VOV4.K’ho- Bulah pal kong mờ kal ke, ngòt rơ ngơt, mơya cau kơ nòm să mpồl ling sền gàr tiah nhàr dà lơgar mờ bơta jơh nùs, bơceh pa, nùs nhơm khin cha jak chài neh lam lài tàm tơl gah broă lơh... Khi geh pơn yơu bè ală sơmañ tơlir àng gơ crà tàm càl rbut dờng, trồ tơngai duh, càl khồm pràn nàng bơt bơtàu tiah nhàr dà lơgar ngai sơlơ pas sơm, niam bơnĕ. Bol he lơh quèng tĕ mòa 1 nă klau pơnu mpồl ling sền gàr tiah nhàr dà lơgar pa geh jờng rơ Cau kơ nòm să pơn rơ jak mờ cau kơ nòm să kơp kơ nờm jơh gùt ling klàng nam 2021, hơ̆ là thiếu tá Trần Minh Cường, Cíñ trị viên Pôs ling sền gàr tiah nhàr lơgar mpồng nhàr dà lơgar anih ơhò ơm Cửa Việt, Mpồl ling sền gàr tiah nhàr dà lơgar càr Quảng Trị.

Tàm 10 nă cau kơ nòm să geh pơn rơ jak mpồl ling sền gàr tiah nhàr dà lơgar nam 2021, thiếu tá Trần Minh Cường, Cíñ trị viên pôs ling sền gàr tiah nhàr dà lơgar mpồng nhàr lơgar anih ơhò ơm Cửa Việt, Mpồl ling sền gàr tiah nhàr dà lơgar càr Quảng Trị là cau mìng dùl lơm at gơ noar broă đơng lam bồ, đơng pơlam mpồl ling, den tàng cồng nha lơh geh kung geh ală bơta krơi is sơl.

Jơh bơsram Họk viện Ling sền gàr tiah nhàr dà lơgar jak ngan, geh hìu bơsram sồr ơm wơl lơh pơgru, mơya mờ bơta kơp kờñ bal mờ bơta kờñ gơboh kờñ tă pơgồp sơnam kơ nòm să he dê tàm ù tiah nhàr dà lơgar bơh dà lơgar dê, Cường neh rê hờ Mpồl ling sền gàr tiah nhàr dà lơgar càr Quảng Trị lơh broă. Tàm pôs ling sền gàr tiah nhàr dà lơgar Hướng Lập, Cường neh ai gŏ pràn jak he dê bơh tơl broă lơh, kơ nòl broă geh jàu. Bơta pơn rơ mùl gŏ ngan tàm cau ling kơ nòm să do là muh mat kơ̆ dơn, ngac ngar, bal mờ bơta chài mblàng jơnau jak ngan. Bi geh tai bơta chài bè niam chài- đơs crih tamya, tàp pràn să jan den tàng neh pơgồp bal mờ gơ noar atbồ tàm ƀòn lơgar lam lơh uă broă lơh geh kươ, gơ hòi gơ jà gal ngan đoàn viên tus bal, di mờ jơnau đơs “Kwang bàng bè lơi, srơh bè hơ̆”. Bi neh jơh nùs tus bal tă pơgồp jơnau đơs ai kâp ủy, gah đơng lam mpồl ling in bơyai lơh geh cồng nha uă broă lơh, uă srơh, dơ̆ lam sồr bè: Mpồl ling sền gàr tiah nhàr dà lơgar pơgồp bal bơta pràn bơt bơtàu ƀòn lơgar pa; Dong oh tus hìu bơsram, kòn ròng pôs ling sền gàr tiah nhàr dà lơgar; Mpàng tê chài rơgơi ling sền gàr tiah nhàr dà lơgar; tŭ jơ bơsram tiah nhàr dà lơgar; cau lơh sơ nơm cèng groăt tơlir... Mờ ală cồng nha jak ngan tàm broă lơh, bi geh gah đơng lam mpồl ling sền gàr tiah nhàr dà lơgar tơn pồ lơh Ƀí thư Đảng ủy, Cíñ trị viên Pôs ling sền gàr tiah nhàr dà lơgar mpồng nhàr lơgar anih ơhò ơm Cửa Việt tŭ rơp pa 29 sơnam.

