VOV4.K’ho - Rơcang pơrjum dơ̆ 4, Quốk hội khoă 15 mờr tus, bơh ngai 05 tus 11 nhai 10, Mpồl kwang bàng ala măt Quốk hội càr Lâm Đồng neh bơyai lơh tìp măt mờ cau tĕ khà tàm ală kơnhoàl, ƀòn dờng tàm càr.

Làng bol càr Lâm Đồng pal kơ̆p tus trồ mang nàng geh cih măt lơh sră ngui ù tàm anih lơh broă dùl mpồng  tàm càr do

Cau tĕ khà pơn jăt tai dan mờ Mpồl kwang bàng Quốk hội càr Lâm Đồng uă broă gam gơtìp kal ke

Uă broă kal ke geh cau tĕ khà pơn jăt tai geh jơnau đơs pơngồ bal mờ geh jơnau dan bè: broă sơndră mờ sa kuề sa koà bơh dà lơgar bal mờ càr, broă sơndră mờ tam lơh pù pờng tàm hìu nhă, broă kham, sơm kòp, broă lơh jăt ală jơnau kờñ dà lơgar, priă bơcri bơh dà lơgar, gùng lòt tus tàm ală tiah, gàr niam rài kis lơh broă sa mpồl bơtiàn... cau tĕ khà càr Lâm Đồng sền ngăc ngan tus mờ ală broă tơmù rơƀah kơl jăp, ală broă bè lơh dà sàng kloh tàm ƀòn lơgar, atbồ sền gàr brê, lơh phan geh is, dong kờl mpồl lơh sa kă bro mờ làng bol lơh broă sa tơnguh uă cồng nha lơh sa, tơn jơh broă geh phơng sih, phan lơh sa suơn sre ờ niam. Geh dùl tơngu me geh uă cau tĕ khà đơs tus, hơ̆ là sră nggal sền nàng lơh sră ngui ù dơ̆ sơnrờp gam uă bơta ir, kal ke, jŏ tơngai.

Mpồl kwang bàng ala măt Quốk hội càr Lâm Đồng ai uă ngan tơngai cri bơyai, yal, hơ mblàng ờ uă tơngu me kwơ màng, mờ geh dờp, iăt, tơrgùm ală jơnau đơs, jơnau dan bơh cau tĕ khà dê.

VOV Tây Nguyên – Cau mblàng Ndong Brawl