Do geh sền là broă lơh geh cồng nha nàng tơnguh uă bơta gĭt wă, wă wờng, chài gĭt bè lòt rê tàm gùng ai kơnòm bơsram in, dong ală kơnòm bơsram lòt rê tàm gùng dùl bă lơngap lơngai, geh bơta niam chài.

Ală jơnau lơh lèo, lơh lèo lơyah bè jơnau pơnyơu gơlik geh tàm gùng lòt geh ngan, ală jơnau yal gơdăn ñŏ halà ală jơnau lùp geh ală jơnau gĭt wă bơh sơn rờp, geh ngan bè lơngap lơngai lòt rê tàm gùng geh mblàng yal wơl ai gơ in ƀuơn wă, ƀuơn kah, lơh nùs nhơm ală dơ̆ bơsram đah bơdìh mblàng yal tơngume bè adat boh lam lơngap lơngai lòt rê tàm gùng sơlơ hô hơng mờ gơ dan ngan.

Ngan là, tàm Hìu bơsram kấp bàr Độc Lập, sơnah ƀòn Trung Thành, Thàñ đoàn Thái Nguyên pơgồp bal mờ Kwang àng ƀòn dờng Thái Nguyên, Kông ty Kổ phần tăc mờ blơi phan bơh lơgar ndai Thái Nguyên dê bơyai lơh dơ̆ mblàng yal lơngap lơngai lòt rê tàm gùng mờ bơto bơtê  măy rơndeh lơngap lơngai ai mờr 1 rơbô 200 nă kơnòm bơsram Hìu bơsram dê. Halà bè dơ̆ mblàng yal bè lơngap lơngai lòt rê tàm gùng ai rlau 1 rơbô 300 nă kwang bàng, cau pơgru mờ kơnòm bơsram Hìu bơsram kấp pe Điềm Thụy, kơnhoàl Phú Bình, bơh Phòng Kảñ sát gùng lòt, Kwang àng càr pơgồp bal mờ Mpồl sền gàr lơngap lơngai lòt rê tàm gùng càr mờ Tỉñ đoàn Thái Nguyên dê bơyai lơh.

Tàm tŭ hơ̆, mờr 800 nă kwang bàng, cau pơgru mờ kơnòm bơsram Hìu bơsram kấp pe Trần Quốc Tuấn (kơnhoàl Đồng Hỷ) kung neh tus bal tìp mat lơh kuèng jòi gĭt bal adat boh lam bè lơngap lơngai lòt rê tàm gùng mờ bơta dong kờl bơh Kwang àng kơnhoàl Đồng Hỷ dê. Hìu bơsram kấp pe Lưu Nhân Chú (kơnhoàl Đại Từ), Hìu bơsram pơgồp bal mờ Kwang àng kơnhoàl Đại Từ bơyai lơh dơ̆ kĭ hơ jơnau pal jat pơgồp bal mờ gàr niam broă lơh lơngap lơngai lòt rê tàm gùng, sền gàr lơngap lơngai, lơngap lơngai hìu bơsram. Tus bal dơ̆ kĭ hơ jơnau pal jat pơgồp bal gam geh ala mat bơh kwang đơng lam bồ 8 xã là ù tiah geh kơnòm bơsram gam bơsram tàm Hìu bơsram dê.

Mờ bơta ngăc ngar, chài ngan tàm broă tàm bơrlŭ bal đah ală tơngume mblàng yal mờ rùp hin lơh pơn yơu, sră phàt, ngan là broă lơh lơh ràng tơlik ală jơnau lơh lèo, dơ̆ tìp mat lơh kuèng neh dờp geh bơta sền gròi, tus bal duh hồl ngan bơh kơnòm bơsram jơh gùt hìu bơsram dê. Ală kơnòm bơsram kờñ ngan tŭ geh tìp mat lơh kuèng bal, hơ jơnau lùp geh gơrềng tus gah lòt rê tàm gùng rơndeh mờ geh bơto pơlam bơta chài lòt rê tàm gùng lơngap lơngai, ndau sơgơn gàr bồ di...

