VOV4.K’ho- Poh lài, Củ tịc Quôk hội ồng Vương Đình Huệ neh đơng lam dơ̆ lơh broă mờ Ƀộ Tài nguyên mờ Môi trường bè broă tam gơl, bơtơl Adat Ù tiah. Củ tịc Quôk hội jàu Ủy ƀan Kiñ tế bơh Quôk hội dê cribơyai lơh jat ală kơnòl broă gơwèt mờ broă lơh rơndap broă lơh Adat Ù tiah tam gơl, tàm hơ̆ broă ai jơnau đơs tă pơgồp  bơh làng bol dê jat jơnau cih bơh Adat boh lam dê.

Jơnau yal tàm dơ̆ lơh broă, Ƀộ trưởng Ƀộ Tài nguyên mờ Môi trường ồng Trần Hồng Hà pà gĭt, rơndap cih gam ai jơnau đơs tă pơgồp bal bơh ală cau kong gơrềng geh lơh jat tàm bơnàng jă jat tàm Nghị quyết sồ 18, ală Nghị quyết, jơnau đơs pơn dŭt ndai nàng lơh kơrnoat tơl làm, di tŭ ală jơnau sồr, gùng dà broă lơh bơh Đảng dê bè atbồ mờ ngui ù tiah; lơh geh bơta đòm jat bal, bơta kơ̆ kơljap bơh ală adat boh lam dê; tam gơl, bơtơl ală jơnau sồr nàng kờñ ngui geh cồng nha bơta pràn ù tiah mờ bơsong ală bơta gam gơ kòl, bơta ờ hềt pràn tàm broă lơh, adat boh lam neh geh sơñio loh tàm ală tŭ tơn jơh Nghị quyết sồ 19 mờ lơh jat Adat ù tiah dê.

Anih tàm dơ̆ pơrjum

Tàm tŭ lơh rơdap broă lơh Adat, Ƀộ kung neh rcang lài kờp sền wơl rlau 100 adat, adat geh gơrềng tus gah ù tiah nàng sồr tam gơl tơn tàm Adat do halà sồr tam gơl ală Adat geh gơrềng nàng kờñ gàr niam bơta ring bal, dùl ròt bal bơh ală adat boh lam dê jat di jơnau cih bơh Nghị quyết sồ 18 dê.

Lài mờ tŭ ai jơnau đơs bơh ală cau kong gơrềng pa do, Ƀộ Tài nguyên mờ Môi trường neh iăt, kơno jơnau đơs tă pơgồp bal bơh 63 càr, ƀòn dờng, ală Ƀộ, ngàñ, lơh broă mờ ală Ƀộ Tài cíñ, Xây dựng, Nông nghịêp mờ Phát triển Nông thôn, Giao thông Vận tải, Nội vụ.

Tơnơ̆ tŭ iăt ală jơnau cribơyai bal, Củ tịc Quôk hội ồng Vương Đình Huệ đơs loh, rơndap broă lơh Adat Ù tiah (tam gơl) là rơndap broă lơh adat dờng ngan, kwơ màng ngan, broă ơnàng, gơrềng uă ngan tus uă cau tờm, ală cau, anih lơh broă, mpồl lơh broă. Mờ bơngă, gơnoar broă hơ̆, tơngai pa do, broă rcang ai broă sền sơwì ai jơnau đơs tă pơgồp gơwèt mờ rơndap broă lơh Adat do neh geh lơh mhar mờ geh kơnòl.

Củ tịc Quôk hội ồng Vương Đình Huệ sồr, Rơndap broă lơh Adat Ù tiah dờng màng ngan kơrhia ngan den tàng pal lơh di jơnau sồr bơh adat dê, lơh jat tơngai rcang lơh rơndap broă lơh adat dê, Cíñ phủ jun sră nggal rơndap broă lơh Adat tus mờ ală anih lơh broă bơh Quôk hội dê lài mờ ngai 01/09 tus nàng kơlôi sơnơng ai jơnau đơs tàm pơrjum Ủy ƀan Thường vụ Quôk hội.

