VOV4.K’ho- Pơn jat tai pơrjum dơ̆ 8, drim ngai 17/02, Ủy ƀan Thường vụ Quôk hội ai jơnau đơs bè jơnau sồr bơ tơl rơndap lơh Adat Kham kòp, sơm kòp (tam gơl) tàm broă lơh bơt bơtàu Adat boh lam, kơrnuat boh lam nam 2022. Tàm pơrjum dơ̆ 5 geh lơh tàm nhai 11 nam lài, Ủy ƀan Thường vụ Quôk hội neh ai jơnau đơs bè broă jơnau sồr bơh Cíñ phủ dê bơ tơl rơndap lơh Adat kham sơm kòp (tam gơl) tàm broă lơh bơt bơtàu adat boh lam, kơrnuat boh lam nam 2022.

Bulah bè hơ̆, tài ờ hềt gàr jat jơnau sồr, Ủy ƀan Thường vụ Quôk hội sồr pơn jat tai kờp sền, sền sơ wì bơta gơ rềng, jơnau gơtùi lam lơh ngan ngồn, kuơmàng gròi sền tus jơnau cih tam gơl, tơnguh bơta niam broă lơh gròi sền, sền gàr pràn kơldăng să jan làng bol; ai lơh lài gơ wèt tus mờ broă lơh kham, sơm kòp, rơcang cau lơh sơnơm kấp hơđơm gơ wèt tus mờ tiah làng bol jơi bơtiàn kòn cau dùl êt nă cau mờ tiah kơh bơnơm, tiah nhàr dà lơgar, bồt dà lềng, tiah geh broă lơh sa mpồl bơtiàn uă kal ke.

Cau mblàng K’Duẩn