VOV4.K’ho - Poh lài, Củ tịc Quốk hội ồng Vương Đình Huệ bal mờ uă Mpồl kwang bàng Quốk hội tàm ală càr, ƀòn dờng neh tìp mờ cau tĕ khà lài mờ pơrjum dơ̆ 4, Quốk hội khoă 15 (kờp dŭ geh sơn đờm lơh tàm ngai 20 nhai 10 mờr tus). Tàm ală dơ̆ tìp, cau tĕ khà ală càr, ƀòn dờng neh yal, dan uă broă kwơ màng, kơ̆p kờñ Quốk hội sền gròi bơsong.

Mpồl kwang bàng Quốk hội càr Dăk Nông neh lơh jăt ală dơ̆ tìp mờ cau tĕ khà tàm ală xã Nâm N’Jang, kơnhoàl Dăk Song, xã Quảng Tâm, kơnhoàl Tuy Đức, xã Quảng Phú kơnhoàl Krông Nô mờ xã Quảng Sơn kơnhoàl Dăk Glong, iăt jơnau đơs bơh cau tĕ khà.

                              Cau tĕ khà tàm càr Dăk Nông kờñ klàs mờ broă kơl-tam; tam-kơl”

Tàm ală dơ̆ tìp, ală kwang bàng Quốk hội tàm càr Dăk Nông neh yal bè broă lơh tàm pơrjum dơ̆ 4 Quốk hội khoă 15 kờp dŭ geh bơyai lơh tàm nhai 10 tus, geh sền wơl uă tơngu me, rơndăp broă cih adăt boh lam, tàm hơ̆ geh ală adăt gơrềng tus mùl màl mờ rài kis làng bol dê. Hơ̆ là ală rơndăp broă adăt Làng bol lơh tờm tàm ală ƀòn, adăt ù tiah tam gơl, adăt sền gàr cau ngui sa, adăt hợp ták xã.

Cau tĕ khà càr Dăk Nông dan bè uă broă geh pơnrơ tàm càr do dê, mìng là ală broă gơtìp kal ke, gơkòl tàm gah ù tiah, sền gàr brê, lơyài tàm broă bơsong sră nggal tàm ală xã. Cau tĕ khà kung dan mờ Quốk hội geh ală broă lơh gơwèt mờ ală gah broă lơh sơnơm, bơto bơtê; broă bơcri priă lơh gùng lòt, ồs đèng tàm ală tiah kal ke... Tàm hơ̆ uă ngan tàm gah lơh sa suơn sre, cau tĕ khà dan geh broă dong kờl làng bol lơh broă sa lik klàs mờ bơta “geh tơnhào ờ geh khà priă tăc”, “kơl-tam; tam-kơl”. Cau tĕ khà Lê Quang Phi, kis tàm xã Nâm N’Jang, kơnhoàl Dăk Song, do là tiah geh tam uă tiều càr Dăk Nông dê yal: “Nam 2018, gar tiêu tăc ờ geh khà priă mờ chơ̆t jơh den bơh tŭ hơ̆ tus tŭ do, làng bol lơh broă sa bol añ neh tam gơl tam ờ uă bơta phan tam, mìng là ală bơta tờm chi sa plai. Den càr Dăk Nông kung ai geh uă gùng dà broă lơh nàng tam, tàm hơ̆ uă ngan là tờm ƀơ, tus tŭ do den plai ƀơ geh uă ngan mờ ờ geh cau blơi, tŭ do tam gơl tai ală phan tam. Añ kung kơ̆p kờñ lơh bè lơi geh gùng dà broă lơh nàng càr Dăk Nông bơ̆t bơtàu geh khà măt kă bro bè bơta tờm chi sa plai lơi hơ̆ geh pơnrơ ngan ai geh uă bơta kwơ tàm broă lơh sa. Mờ ală nam pa do, bol añ kung neh iăt uă jơnau yal bè broă lơh ală hìu măi lơh phan geh lơh bơh broă lơh sa suơn sre, mơya mùl màl tàm kơnhoàl do ờ hềt geh dùl nơm hìu măi lơh phan lơi”.

