VOV4.K’ho- Bulah neh mờr 80 sơnam mờ cèng tàm să jan uă bơta sồt să bơh rài tam lơh dê mơya cau ling sồt să ồng Nguyễn Đình Phùng, ơm tàm ƀòn dờng Tam Kỳ, càr Quảng Nam kung gam jơh nùs ngan mờ broă lơh ngềt ngơ̆t, tơrgùm pơgồp is priă jền nàng lơh rbàng drơng broă lòt rê ai làng bol in tàm ală tiah ƀòn lơgar rƀah kal ke Quảng Nam dê. Mờr 30 nơm rbàng mờ priă tă gĭt nđờ tơmàn đong, neh lơh sir mờ mut ngui, pơgồp bơnah dong làng bol ală ƀòn lơgar rƀah in lòt rê ƀuơn ngan, bè ờs wơl rài kis. Ală broă lơh bơh ồng Nguyễn Đình Phùng dê gơ gơs jơnau lơh geh bơta gơ kờñ bè ală cau ling sồt să “bulah să jan kuĕt kơlte mơya kung gơtùi lơh broă sơl” lơh gơ rề rùp hin cau ling wa Hồ tàm tàm rài lơngai dê.

 Tàm bơta duh tơr ồl ngan bơh tiah tàm gùl lơgar ală ngai nggùl nhai 7, tàm ală gah gùng tàm ală tiah ƀòn lơgar rƀah, kal ke bơh càr Quảng Nam dê, uă cau kung sùm sền gŏ rùp hin cau ồng neh dờng sơ nam “ rềp ù ngài trồ” mờ rơndeh măy yau lòt sền, sac rơ wah tiah lơh rbàng drơng broă làng bol lòt rê. Ồng là Nguyễn Đình Phùng, cau ling sồt să 2/4 mờ gah tê ma sồt wañ kal ke ngan. Tŭ lòt sền geh tiah lơh rbàng là ồng cùp rùp pơyoa kòn klau in nàng cribơyai bal lơh mờ sơnđờm mut lơh. Ồng Nguyễn Đình Phùng pà gĭt, bơta chờ hờp dờng ngan rlau jơh là ală rbàng geh mut ngui dong broă lòt rê làng bol in ƀuơn ƀoài, muh mat ƀòn lơgar tam gơl niam.

Ồng Nguyễn Đình Phùng đơs: Pah dơ̆ rê tàm ƀòn lơgar añ gŏ uă rbàng ờ diơng, lòt rê kal ke ngan, làng bol gơ dùh sồt să, kuĕt kơlte, geh cau den gơbàn chơ̆t să. Geh bơh bơta hơ̆ añ hơ̆ sồng ai is priă jền, tềm pềr bal nàng lơh ală rbàng. Pah nam hìu bơnhă añ pơnđơl pràn lơh ngan lơh geh ết ngan rlau jơh là 4 nơm rbàng. Lài mờ tŭ mut Đảng den añ neh hơ sơntơm să là geh lơh ngan tus nhơm lồi dŭt bulah tŭ do neh kra mờ cèng uă bơta sồt tàm să jan mơya añ geh lơh ngan bơsong. Añ neh hơ mờ ală oh kòn, gơ̆p bơyô añ dê mờ ală cau ling bal neh chơ̆t là tŭ să jan gam pràn kơl dang, gam geh priă jền den añ geh pơn jat tai lơh rbàng drơng broă làng bol in.

Bè hơ̆ sùm, rlau 5 nam  do, hìu bơnhă cau ling sồt să ồng Nguyễn Đình Phùng ngềt ngơ̆t ai is priă jền lơh mờr 30 nơm rbàng drơng broă làng bol lơh broă sa. Pa do ngan rlau jơh là rbàng Phùng Hiệp 28, tàm xã Tam Phú, ƀòn dờng Tam Kỳ, geh mut ngui di tàm ngai tơngkah 132 nam Ngai deh Bác Hồ. Mò Dương Thị Nhân, bal mờ làng bol khối phố Ngọc Nam, sơnah ƀòn An Phú, ƀòn dờng Tam Kỳ chờ hờp tŭ kàl mìu nam do lòt rê ƀuơn ƀoài rlau. Mò Dương Thị Nhân đơs: Lài do ờ hềt geh rbàng den lòt rê kal ke ngan, pah dơ̆ dà hòr tih là lòt gan ờ gơtùi. Tŭ do neh geh rbàng, añ lòt rê ƀuơn ngan, ờdo ờdă mờ chờ hờp ngan.

Bơdìh mờ broă ai is priă jền lơh rbàng dong làng bol, bơh nam 2014 tus tŭ do, ồng Nguyễn Đình Phùng gam tus bal uă broă lơh mpồl bơtiàn, dong kờl uă rài kis kal ke, ờ niam tàm ală tiah. Ồng Nguyễn Quang Vinh, Kwang atbồ thôn Ngọc Mỹ, xã Tam Phú, ƀòn dờng Tam Kỳ đơs, gơnoar atbồ mờ làng bol ki ngàm ngan mờ ưn ngài ngan nùs nhơm bơh ồng Nguyễn Đình Phùng dê. Ồng Nguyễn Quang Vinh đơs: Bơh chờm tŭ wa Phùng mut nàng kờñ bơcri priă lơh rbàng tàm ù tiah do, añ geh lùp wa hòi jà tă pơgồp priă jền bơh ală mpồl lơh sa kă bro lơi den wa đơs là hìu bơnhă ai is priă jền nàng lơh. Añ gơlơh ngoh rơngăc ngan bơh nùs nhơm dùl nă cau ling wa Hồ dê neh dờng sơnam ngan mơya kung gam lơh ngan hòi jà cau mut lơh, să tờm jat sền is bơta niam broă lơh dê nàng gàr niam broă lòt rê ai làng bol in.

