VOV4.K’ho - Drim òr (27/05), tàm ƀòn dờng Kon Tum, càr Kon Tum neh bơyai lơh drà ràng tơlik broă lơh ai cau koĕt kơl te in. Mờ tơngu me “Bol añ kờñ bơyô”, Drà ràng tơlik hòi jà broă tus bal bơh 10 mpồl lơh sa kă bro, lơh sa, kă bro mờ pơlam broă lơh.

                                         Cri bơyai bè broă ai broă lơh cau koĕt kơl te in

Tàm drà ràng tơlik, geh mờr 60 nă cau koĕt kơl te dan cih măt kờñ jòi geh broă lơh mờ bơsram broă lơh. Tàm hơ̆, geh ờ uă cau koĕt kơl te neh jòi geh broă lơh sa mờ măi mŏk dềt, broă lơh drơng ala... Gùt càr Kon Tum tŭ do geh rơlao 7 rơbô 300 nă cau koĕt kơl te, tàm hơ̆ geh 1 rơbô 200 nă cau koĕt kơl te jroă ngan. Geh uă cau koĕt kơl te tàm càr Kon Tum ndrờm kis kơnờm mờ cau pròc mhàm, hìu nhă mờ mpồl bơtiàn. Drà ràng tơlik broă lơh “Bol añ kờñ bơyô” wèt tus cau koĕt kơl te rơhời tam gơl bồ tơngoh, rơcang lài, pin dờn jòi geh broă lơh mờ bơsram broă lơh ai să tờm in.

Cau mblàng Ndong Brawl