tam gơl nùs nhơm git wă bơh làng bol mờ ală mpồl bơtiàn tàm xã dê tàm broă sền gàr, tơnguh bơtàu brê: “Mpồl bơtiàn ală ƀòn: Đăk Đrinh, Đăk Rô Gia, Tê Pheo, Tê Peng, Đăk Trăm neh lơh jăt broă dờp atbồ sền gàr brê bơh Kông ty lâm nghiệp Đăk Tô. Tàm broă tus bal atbồ, sền gàr den kung neh di tŭ gŏ, kơrian ală broă lơh tìs gơgràm ù brê, mus kơl brê, mờ tus bal tàm broă rơcang sơndră mờ ồs sa brê. Bơh priă sền gàr tiah kis brê neh pơgồp bal tàm broă tơnguh uă rài kis ai làng bol in, tơnguh uă broă geh priă. Kwơ màng tàm ală dơ̆ rơcang tàm nam bơsram pa, tàm dơ̆ ngai kwơ màng dà lơgar, ngai satềp den Kông ty geh pơgồp bal tơm priă nàng làng bol in geh priă blơi ào mpha, sră măi, sră cih ai ală oh kòn in lòt bơsram”.

                      Kwang bàng sền gàr brê tus bal lam sồr làng bol tàm broă tơnguh bơtàu brê

Bơh tàm khà càr Kon Tum jào tam 570 lồ brê tàm nam do, tus lồi nhai 8, UɃÑZ kơnhoàl Đăk Tô neh bơto sồr, dong kờl ală xã tam 450 lồ brê, bă ù gam tai 120 lồ geh jào Kông ty TNHH MTV lâm nghiệp Đăk Tô in. Ồng Nguyễn Công Tường, Phó kwang atbồ mpồl sền gàr brê kơnhoàl Đăk Tô pà git, tus tŭ do gùt kơnhoàl neh tam geh 539 lồ, geh rơlao 94% pơn drờm mờ rơndăp broă lơh geh jào. Mùl màl broă tam brê tàm do pà gŏ geh ƀuơn là tờm ngan: “Tàm hơ̆ uă ngan là broă tus bal bơh ală mpồl lơh broă cíñ trị, ală kấp, gơnoar atbồ tàm do neh tus bal lam sồr làng bol tam brê jăt mờ rơndăp broă lơh. Uă hìu neh git gơnoar kwơ bơh broă dong kờl tam brê bơh Dà lơgar dê, den tàng neh dan cih măt tus bal tam brê nàng sền gàr tiah kis sinh thái, tơnguh uă priă geh nàng tơnguh bơtàu lơh sa”.

Jăt jơnau bơh Kes priă Sền gàr mờ tơnguh bơtàu brê càr Kon Tum yal, kờp tus ngai 14 nhai 6 nam 2022, mpồl lơh broă do neh lơh gơs broă bơcri priă drơng ala tiah kis brê nam 2021 ai ală cau tờm brê in mờ kờp jơh khà priă geh mờr 307 tơmàn 600 tơlăk đong. Bal mờ hơ̆ bơcri priă drơng ala tiah kis brê nam 2022 là rơlao 99 tơmàn đong. Priă geh bơh broă lơh jăt broă tơm priă sền gàr tiah kis brê gam pơgồp bal tàm broă lơh tam gơl jơnau git wă bơh làng bol kung bè ală mpồl cau tờm brê tàm càr Kon Tum tàm broă atbồ, sền gàr mờ tơnguh bơtàu brê.

Cau cih Khoa Điềm-Cau mblàng Ndong Brawl