Thiếu tá Trần Minh Cường, Cíñ trị viên, Pôs ling sền gàr tiah nhàr dà lơgar mpồng nhàr lơgar anih ơhò ơm Cửa Việt, mpồl ling sền gàr tiah nhàr dà lơgar Quảng Trị dờp khà jờng cau kơ nòm să kơp kơ nờm gùt ling klàng nam 2021

Nam 2021 là nam geh uă tềl lời wơl bơh Thiếu tá Trần Minh Cường dê tŭ Pôs ling sền gàr tiah nhàr dà lơgar mpồng nhàr dà lơgar anih ơhò ơm Cửa Việt geh khà jờng là mpồl ling lơh ngan geh jai pha mờ geh Ƀộ Quôk phòng pà  Ƀằng khen tàm broă lơh rơcang sơndră kòp Kovid-19; Ủy ƀan Ñân zân càr Quảng Trị pà Ƀằng khen tài geh cồng nha jak ngan tàm 5 nam lơh jat Jơnau sồr sồ 5 bơh Ƀộ Cíñ trị dê bè chồl pràn bơsram mờ lơh jat nùs nhơm, rài kis Hồ Chí Minh, tơngai bơh nam 2016 tus nam 2021 mờ lam lơh rơndap broă Sơlơ tơnguh bơ to bơtê adat boh lam ai kwang bàng, làng bol tiah nhàr dà lơgar, bồt dà lềng in tơngai bơh nam 2017 tus nam 2021. Bơdìh hơ̆ tai, mpồl kung gam geh Ủy ƀan Ñân zân càr Quảng Trị pà Ƀằng khen nisơna tàm broă lơh dong kờl rềs càr cau tàm ơhò Vietship01...

Ờ ngòt bơta ngòt rơngơt, rơcang dong làng bol tàm bơta aniai, rềs àr, Thiếu tá Cường neh tus bal mờ đơng lam tơn mpồl ling hòi 1 rbô 845 dơ̆ ơhò, plung pleh càl rbut dờng ờdo ờdă; dong kờl rềs àr 8 nơm ơhò, plung bal mờ 61 nă cau. Mờ kung tă pơgồp jơnau đơs crơng gơs 13 mpồl atbồ is ơhò, plung ờdo ờdă, 18 mpồl atbồ is sền gàr lơngap lơngai ờdo ờdă, bơh hơ̆ neh yal git nđờ rhiang jơnau tơnggit geh kươ gơ rềng tus gơ noar tờm dà lềng, bồt bơlàu, broă sền gàr ơngap lơngai, ờdo ờdă mpồl bơtìan tàm ƀòn lơgar, pơgồp bal mờ mpồl ling di tŭ bơsong jat jơnau sồr.

Kòp Kovid-19 bơ tờp uă, pôs ling sền gàr tiah nhàr dà lơgar mpồng nhàr lơgar anih ơhò ơm Cửa Việt gàr sùm “Jơnau yal tơnggit mhar, rơcang sơndră kòp Kovid-19” tàm loa pờ tơlik jơnau đơs ƀòn lơgar dê. Thiếu tá Trần Minh Cường là cau tờm cih tơn tơngume jơnau tơnggit kung bè sră cih jơnau tơnggit, jơnau đơs nàng phàt, mblàng yal tus làng bol. Mờ bơta đơng lam bi dê, tơ nơ̆ tŭ lam lơh srơh “Jơh gùt làng bol tus bal rơcang sơndră kòp Kovid-19 mờ lik lòt hờ lơgar ndai, mut tàm lơgar he tìs adat boh lam” tàm tiah nhàr dà lơgar, kwang bàng mpồl ling neh bơyai lơh ai 3 rbô 40 hìu bơnhă tàm 3 xã, thị trấn geh 18 thôn, khu phố tàm ù tiah he atbồ ki\ jơnau hơ pơrgon rơcang sơndră kòp Kovid-19. Mờ ală bơta git gơp he dê, bi neh hòi jà ală mpồl bal, cau dùl nă să dong kờl phan lơh sơ nơm, phan ngui sa pal geh ai mpồl rơcang sơndră kòp bơ tờp, ală kơ nòm bơsram mờ hìu bơnhă geh rài kis kal ke in.

Gơtùi đơs, rùp să cau đoàn viên ơruh pơnu ling sền gàr tiah nhàr dà lơgar tơngai pa geh pơn rơ jak neh lơh gơ rề niam chài kis niam, nùs nhơm rơcang lài phi să tài mpồl bơtìan mờ nùs nhơm lơh ngan sơrlèt gan kal ke, bơta lòng, lơh gơs jak ngan tơl kơ nòl broă geh jàu.

Cau mblàng K’Duẩn