Mò Huỳnh Thị Thu, pơ ùr cau ling sồt să Nguyễn Đình Phùng yal, 2 nă ùr bơklau neh bal mờ gơ̆p lòt gan gĭt nđờ bơta kal ke tàm nam nhai tam lơh cui rơcai den sùm sền dờng màng bơta kwơ màng bơh rài ring lơngai dê mờ gĭt ưn ngài ală cau neh chơ̆t phi să. Mò đơs, ùr bơlau mò pah nhai dờp geh 15 tơlak đong priă nhai ơm rlô lơh broă mơya kung gam lơh ngan tềm pềr, tơrgùm wơl nàng bal mờ ală oh kòn lơh rbàng ai làng bol in. Mò Huỳnh Thị Thu đơs: Bơklau añ ngai sơlơ dờng sơnam, să jan ờ gam pràn tai den pah dơ̆ ồng lòt sền tiah lơh rbàng là añ kơlôi sơnơng ngan, geh tŭ ồng lòt ồng tơm tơn tàm rơndeh dờng. Añ kơlôi sơnơng ngan mơya kung gam kơlôi la tài broă lơh bal den pah tŭ lơh sir dùl nơm rbàng là hìu bơnhă añ chờ hờp ngan.

Pa mìng 19 sơnam lơm, ồng Nguyễn Đình Phùng neh ià phàu tus bal tam lơh tam dră mờ Mỹ, tŭ tiah tam lơh Quảng Nam gam tàm tơngai tam lơh cui rơcai. Rê ling nam 1977, cèng tàm să jan uă bơta sồt mồr, ồng Phùng lơh broă tàm Anih cah rña làng bol Thị xã Tam Kỳ (tŭ do là ƀòn dờng Tam Kỳ, càr Quảng Nam). Tŭ jơh sơnam lơh broă tus tŭ do, ồng pơn jat tai tus bal kơnòl broă tàm Ci ƀộ khối phố mờ Mpồl cau ling yau sơnah ƀòn An Xuân, ƀòn dờng Tam Kỳ. Ồng Đỗ Văn Thương, Củ tịc Mpồl cau ling yau sơnah ƀòn An Xuân, jơh nùs ngoh rơngăc ngan mờ bơta tryang tryồng jơh nùs lơh broă, nùs nhơm geh kơnòl, ai jơh bơta pràn să jan dê tài broă lơh bal bơh cau ling yau Nguyễn Đình Phùng dê. Ồng Đỗ Văn Thương đơs: Bơta kơ̆p kờñ bơh ồng Phùng dê là lơh broă lơi kung geh bơh nùs nhơm bơh he dê, lơh ngềt ngơ̆t ờ kờñ yal loh làng, bơh lài tus tŭ do sùm bè hơ̆ lơm. Tŭ sơnđờm lòt ling tus tŭ do den ồng Phùng ờ tŭ lơi kơlôi tus să tờm he dê mờ uă ngan là kơlôi ai mpồl cau mờ kơlôi rcang ai làng bol lơh broă sa in.

Mờr 80 sơnam, bơta pràn ờ gam bè lài tai, mơya cau ling sồt să ồng Nguyễn Đình Phùng kung gam kơlôi sơnơng mờ ală jơnau kơ̆p kờñ lơh rbàng drơng broă làng bol in lòt rê tàm ală tiah ƀòn lơgar rƀah kal ke Quảng Nam dê. Ồng Phùng chờ hờp tŭ pa tus nggùl nhai 7 mơya neh lơh sir jơnau kờñ geh ai tàm nam do là lơh 4 nơm rbàng. Neh geh 28 nơm rbàng bơh ồng Phùng dê lơh mờ cèng mat bơh Phùng Hiệp 1 tus Phùng Hiệp 28. Mblàng bè mat sơnđan Phùng Hiệp, ồng Nguyễn Đình Phùng pà gĭt, Phùng là mat ồng dê, ai Hiệp là mat dùl nă cau gơ̆p bơyô neh chơ̆t, kung là cau sơnrờp tă pơgồp bal priă jền lơh bal mờ hìu bơnhă ồng dê lơh rbàng lòt rê drơng broă làng bol in lòt rê. Ồng Phùng chờ hờp tŭ mờr 30 nơm rbàng ndrờm lơh sir mờ geh mut ngui di tàm ală ngai chờ dờng dà lơgar dê, mờ bơta kơ̆p kờñ pơn jat tai tă pơgồp dùl bơnah dà kơl hề dềt rơhền bơh cau ling wa Hồ dê ai bơta bơtàu tơnguh ƀòn lơgar mờ dà lơgar in.

Cau mblàng K’Hạnh