VOV4.K’ho- Poh lài, tàm Hìu lơh broă Quôk hội, Củ tịc Quôk hội ồng Vương Đình Huệ tìp mat ală cau geh jơng tàm Mpồl lơh sa, Niam chài mờ Nhơl chờ; ala mat kwang đơng lam bồ ală càr tàm tiah tam lơh Việt Bắc. Đơs tàm dơ̆ tìp mat, Củ tịc Quôk hội đơs nền, bơta kuơ niam chài kah yau kac màng bơh Việt Nam dê là bơta kuơ nhơl chờ dờng màng nga, li la mờ ờ huan geh ngan. Bè hơ̆ den tàng tàm rơndap tăp sèng wơl gah nhơl chờ pal pơgồp bal mờ broă prap gàr, ngui niam bơta kuơ niam chài, kah yau kac màng.

Củ tịc Quôk hội ồng Vương Đình Huệ đơs nền, kòp dờng Kovid-19 lơh gơbàn hoàc huơr kơn jơ̆ kơn jut ngan, mơya kung là tŭ niam dờng ngan nàng Việt Nam in rơndap tăp sèng wơl bơh sơn rờp, tơl làm gah nhơl chờ Việt Nam jat nùs nhơm Nghị quyết sồ 8 bơh Ƀộ Cíñ trị dê bè bơtàu tơnguh nhơl chờ gơ gơs gah lơh sa tờm ngan mờ jat Adat nhơl chờ neh geh Quôk hội ring bal; tơnguh rơndap tăp sèng wơl jơh bal bè tiah ơm kis, phan bơna, mpồl lơh sa kă bro mờ ală phan bơna nhơl chờ; tam gơl jơnau git wă nàng ai nhơl chờ gơ gơs là gah lơh sa bơrlŭ bal, cèng bơta lơh bal gah broă lơh mờ ù tiah.

Ai pơn yơu bơh ală jơnau yal bơtàu tơnguh nhơl chờ bơh ală lơgar tàm dunia dê bè gơ hòi gơ jà nac nhơl chờ lòt sền, tơnguh jơnau kờñ blơi ală phan bơna krơi is bơh tơl tiah, tơl lơgar dê, Củ tịc Quôk hội đơs nền, bơtàu tơnguh gah nhơl chờ kuơmàng là bồ tơngoh kơlôi sơnơng, broă wèt sền mờ lơh gơlik bơta niam chài krơi is. Bè hơ̆ den tàng, ală cau geh jơng bơh Mpồl Lơh sa, Niam chài mờ Nhơl chờ dê pal tă pơgồp jơnau đơs nàng bal mờ bơta pơgồp bal bơh dà lơgar, kâp hơ đơm mờ ală kwang atbồ dê tơnguh pràn rlau tai gah nhơl chờ tàm tơngai tus.

Củ tịc Quôk hội đơs niam Hội đồng Jơi bơtìan kòn cau bơh Quôk hội, Viện Lơh sa, Niam chài gơ wèt Mpồl tơrbŏ bal ală Mpồl Khoa họk mờ Kỹ thuật Việt Nam neh pơgồp bal bơyai lơh Pơrjum mờ rơ wah tơngume “Lơh bal bơtàu tơnguh nhơl chờ pơgồp bal mờ prap gàr, ngui niam ală bơta kươ niam chài kah yau kac màng tiah lam lơh Việt Bắc” mờ 6 càr, geh: Cao Bằng, Bắc Kạn, Lạng Sơn, Thái Nguyên, Hà Giang, Tuyên Quang: “Añ kung ring bal mờ tơngume ngai do bơh pơrjum dê. Nhơl chờ mờ kuơmàng là bơtàu tơnguh nhơl chờ gơ jat bal mờ prap gàr, ngui niam ală bơta kuơ niam chài kah yau mờ kac màng. Bơta kuơ niam chài kah yau kac màng bơh Việt nam dê là dùl bơta phan kuơ dờng màng uă ngan, li la ngan mờ gơtùi đơs là ờ huan geh ngan bơh Việt Nam dê gơ wèt mờ dunia. Bè hơ̆ den tàng, tàm rơndap tăp sèng gah nhơl chờ pal gơ jat bal mờ broă prap gàr, ngui niam ală bơta kươ niam chài, kah yau kac màng. Do là bơta phan kuơ niam chài li la ngan bol he dê”.

Củ tịc Quôk hội pà git, tơnơ̆ pơrjum niam chài gùt lơgar, bơh jơnau đơs pơn dut bơh Tổng Ƀí thư ồng Nguyễn Phú Trọng dê, Đảng mờ dà lơgar nèh jàu Ƀộ Văn hóa, Thể thao mờ Zu lịc bơt bơtàu dùl broă lơh jơnau kờñ bè bơtàu tơnguh niam chài, tàm hơ̆ geh tơngume prap gàr, ngui niam bơta kươ ală tiah tềl kah yau.

Củ tịc Quôk hội ồng Vương Đình Huệ sồr, broă bơtàu tơnguh nhơl chờ bơh 6 càr dê kung pal pơgồp bal nền nòn mờ broă lam lơh jat 3 broă lơh jơnau kờñ dà lơgar bè bơt bơtàu ƀòn lơgar pa; bơtàu tơnguh lơh sa mpồl bơtìan tiah jơi bơtìan kòn cau dùl êt nă cau mờ tiah kơh bơnơm; tơn jơh jơgloh tơrmù rƀah kơ̆ kơljap jŏ jòng sùm.

Tàm tơngai tus, gah nhơl chờ pal pơgồp bơnah tơnguh mhar tơngai lam lơh broă lơh Bơtàu tơnguh wơl mờ bơtàu tơnguh rài lơh sa- mpồl bơtìan, lơh jat ală nghị quyết, bơnah priă dong kờl bơh Quôk hội, Cíñ phủ dê, tàm hơ̆ geh broă dong kờl cau lơh broă nàng ờ mìng gàr ơm wơl, mờ gam lơh gơlik bơta ƀươn ai cau lơh broă in iang nùs lơh sa.

Củ tịc Quôk hội ồng Vương Đình Huệ đơs sùm, Quôk hội, ală anih lơh broă Quôk hội dê kơp kờñ ngan Mpồl tơrbŏ bal ală Mpồl Khoa họk mờ Kỹ thuật Việt Nam mờ Viện Lơh sa niam chài, ală cau geh jơng bơh mpồl dê sùm tă pơgồp jơnau đơs, nàng lơh sir kơrnuat boh lam, broă lơh, ală broă lơh nền bơh Quôk hội dê; kung bè broă lơh jat sền gơ rềng tus gah do. Quôk hội jờng rơ mờ tŭ lơi kung rơcang iat jơnau đơs tă pơgồp bulah mờ broă lơh mpồl cau halà cau dùl nă să, halà mờ sră nggal nàng lơh bè lơi, Quôk hội ngai sơlơ lơh broă di mờ bơta geh ngan rlau.

Cau mblàng K’Duẩn