VOV4.K’ho- Broă lơh “Kòn ròng pôs đồng ling sền gàr tiah nhàr lơgar”  geh Đảng ủy, Gah đơng lam Mpồl ling sền gàr tiah nhàr lơgar lam lơh tàm ală nam pa do, neh dờp dong kờl mờr 3 rơbô nă sau kơnòm bơsram, mờ khà dong kờl tơl nă sau 500 rơbô đông dùl nhai tus di tŭ bơsram jơh ơdŭ 12. Bơta hơ̆ tơngŏ nùs nhơm kuơ màng ngan đah Mpồl ling sền gàr tiah nhàr lơgar gơwèt mờ oh kòn geh rài kis kal ke tàm tiah nhàr lơgar.

Sau Y Phú Mlô (kòn cau M'nông), ơm tàm ƀòn Đrang Phốk, xã tiah nhàr lơgar Krông Na, kơnhoàl Buôn Đôn, càr Dăk Lăk kòn đời mè bơh tàm tŭ dềt, bèp sang dô lòt tiah ndai. Ồng mò gah mè neh rò sau rê ròng. Tài bơh ồng mò sơnam neh dờng ờ gam pràn tai, broă ròng siam sau gơtìp uă ngan kal ke. Tềng đap rài kis kal ke bơh Y Phú dê, Kwang đơng lam bồ Pôs đồng ling sền gàr tiah nhàr lơgar Srepok, gơwèt Gah đơng lam Mpồl ling sền gàr tiah nhàr lơgar Dăk Lăk lơh nền dan ròng sau rê lơh kòn ròng pôs đồng dê. Trung tá Đỗ Văn Nhương- Đội phó Đội hòi jà làng bol pôs đồng ling sền gàr tiah nhàr lơgar Srepok yal wơl:

Tŭ pa tus tàm do den sau kung ờ pràn sơl, tơnơ̆ tŭ tơngai ròng siam tus tŭ do, sau neh dờng pràn niam ngan, să jan dờng jơnhoa, pràn kơldang wơl tơn, nùs nhơm ờ gam rơngòt halà basìl bè lài tai. Oh mi bol añ  lơh ngan rơndap tŭ tơngai nàng ròng siam mờ bơto bơtê sau in gĭt wă. Sền sau bè kòn tàm hìu, kơ̆p kờñ sau tơnơ̆ do geh dờng pràn mờ là cau geh kwơ mpồl bơtiàn in.

Mpồl ling sền gàr tiah nhàr lơgar Dăk Lăk gam lơh pràn broă lơh “Kòn ròng pôs đồng tiah nhàr lơgar”

Y Phú Mlô đơs: bơh ngai geh rê ơm tàm mpồl ling sền gàr tiah nhàr lơgar, să tờm geh sa hờm, bơto bơtê jơnau gĭt wă mờ ală bơta niam, bơta gĭt jak. Pah ngai, tơnơ̆ tŭ tus tàm ơdŭ bơsram, oh geh tus bal tàm ală broă lơh nhơl chờ lơh rài bồ tơngoh, tàp pràn să jan bal mờ mpồl ling. Tŭ ờ wă jơnau bơsram lơi mờ cau pơru dê jàu, den rê tàm pôs đồng oh geh “ală cau bèp cèng griăt tơlir” bơto bơtê dong kờl tai. Lòt bơsram oh geh ală wa ngui rơndeh măy pơn diang tus tơn tàm mpồng hìu bơsram mờ rò rê tàm mpồl. Ơm mờ mpồl ling sền gàr tiah nhàr lơgar, oh geh rài kis hờm ram wil tơl, bềng lìu bơta kờñ gơboh.

Mè kòn neh chơ̆t bloh, ồng mò gah mè den rƀah ngan, ờ geh uă piang ai kòn in sào. Tŭ guh ơm mờ ală wa tàm pôs đồng ling sền gàr tiah nhàr lơgar do, ală wa ai sa hờm, geh nhơl ñŏ, chờ hờp, geh ală wa hơ̆ bơto ai kòn in gĭt cih jơh akhar. Nam tơnơ̆ kòn mut bơsram ơdŭ 1, kòn hơ là geh bơsram sră jak ngan nàng ờ lơh muăt jrùm nùs nhơm ồng mò mờ ală wa tàm pôs đồng ling sền gàr tiah nhàr lơgar.

