VOV4.K’ho- Poh lài, di ngai lơh broă sơn rờp bơh nam pa Ñâm Zần dê, Củ tịc Quôk hội ồng Vương Đình Huệ mờ ală kwang đơng lam bồ Quôk hội neh tìp mat, jàu kơnòl broă ai ală kwang bàng Quôk hội lơh broă sùm, kwang bàng, kông cứk, viên cứk mờ cau lơh broă bơh Cơldŭ lơh broă Quôk hội dê in. Đơs tàm dơ̆ tìp mat, Củ tịc Quôk hội ồng Vương Đình Huệ đơs nền, bơta kơp kơnờm dờng pràn, kơp kơnờm bơtàu tơnguh, nùs nhơm pràn kơldăng bơh jơi bơtiàn dê, kơp gơn tàm ală bơta tam gơl pa tàm broă rơndap lơh, tàm hơ̆ geh bơta tam gơl bè thể cế.

Tàm dơ̆ tìp mat, Củ tịc Quôk hội ồng Vương Đình Huệ neh yal bè dơ̆ lòt còp nting bơr sa tềp bơhiàn bơh Củ tịc Quôk hội bal mờ mpồl kwang bàng dê tàm 6 càr tiah đah jum dà lơgar mờ ală broă lơh bơh ală Phỏ Củ tịc Quôk hội dê. Đơs là, nam lài, mờ bềng ngan broă lơh, uă bơta kơlôi rơcang, mơya bơh jơnau yal mhar bơh ală Ủy viên Ủy ƀan Thường vụ Quôk hội dê, làng bol, cau tĕ khà neh cih dờp, đơs niam broă lơh bơh Quôk hội dê. Ală kwang bàng Quôk hội, kwang bàng, kông ñân, viên cứk cơldŭ lơh broă Quôk hội geh gơnoar pơn iờ să bè cồng nha do, mơya ờ gŏ di sền ờ sơp, hừh nùs mờ ală bơta lơi neh gơtùi lơh geh.

Củ tịc Quôk hội pà git, nam 2022 pơn jat tai là nam kuơmàng ngan, nam sơn rờp lam lơh jat Nghị quyết bơh Đảng dà lơgar dê, ală Nghị quyết bơh Quôk hội dê. Kwang đơng lam bồ Đảng, dà lơgar, cau tĕ khà, làng bol sền gròi ngan mờ pơn jat tai kơp kơnờm tàm broă lơh bơh Quôk hội dê, den tàng pal rơcang lài nùs nhơm, lơh ală bơta nisơna gơ gơs bơta bè ờs nàng drơng jơnau kờñ bơh rài kis dê: “Bác Hồ neh đơs, Quôk hội he là rùp pơn rơ ai nùs nhơm tam klac dờng gùt jơi bơtiàn mờ nùs nhơm pràn kơldăng bơh jơi bơtiàn Việt Nam dê. Kơp kơnờm dờng pràn, kơp kơnờm bơtàu tơnguh, nùs nhơm pràm kơldăng bơh jơi bơtiàn dê, pal kơp gơn tàm ală bơta tam gơl broă rơndap lơh, tàm hơ̆ geh tam gơl bè thể cế. Den tàng, gơnoar broă, kơnòl broă bơh Quôk hội dê gam dờng ngan. Lơh bè lơi nàng geh dùl adat boh lam ring bal, tơl làm, loh làng, song dơpă, ƀuơn ngui. Bè tơngume pal gơtùi lơh jat jơnau kờñ bơt bơtàu dà lơgar bơtàu tơnguh mhar, kơ̆ kơljap rlau tai mờ mut gơ rờm bal dunia jrô ơnàng rlau tai. Hơ̆ là bơta bol he gam kơlôi rơcang. Tơl nă kwang bàng Quôk hội, kwang bàng, kông cứk, viên cứk, tàm tơl gơnoar broă krơi is pal kơlôi sơnơng broă do. Bol he bơt bơtàu adat boh lam, bơt bơtàu thể cế là nàng bơt bơtàu ai bơtàu tơnguh in”.

Củ tịc Quôk hội ồng Vương Đình Huệ đơs tàm dơ̆ tìp mat

Củ tịc Quôk hội ồng Vương Đình Huệ sồr, bè broă lơh gròi sền, tơnơ̆ sa tềp bơhiàn tơn, ală kwang atbồ mpồl kwang bàng gròi sền pal lơh broă jơh pràn nàng lam lơh 4 tơngume gròi sền bơh Quôk hội dê neh ai tơlik; mờ kung kờp sền 107 rơndap broă tàm Broă lam lơh bơh Đảng đoàn Quôk hội dê lam lơh jat Nghị quyết pơrjum dờng dơ̆ 13 bơh Đảng dê mờ 137 kơnòl broă crơng gơs adat boh lam jat jơnau pơn dut sồ 19 bơh Ƀộ Cíñ trị dê mờ rơndap broă ai tơlik lài gùng dà bơt bơtàu adat boh lam tơngai lơh broă Quôk hội khóa 15. Đơs nền dùl dơ̆ tai, cồng nha gròi sền bơh Quôk hội dê nàng kờñ gàr dà lơgar gơnoar adat boh lam xã hội củ nghĩa bơh làng bol dê, tài làng bol, jat Củ tịc Quôk hội ồng Vương Đình Huệ đơs, làng bol pal geh dờp kuơ bơh ală cồng nha bơh bơtàu tơnguh lơh sa- mpồl bơtiàn, bơh tam gơl pa dê. Bơdìh hơ̆ tai, tơl kơrnuat bơh Quôk hội dê bè ală broă kuơmàng bơh dà lơgar dê pal ơn bơta kuơ dà lơgar, bơta kuơ jơi bơtiàn lài ngan rlau jơh.

Gơ wèt mờ broă lơh lơh nền ală broă kuơmàng bơh dà lơgar dê, Củ tịc Quôk hội ồng Vương Đình Huệ tơngkah, tơl kơrnuat lơh nền bơh Quôk hội dê, broă kuơmàng dà lơgar pal ơn bơta kuơ dà lơgar, bơta kuơ jơi bơtiàn lài ngan rlau jơh. Bơh bơta kuơ dà lơgar, jơi bơtiàn dê nàng bol he in git, sền sơ wì, lơh nền, tàm bơta kuơ bơh dà lơgar, jơi bơtiàn dê geh bơta kuơ bơh làng bol mờ mpồl lơh sa kă bro dê.

Củ tịc Quôk hội ồng Vương Đình Huệ pin dờn, mờ bơhiàn pơn iờ să 76 nam do bơh Quôk hội Việt Nam dê, ală cồng nha mờ Quôk hội khóa 15 neh lơh geh tàm nam sơn rờp bơh tơngai lơh broă dê, ală kwang bàng Quôk hội, kwang bàng, kông ñân viên cứk cơldŭ lơh broă Quôk hội geh pơn uat tai tam klac bal dùl nùs, tơnguh bồ tơngoh jak mpồl bal, nàng lơh gơs jak ngan kơnòl broă geh Đảng, dà lơgar, làng bol jàu, pơgồp bơnah bơt bơtàu dà lơgar Việt Nam ngai sơlơ pràn kơldăng, pas sơm, làng bol ngai sơlơ hờm răm, gơboh gơbài, dipal mờ bơta pin dờn, bơta kơp kơnờm bơh Đảng, dà lơgar, cau tĕ khà mờ làng bol dê.

Cau mblàng K’Duẩn