Củ tịc Quôk hội đơs tàm dơ̆ lơh broă

Bè sră nggal rơndap broă lơh adat, Củ tịc Quôk hội sồr, Ƀộ Tài nguyên mờ Môi trường pal tơrgùm rlau tai tàm broă lơh jơnau yal sền sơ wì bơta gơrềng bè lơh sa, mpồl bơtiàn, tiah ơm kis, sền gàr bơta lơngap lơngai, sền gàr dà lơgar, tiah lơh sa kă bro, kờp sền ală adat boh lam geh gơrềng mờ jơnau rcang cih ală Nghị địñ bơto pơlam Adat Ù tiah. Ală jơnau yal do geh gơtha kwơ màng ngan, là cơng tàng ngan ngồn ai broă lơh lơh adat boh lam in. Den tàng bè hơ̆, mờ nùs nhơm kờñ ngan iăt, kơno, jơh nùs, gàr niam broă rcang lài uă ngan, nền nòn ală tơngume do sồr pal geh bơta pơgồp bal niam ngan, ngan là đah ală anih lơh broă Quôk hội mờ Cíñ phủ mờ đah Dà lơgar mờ ală tiah. Bơdìh hơ̆ tai, Củ tịc Quôk hội tơngkah jat tàm Nghị quyết sồ 18 bơh dà lơgar dê, nam 2023 ờ mìng lơh sir Adat Ù tiah tam gơl lơm mờ gam lơh sir bơta tam gơl pa adat boh lam geh gơrềng.

Bè bơyai lơh pơrjum cribơyai, ai jơnau đơs tă pơgồp bè rơndap broă lơh Adat Ù tiah tam gơl, Củ tịc Quôk hội tơngkah, tàm tŭ tơngai ờ geh uă, sồr pal geh broă rơndap lơh di pal, ngui geh cồng nha tŭ tơngai tŭ cribơyai ai jơnau đơs bè ală tơngume bơh rơndap broă lơh Adat dê. Bơdìh mờ  Ủy ƀan Kiñ tế là anih lơh broă tờm sền sơ wì, den Mpồl duh broă jơi bơtiàn kòn cau mờ ală Ủy ƀan ndai bơh Quôk hội dê halà Kiểm toán Dà lơgar, Hội đồng Ñân zân ală kấp, ală mpồl Kwang bàng Quôk hội kung pal tơnguh uă gơnoar tus bal lơh Adat. Den tàng, Củ tịc Quôk hội đơs là, gam uă ngan bơta kal ke, bơta lòng tàm broă lơh sir rơndap broă lơh Adat dê, den tàng ală anih lơh broă bañ gờñ sền ờ rcang ngăc, pal tơnguh uă kơnòl tềng đap Đảng mờ làng bol tàm broă lơh sir Adat.

Củ tịc Quôk hội jàu Ủy ƀan Kiñ tế bơh Quôk hội dê in tă pơgồp jơnau đơs ai Broă rơndap lơh bơh Quôk hội dê lơh jat ală kơnòl broă gơwèt mờ broă lơh rơndap broă lơh Adat Ù tiah tam gơl, tàm hơ̆ geh broă ai jơnau đơs tă pơgồp bơh làng bol dê jat jơnau cih bơh adat boh lam dê; tàm pà kơnòl ai Ủy ƀan Thường vụ Quôk hội, Mpồl duh broă jơi bơtiàn kòn cau, ală anih lơh broă Quôk hội, ală Ƀan gơwèt Ủy ƀan Thường vụ Quôk hội, Hội đồng Ñân zân kấp càr, ƀòn dờng, ală mpồl kwang bàng Quôk hội in mờ geh broă rơndap lơh cribơyai yal tơngĭt jơnau gờñ, bè: sră nggal rơndap broă lơh Adat, ală cồng nha kơlôi sơnơng, jơnau yal tơn jơh broă lơh jat Adat gam ngui tŭ do, jơnau yal sền sơ wì, kờp sền ală adat boh lam geh gơrềng tus ù tiah. Gơwèt mờ broă ai jơnau đơs bơh làng bol dê, Củ tịc Quôk hội sồr pal ai tơlik ală broă lơh geh ngan, geh đơs loh làng, gơ jat bal mờ kơnòl bơh ală anih lơh broă, mpồl lơh broă iăt, kơno jơnau đơs tă pơgồp bơh làng bol dê.

Cau mblàng K’Hạnh