Càr Khánh Hoà tŭ do geh 34 jơi bơtiàn ờ gal cau mờ rơlao 266 rơbô nă, geh mờr 12% khà kờp làng bol. Tus lồi nam 2025, càr gam di pơgăp 5 rơbô 100 hìu rơƀah, tàm hơ̆ geh rơlao 3 rơbô hìu là làng bol jơi bơtiàn ờ gal cau.

Tàm dơ̆ lơh broă, càr Khánh Hoà dan mờ Bộ Jơi bơtiàn mờ Pin dờn Jăt yàng gờñ lơh gơs gùng dà broă lơh bè ù tiah, ai càn priă mờ dong kờl bơcri priă, bơtơl priă bơtàu tơnguh phan bơna; gờñ tơlik jơnau pal jăt bè khà dong kờl ù lơh hìu ơm, hìu ơm nàng càr geh tơngu me lơh jăt broă lơh geh cồng nha. Ồng Nguyễn Đình Khang dờp ală cồng nha càr Khánh Hoà neh lơh geh tàm broă tơrmù rơƀah, bơcri priă lơh phan bơna mờ tơnguh uă rài kis làng bol jơi bơtiàn ờ gal cau. Ồng sồr càr pơn jăt tai bơsong ală khà broă gam ờ pràn, sền wơl, lơh di pal jơnau yal tơngit tơnơ̆ mờ tơmŭt bal càr; lơh jăt măi mok pa sră nggal broă lơh; lơh sir broă rơndăp lơh Broă lơh jơnau kờñ Dà lơgar tơngai bơh nam 2026 tus 2030, mờ tơnguh broă sền gròi, jăt sền nàng ală priă bơcri geh ngui di jơnau kờñ, tơnguh cồng nha.