Jơnau yal bơh oh Đỗ Ngọc Ánh dê, bơsram ơdŭ 11A1, Hìu bơsram kấp pe Trần Quốc Tuấn, bè do:Tàm ơdŭ bơsram den bol oh kung geh jòi gĭt sơl bè lơngap lơngai lòt rê tàm gùng, mơya bè hơ̆ ală jơnau gĭt wă là dùl ết ngan. Dơ̆ tìp mat lơh kuèng bè jòi gĭt bal adat boh lam lơngap lơngai lòt rê tàm gùng do bol oh gơ lơh kờñ ngan, broă mblàng yal ràng tơlik ală jơnau yal bơh jơnau lơh lèo mơya geh kwơ ngan, bơh hơ̆ bol oh tơrgùm wơl uă bơta mờng chài tŭ lòt rê tàm gùng.

Mờ oh Đỗ Như Ngọc, ơdŭ bơsram dà Mỹ 12A1, Hìu bơsram kấp pe Chuyên Thái Nguyên pà gĭt : Jơnau đơs, kung bè tơngume cribơyai rềp mềl ƀuơn wă rlau, lơh să tờm gĭt wă bè adat lòt rê tàm gùng, tơnơ̆ hơ̆ tơngŏ bơta sền dờng màng mờ broă lơh lơh jat di, sền dờng màng he, hìu bơnhă mờ mpồl bơtiàn.

Tàm ală broă lơh, kơnòm bơsram mờ kwang àng, cau pơgru Hìu bơsram geh iăt kơno jơnau yal mhar bè bơta sền gàr lơngap lơngai, rơndap tap sèng lòt rê tàm gùng tàm ù tiah càr, ƀòn dờng dê; yal tơngĭt ală tơngume kwơ màng bơh Adat Gùng rơndeh dê; ală dơ̆ lơh tìs gùng lòt là jơnau tờm gơlam tus rềs àr lòt rê tàm gùng; bơta chài lòt rê tàm gùng, ală broă lơh tơm bơh bơr geh bơta niam chài tŭ lòt rê tàm gùng, bè: lơh jat is niam jơnau sồr lòt rê tàm gùng rơndeh; ală kƀàng yal tơngĭt mờ tềl tơngŏ đèng gùng lòt dê; broă bơsong ală bơta gơlik geh tŭ gơtìp rềs àr gùng lòt; bơta gĭt wă adat boh lam bè lơngap lơngai gùng rơndeh mờ bơto pơlam bơta chài măy rơndeh lơngap lơngai... Ală Hìu bơsram kung kĭ hơ mờ Phòng Kảñ sát gùng lòt lơh jat ală jơnau sồr bè gùng lòt jơng. Thiếu tá ồng Nguyễn Nam Hưng, Phòng Kảñ sát gùng lòt, Kwang àng càr Thái Nguyên, pà gĭt :

 Mblàng yal mờ broă lơh pờ tơlik tơn tàm internet, mblàng yal bơh tàm internet, bơdìh hơ̆ mblàng yal tơn bol añ kung tam gơl tơngume broă lơh mblàng yal, lơh bè lơi nàng ai kơnòm bơsram in ƀuơn wă mờ gơ dan iăt rlau.

Di dơ̆ do, Phòng Kảñ sát gùng lòt neh bơyai lơh dơ̆ ràng tơlik rùp hin “Rềs àr lòt gùng lòt, lơh glài cau lơh tìs”; phàt 1 rơbô nơm pơ àr mblàng yal lơngap lơngai lòt rê tàm gùng mờ pà 20 nơm sơgơn gàr bồ Honda tơl khà ai ală kơnòm bơsram in. Broă lơh kung pà ai ală kơnòm bơsram là “kơnòm ala mat niam chài lòt rê tàm gùng” mờ ală kơnòm bơsram geh rài kis kal ke in.

Do là broă lơh geh Thàñ đoàn Thái Nguyên pơgồp bal mờ ală mpồl lơh broă lam lơh sùm, mờ uă broă lơh lila mờ geh ngan. Bơh hơ̆, nàng kờñ rcang ai kơnòm bơsram in ală  jơnau gĭt wă măy rơndeh lơngap lơngai, pơgồp bơnah dong ală kơnòm in tơnguh uă bơta gĭt wă, gĭt wă lơh jat Adat lòt rê tàm gùng rơndeh. Tơngai tus, Thàñ đoàn Thái Nguyên pơn jat tai lam lơh tàm bàr pe Hìu bơsram tàm ù tiah ƀòn dờng dê.