VOV4.K’ho- Tàm pơrjum dơ̆ 8, Ủy ƀan Thường vụ Quôk hội neh tơrgùm cribơyai mờ ring bal broă pal ai tơlik Nghị quyết bè gơnoar broă, kơnòl broă, gơnap gơnoar mờ rơndap sap sèng broă rơndap lơh bơh Mpồl lơh broă kwang bàng dê nàng kờñ lơh jat jơnau sồr tam gơl pa broă lam lơh, cồng nha lơh broă bơh Quôk hội, ală anih lơh broă bơh Quôk hội dê.

Ring bal mờ broă bơtơl gơnoar broă bơh Mpồl lơh broă kwang bàng dê bè broă lơh Hội đồng Ñân Zân, broă lơh tĕ khà gơ wèt gơnap gơnoar bơh Ủy ƀan Thường vụ Quôk hội dê nàng kờñ lam lơh ngan ngồn rlau gơnoar broă bơh Mpồl lơh broă kwang bàng dê, ờ uă jơnau đơs kung sồr đal git loh kơnòl broă, gơnap gơnoar bơh Mpồl lơh broă kwang bàng dê mờ gơnap gơnoar bơh ală anih lơh broă, mpồl lơh broă geh gơ rềng dê nàng pleh gơtìp rơndap rơndồl, ndrờm bal.

Cribơyai bè broă Mpồl lơh broă kwang bàng pơgồp bal mờ Ủy ƀan sền gàr dat boh lam ai tơlik jơnau đơs, dong Ủy ƀan Thường vụ Quôk hội tàm broă ai jơnau đơs gơ wèt tus mờ broă kup, krơ̆ jàm, lah yă kwang bàng Quôk hội, mut sền anih ơm, anih lơh broă bơh kwang bàng Quôk hội dê gơ wèt mờ broă kwang bàng Quôk hội geh broă lơh tìs, jat kwang atbồ Ủy ƀan mpồl bơtiàn bơh Quôk hội mò Nguyễn Thúy Anh đơs, do là gơnap gơnoar bơh Ủy ƀan sền gàr adat boh lam dê: “Broă mut sền, kup jàm kwang bàng, Ủy ƀan sền gàr adat boh lam pal sền sơ wì wơl broă rơndap lơh, sră nggal di halà ờ. Broă kup jàm di mờ jơnau cih bơh adat boh lam dê halà ờ. Hơ̆ là broă bơh Ủy ƀan sền gàr adat boh lam dê ờ di là Mpồl lơh broă kwang bàng dê”.

Ủy ƀan Thường vụ Quôk hội đơs là, broă bơtơl kơnòl broă, gơnap gơnoar pa yal tàm jơnau rơcang cih Nghị quyết là dipal mờ bơta geh ngan mờ jơnau sồr gơ wèt tus mờ broă lơh kwang bàng. Mờ kung ring bal sồr Mpồl lơh broă kwang bàng đơng lam tàm tơngume tơngai lơh broă do nàng dipal mờ jơnau sồr bè broă lơh kwang bàng mờ khà jal mhar bơh kơnòl broă do dê jat jơnau cih bơh adat boh lam dê bè tố tụng. Ală kwang bàng tàm Ủy ƀan Thường vụ Quôk hội kung sồr, bơtơl ờ uă tơngume ai tơlik jơnau đơs, lam lơh jat gơ rềng tus broă lơh atbồ kwang bàng gơ wèt tus mờ kwang bàng Quôk hội lơh broă sùm; broă cih, pơlam mờ lam lơh jat broă lơh pà khà jờng, lam lơh broă dong kờl mờ ală bơta gàr niam ndai gơ wèt tus mờ kwang bàng Quôk hội gơ in dipal.

Pơrjum dơ̆ 8 ai jơnau đơs bè broă sền sơ wì jơnau rơcang cih Nghị quyết ai tơlik Kơrnuat lơh broă bơh Ủy ƀan Thường vụ Quôk hội dê

Củ tịc Quôk hội ồng Vương Đình Huệ sồr, pal cih loh kơnòl broă, gơnap gơnoar mờ lơh loh gơnoar broă bơh Mpồl lơh broă kwang bàng dê tàm tơl kơnòl broă, kuơmàng là broă lơh kwang bàng bơh tŭ tĕ khà Quôk hội tus tŭ kwang bàng jơh sơnam rê rlô lơh broă: “Broă lơh tĕ khà tàm do cih loh mpồl lơh broă kwang bàng dong broă ai Mpồl duh broă tĕ khà dà lơgar mờ Thường vụ Quôk hội in ală bơta lơi. Kờp sền wơl bơta lơi den Mpồl đơng lam, bơta lơi den pơgồp bal. Gơ wèt mờ broă dong kờl bơh kwang bàng Quôk hội mờ kwang bàng gơ wèt gơnap gơnoar atbồ bơh Ủy ƀan Thường vụ Quôk hội dê. Broă lơh kwang bàng añ kờñ ngan là kờp bal tàm tŭ pa crơng gơs, pơrjum sơn rờp mờ broă lơh tơnơ̆ do kung gam pal jàu dùl mpồl in ai Mpồl lơh broă kwang bàng. Ală Ủy ƀan bơh Quôk hội, Hội đồng Zân tộk, ală Ủy ƀan lam lơh jat ală broă rơndap lơh kwang bàng sền sơ wì, lơh nền ală broă do”.

Kung tàm pơrjum dơ̆ 8, Ủy ƀan Thường vụ Quôk hội, ală kwang bàng neh ai jơnau đơs tàm jơnau rơcang cih Nghị quyết tam gơl Kơrnuat lơh broă bơh Ủy ƀan Thường vụ Quôk hội dê. Ală kwang bàng ring bal mờ 3 mpồl nùs nhơm đơng lam broă tam gơl Kơrnuat pal jat nàng kờñ lơh jat jơnau kờñ tam gơl pa broă lam lơh, tơnguh bơta niam, cồng nha lơh broă bơh Quôk hội, ală anih lơh broă bơh Quôk hội dê. Ală kwang bàng sồr broă tam gơl kơrnuat lơh broă bơh Ủy ƀan Thường vụ Quôk hội dê dipal mờ tŭ tơngai tam gơl pa bal bơh ală anih lơh broă cíñ trị dê, chồl pràn tam gơl sồ, bơt bơtàu Quôk hội điện tử, gơ dờp ngac ngar, geh cồng nha tàm bơta krơi is, tềng đap ală broă gơlik geh kal ke ờ hềt geh bơh lài tus tŭ do bè kòp Kovid-19... Bơdìh hơ̆ tai, pal đal git loh nùs nhơm là kơrnuat ờ cih gơnap gơnoar pa bơh Ủy ƀan Thường vụ Quôk hội dê mờ mìng cih rơndap sap sèng, sră nggal ngan ngồn nàng lam lơh ală gơnap gơnoar neh geh cih tàm ală adat boh lam, kơrnuat boh lam, Nghị quyết bơh Quôk hội, Ủy ƀan Thuờng vụ Quôk hội dê.

Cau mblàng K’Duẩn