VOV4.K’ho- Tàm Cribơyai đơs lài lơh sa Việt Nam bơh nam 2022 tus nam 2023: “Jơnau rơcang lài digơlan gơguh lơh sa mờ bơta kơp kơnờm 2, 3 gah lơh sa tờm” bơh sră ƀău lơh sa mờ đơs lài, Ƀộ Kế hoạc mờ Đầu tư bơyai lơh poh lài, ală cau jak chài đơs nền, broă lơh ờ huan lơh kràñ ală jơnau sồr rơcang sơndră kòp bơtờp mờ pơn jat tai bơtàu tơnguh lơh sa bơh Cíñ phủ dê neh dong ală mpồl lơh sa kă bro rề ơnàng bơcri priă, pin dờn mờ kơp kơnờm tàm tơngai tơnơ̆ do bơh lơh sa Việt Nam dê. Bulah bè hơ̆, tàm tŭ tơngai lơh sa dunia kal ke, ờ gơtùi git lài, kờñ pal geh bơta rơcang lài, ngac ngar uă rlau tai bơh kâp mpồl lơh sa kă bro, tus kâp lơh sa dờng.

Jat Thứ trưởng Ƀộ Kế hoạc mờ Đầu tư ồng Trần Quốc Phương đơs, bơh 4 nhai bồ nam, broă lơh sa dunia geh uă bơta gơlik geh kal ke, GDP quý 1 kung gam lơh geh khà gơguh rlau 5% pơndrờm mờ bal dùl tŭ nam lài; roh bơngă khà priă geh sền gròi, khà priă ngui sa gơguh 2,1%, ală khà tàm pơnring dờng bè priă jền, càn priă tơm, càn priă geh ai niam, tă dia gơguh đau; khà broă kă bro Việt Nam gơguh 12 điểm bơnah rhiang pơn ndrờm mờ quý lài, là khà jơnhua ngan rlau jơh kờp bơh dơ̆ bơtờp kòp dơ̆ 4. Ală mpồl lơh broă dunia bè Ngân hàng Bơtàu tơnguh câu Á (ADB) đơs lài, GDP Việt Nam nam do digơlan geh 6,5%, Ngân hàng dunia đơs lài là 5,3%; Kes priă jền dunia (IMF) pin dờn khà hơ̆ là 6%... Hơ̆ là ală tềl tơnggŏ niam ngan, ai gŏ, ală mpồl lơh sa kă bro pin dờn tàm bơta kơp kơnờm lơh sa Việt Nam, bulah bè hơ̆, bol he pal geh ală jơnau mblàng lơh loh jrô ơnàng rlau tai nàng bơtàu tơnguh wơl khà gơguh lơh sa kơ̆ kơljap jŏ jòng sùm: “Bulah pin dờn mờ bơta kơp kơnờm lơh sa Việt Nam dê, bol he kung sền gŏ broă kă bro ngai sơlơ geh ală bơta lòng ờ gơtùi git lài. Kòp dờng Kovid-19 bulah neh gơtùi kơryan, mơya ờ hềt tơn jơh tàm tŭ tơngai broă lơh sa- cíñ trị dunia gam geh ală bơta tam gơl dờng ngan, sồr broă lơh đơs lài bè bơta kơp kơnờm lơh sa dờng kung bè lơh sa gah broă lơh ngan ngồn pal geh yal tơnggit jat tàm ală jơnau mblàng lơh loh jak chài, jrô ơnàng mờ uă gah. Añ pin dờn là ală jơnau mblàng lơh loh đơs lài geh đơs tàm dơ̆ cribơyai do geh tă pơgồp uă ngan, ờ mìng ai broă lơh ai tơlik broă rơndap lơh in mờ gam dong kuơ ai broă lơh bơh ală cau bơcri priă dê, ală mpồl lơh sa kă bro dê in tai, nàng lam lơh jat ngan ngồn jơnau kờñ bơtàu tơnguh dà lơgar bè ală Nghị quyết bơh Cíñ phủ dê neh ai tơlik”.