Kung tàm poh lài, Củ tịc Quốk hội ồng Vương Đình Huệ bal mờ Mpồl kwang bàng Quốk hội ƀòn dờng Hải Phòng neh tìp mờ cau tĕ khà tàm kơnhoàl Thuỷ Nguyên, ƀòn dờng Hải Phòng lài mờ pơrjum dơ̆ 4, Quốk hội khoă 15. Tàm dơ̆ tìp, ală cau tĕ khà tàm kơnhoàl Thủy Nguyên, ƀòn dờng Hải Phòng neh tơlik nùs nhơm pin dờn, chờ hờp tềng đăp mờ cồng nha tơnguh bơtàu dà lơgar dê; tàm broă đơng lam bơh Đảng, Quốk hội, Cíñ phủ tềng đăp mờ ală kal ke bơh làng bol bal mờ mpồl lơh sa kă bro.

                        Củ tịc Quốk hội ồng Vương Đình Huệ tìp mờ cau tĕ khà tàm ƀòn dờng Hải Phòng

Cau tĕ khà kung neh đơs tus ală broă geh pơnrơ ngan tŭ do bè: broă cih ală adăt boh lam, pal geh tơrgùm bal, ndrờm bal nàng gàr niam broă tơmù ală sră nggal, ƀuơn lơh jăt, ƀuơn ai làng bol bal mờ mpồl lơh sa kă bro in; broă tam gơl adăt kham, sơm kòp; adăt lùp sền tam gơl; broă sơndră mờ crùh ồs sa; broă cau pơgru ơm ờ bơto, ờ tơl cau pơgru, sền sơwì sră măi; lơh niam priă nhai, broă lơh gơwèt mờ kông cứk, viên cứk.

Hơ jơnau lùp bơh cau tĕ khà bè gah lơh sơnơm, tàm hơ̆ dan Quốk hội geh kơrnoăt ai geh khà priă sơnơm, gàr tơl khà sơnơm sơm kòp. Tài tŭ do, cau kham, sơm kòp mờ sră ƀảo hiểm ờ geh sơnơm, pal blơi sơnơm hờ bơdìh, den tàng hoàc huơr ngan, tàm hơ̆ uă ngan là gơwèt mờ cau rơƀah, Củ tịc Quốk hội ồng Vương Đình Huệ pà git, Cíñ phủ gam đơng lam, lam sồr jăt gùng dà pal gàr niam khà geh, bơta niam mờ khà priă: “Quốk hội neh jào Cíñ phủ geh broă lơh di tŭ nàng bơsong kal ke nàng lơh lơh jăt broă blơi sơnơm, phan lơh sơnơm. Kung neh lơh jăt kơrnoăt blơi sơnơm tàm Ƀộ Y tế. Tŭ do gam pơn jăt tai lơh ngan, Cíñ phủ, Quốk hội kung neh đơng lam Ƀộ, gah lơh sơnơm sền wơl ală kơrnoăt geh ai bơh gah lơh sơnơm dê. Pal loh làng, ndrờm bal tàm broă atbồ khà priă sơnơm”.

Cau tĕ khà kung yal bè broă ờ tơl cau pơgru, ờ ndrờm bal bè broă geh ai, atbồ khà priă sră măi gam uă bơta kal ke; dan ai geh sră măi phổ thông là dùl bơta phan geh dà lơgar ai khà priă, pleh mờ bơta ală mpồl lơh sa kă bro, hìu lĭp sră tơlik is khà priă bè tŭ do. Hơ wơl bè bơta do, Củ tịc Quốk hội đơs tờm: “Tàm nam tus, Thường vụ Quốk hội geh jăt sền dùl tơngu me kwơ màng ngan, hơ̆ là broă tam gơl pa broă lơh mờ sră măi, tàm hơ̆ geh tơngu me tờm là broă sền sơwì, lĭp sră, tơlik geh pang sră mờ ngui sră măi. Pal lời ală hìu bơsram blơi mờ tơmŭt tàm thư viện ngui geh uă nam, ngui ai nam tơnơ̆ in. Sền wơl broă lĭp sră bè lơi? Bơta tờm gùt mpồl bơtiàn bè lơi? Tus do geh lơh pràn ngan”.

Bal mờ broă cih adăt boh lam, Cau tĕ khà gùt lơgar gam kơ̆p kờñ ală broă geh pơnrơ ngan geh ală kwang bàng Quốk hội ai geh nàng cri bơyai mờ bơsong di pal, ring bal tàm pơrjum dơ̆ 4, Quốk hội khoă 15 mờr tus.

VOV Tây Nguyên-Cau mblàng Ndong Brawl