Pa do, Đoàn Ơruh pơnu Kộng sản Hồ Chí Minh dà lơgar pơgồp bal mờ Gah đơng lam Mpồl ling sền gàr tiah nhàr lơgar bơyai lơh tìp mat ală kơnòm bơsram pơn rơ jak tàm broă lơh “Kòn ròng pôs đồng ling sền gàr tiah nhàr lơgar”. Chờ hờp ngan geh tus bal tàm broă lơh do, oh Seo Thị Hoa, kòn ròng Pôs đồng ling sền gàr tiah nhàr lơgar càr Nghệ An đơs: Hìu bơnhă geh 4 nă oh mi ơm mờ mò gah mè sơnam neh dờng. Nam 2014, Hoa neh kơlôi là ơm bơsram nàng dong kờl mò ròng oh, mơya geh ală kwang bàng Mpồl ling sền gàr tiah nhàr lơgar dờp ròng siam mờ dong kờl oh pơn jat tai bơsram sră mờ bơsram niam rlau tai.

Ală wa sùm tus tàm hìu sau bơto pơlam sau bơsram sră, mờ lùp còp, pơndờm pơnđiang sau lơh ngan bơsram niam ngan nàng tơnơ̆ do tam gơl să jan. Sau neh lơh ngan bơsram sră, tơngai pa do, 4 nam sau là kơnòm bơsram jak tơl làm, mờ 3 nam sau geh là kơnòm bơsram jak kơnhoàl môn văn mờ môn dà Mỹ.

Broă lơh tìp mat, jờng rơ “Kòn ròng pôs đồng ling sền gàr tiah nhàr lơgar”

Đại tá Đỗ Quang Thấm- Phó cíñ ủy Mpồl ling sền gàr tiah nhàr lơgar càr Dăk Lăk pà gĭt, ală nam pa do, broă lơh “Kòn ròng mpồl ling sền gàr tiah nhàr lơgar” neh dong kờl ală sau jơh bal bè phan bơna mờ nùs nhơm, pơgồp bơnah lơh geh tơl bơta ai ală sau in pơn jat tai ntoat jat bơta kơ̆p kờñ tus hìu bơsram. Tơngai tus, Gah đơng lam Mpồl ling sền gàr tiah nhàr lơgar càr Dăk Lăk geh pơn jat tai lòt sền, lơh uă broă lơh “Kòn ròng Pôs đồng ling sền gàr tiah nhàr lơgar” tàm ù tiah gùt càr.

Ală nam pơn jat den lơh geh bơh gơnoar geh gơkòl bơh Mpồl ling sền gàr tiah nhàr lơgar dê, bơta kal ke bơh làng bol tàm tiah nhàr lơgar dê kung bè nùs nhơm niam bơh broă lơh do dê, den bol añ pơn jat tai lơh pràn lơh jat niam rlau tai broă lơh do. Mpồl ling sền gàr tiah nhàr lơgar càr Dăk Lăk geh pơn jat tai pơgồp bal mờ ală kấp ngàñ ală tiah, bơyai kờp sền, cih mat ală sau geh rài kis kal ke uă nàng dờp rê ròng siam, dong kờl ală sau gơtùi dờp khà priă dong kờl nàng geh bơsram sră, bơto bơtê gơ gơs ală làng bol niam ai mpồl bơtiàn in.

Broă lơh “Kòn ròng Pôs đồng ling sền gàr tiah  nhàr lơgar” bơh Gah đơng lam Mpồl ling sền gàr tiah nhàr lơgar lam lơh nàng kờñ dong kờl ală sau dềt kờñ bơsram geh rài  kis kal ke uă, kòn đời mè bèp, ờ geh tiah kơldìng, oh kòn hìu bơnhă cíñ sác tàm tiah nhàr lơgar, bơh hơ̆ lơh geh tơl bơta ai ală oh in geh tiah ơm, tiah sào sa, bơsram sră, bơtàu tơnguh tơl làm, tơnơ̆ do gơ gơs ală làng bol niam ai hìu bơnhă mờ mpồl bơtiàn in. Bơh broă lơh do, pơgồp bơnah sơlơ tơnguh bơta tam klăc dờng đah ling klàng mờ làng bol tàm ù tiah nhàr lơgar, bơt bơtàu rài sền gàr bơta lơngap lơngai gùt làng bol kơ̆ kơljap, pràn kơldang.

Cau mblàng K’Hạnh