VOV4.K’ho- Mang ngai 27/07, neh geh bơyai lơh sơñio rùp tơn “Jơnau đơs crih jờng rơ bơta ring lơngai”, tơngkah kir sơnrai 75 nam Ngai Cau ling sồt să- Cau ling chơ̆t màng.

Củ tịc Quôk hội tus bal anih sơñio rùp tơn “Jơnau đơs crih jờng rơ bơta ring lơngai”

Tus bal broă lơh geh ală Ủy viên Ƀộ Cíñ trị: Củ tịc lơgar ồng Nguyễn Xuân Phúc, Thủ tướng Cíñ phủ ồng Phạm Minh Chính, Củ tịc Quôk hội ồng Vương Đình Huệ, Thường trực Ƀan Ƀí thư ồng Võ Văn Thưởng. Mờ 6 anih tàm tơrbŏ bal geh lơh tàm Anih kah kơlôi Bắc Sơn- càr lơgar Hà Nội, Anih duh khoai kah rơngal Cau ling chơ̆t màng Bến Dược- ƀòn dờng Hồ Chí Minh, Rùp Mè Việt Nam khin cha jak chài- càr Quảng Nam, ƀlàng tơ̆p ƀồc cau ling chơ̆t màng Vị Xuyên- càr Hà Giang, Anih duh khoai cau ling chơ̆t màng thị xã Hoài Nhơn- càr Bình Định mờ Ƀlàng tơ̆p ƀồc cau ling chơ̆t màng càr An Giang, broă lơh “Jơnau đơs crih jờng rơ bơta ring lơngai” cèng tus ală rùp hin niam ngan, uă bơta ngoh rơngăc mờ jơnau yal  ngoh rơngăc ngan bè ală cau ling sồt să, cau ling chơ̆t màng, Mè Việt Nam khin cha jack chài mờ cau pròc tờm bơh cau ling chơ̆t phi să ai rài lơngap lơngai dà lơgar in. Bơdìh mờ ală jơnau yal bềng bơta nđàc sơngĭt bơh ală rơnàng cau neh chơ̆t phi să tài bơh bơta ring lơngai, broă lơh gam geh ală jơnau lơh geh bơcri lơh niam ngan tàm ală anih tàm tơrbŏ bal, lơh geh ală bơta kah uă ngan.

Cau mblàng K’Hạnh