Bơh nùs nhơm hơ̆, ală cau jak chài lơh sa, kwang ala mat ală mpồl lơh sa dunia, ală hiệp hội, gah lơh phan, cau lơh sa kă bro geh pơn rơ neh cribơyai mờ đơs, Broă lơh bơtàu tơnguh wơl mờ bơtàu tơnguh lơh sa- mpồl bơtiàn bơh Cíñ phủ dê (geh ai tơlik tàm Nghị quyết sồ 11) geh lơh gơlik tŭ niam nàng bơtàu tơnguh wơl ròt mpồl lơh gơlik, tac phan, cau lơh broă, tơnguh ală bơta pràn, priă jền gơguh lơh sa. Lài mờ tŭ geh broă lơh do, uă broă lơh nam priă jền, priă tơm kung neh geh lam lơh, dong kờl làng bol mờ mpồl lơh sa kă bro... Bulah bè hơ̆, tàm tŭ tơngai broă lơh sa pa sồr pal geh ală broă lơh dong kờl ngac ngar, ngan ngồn rlau. Mùl màl, ồng Phan Đức Hiếu, Ủy viên Thường trựk Ủy ƀan lơh sa bơh Quôk hội đơs là, nàng Broă lơh bơtàu tơnguh wơl mờ bơtàu tơnguh lơh sa- mpồl bơtiàn lơh geh cồng nha, pal lơh jat 3 jơnau sồr: Lài ngan là mhar lam lơh jat ngan ngồn ală broă lơh dong kờl tus tê làng bol mờ mpồl lơh sa kă bro; dơ̆ 2 là gàr niam broă lơh dong kờl geh cồng nha, ờ rah rài, hoàc huơr priă jền; dơ̆ 3 là gàr niam bơta loh làng, song dơpă. Mờ kuơmàng là kờñ geh bơta lơh ngan, bơta rơcang lài bơh jơh ală gah dê, bơh dà lơgar tus làng bol mờ mpồl lơh sa kă bro, hơ̆ là bơta ngac ngar, bơceh pa, gơ dờp niam rlau mờ gùng dà kă bro pa, bơta mờng quèng ngui sa pa, ală bơta măi mok pa.

Ală cau jak chài đơs nền, gơ rềng bơh dơ̆ tam lơh đah Nga mờ Ukraine dê tus rài lơh sa gùt plai ù digơlan jŏ jòng tus nam 2023. Tus tŭ do, mờ 2 bơta gơ rềng là dơ̆ tam lơh đah Nga mờ Ukraine mờ bơta bơtờp kòp tài bơh jơi tam gơl să Omicron, GDP gùt plai ù gùt nam kờp dŭ geh 3,6%. 2, 3 lơgar dờng pràn bè Mỹ digơlan geh 3,7%. Broă lơh sa dunia bè hơ̆, Việt Nam neh pờ mpồng wơl, neh mờ gam lơh ngan gàr kơ̆ broă lơh nam priă jền, priă tơm bal mờ uă broă lam lơh ndai dong bơtàu tơnguh wơl niam rlau, mơya bơtàu tơnguh wơl ờ ndrờm bal, pal geh ală broă lơh ngac ngar rlau hơ̆ sồng gơtùi lơh jat jơnau kờñ ngan ngồn mờ bơtàu tơnguh kơ̆ kơljap jŏ jòng sùm. Tàm hơ̆, nàng gơtùi lơh geh khà gơguh GDP bè bơta kơp kơnờm, Việt Nam pal sơlơ tơnguh rlau tai broă tă bơsong kal ke, kòl yan tàm sră nggal lơh broă, lơh li la tàm broă lơh gơlik mờ tac phan, ngan là mpồl phan bơna nàng mòn gơs phan, pal đơs lài gờñ mờ ơn prap rơcang gàr lài xăng, zờu, chồl pràn lơh sa gàr niam gơ jat bal mờ pơndiang, tac bro phan bơna, đơs lài gờñ mờ geh ală broă lơh gàr niam kơryan roh bơngă khà priă.

Cau mblàng K’Duẩn