VOV4.K’ho- Poh lài, tàm pơrjum dơ̆ 3, Quôk hội khóa 15 neh geh lơh pơrjum lùp mờ hơ jơnau lùp. Ƀộ trưởng Ƀộ Nông nghiệp mờ Phát triển Nông thôn ồng Lê Minh Hoan là cau lài ngan hơ jơnau lùp tềng đap Quôk hội. Tàm ală broă lơh mờ Ƀộ trưởng ồng Lê Minh Hoan đơs nền broă lam lơh wơl lơh sa, hòi jà làng bol mut tàm Hợp tak xã. Mờ kung đơs nền tus bồ tơngoh kơlôi sơnơng tam gơl bơh lơh broă sa suơn sre gơs bồ tơngoh kơlôi sơnơng lơh sa suơn sre.

Sơn đờm dơ̆ lùp jơnau, hìu pơrjum Quôk hội dê pơn jat sùm geh ală jơnau lùp bè jơnau gơbàn sùm “tơnhàu geh uă mơya tac ờ yòm” mờ ală dơ̆ dong kờl phan lơh gơs bơh suơn sre ờ hềt tơn jơh. Lòt jat jơnau do bơh tơngai lơh broă lài, ồng Dương Khắc Mai, mpồl kwang bàng Quôk hội càr Dăk Nông tơlik jơnau lùp ai Ƀộ trưởng Ƀộ Nông nghiệp mờ Phát triển Nông thôn in: “Broă lơh sa suơn sre kung gam uă ngan jat tàm bơta anih blơi phan lơh gơs, tàm tŭ khà priă ală phan ngui lơh sa suơn sre sùm gơguh jơnhua, broă lơh sa uă ngan gam cèng bơta lơh is mờ tac phan gam gơ wèt tàm 2, 3 drà kă bro. Kơ cế, broă lơh dong kờl ờ hềt tơl bơta niam nàng gơ hòi gơ jà ală bơnah priă jền bơcri ai gah do in. Dan Ƀộ trưởng pà git, broă lơh kuơmàng lơi ai broă do in”.

Ƀộ trưởng ồng Lê Minh Hoan hơ jơnau lùp

Ƀộ trưởng Ƀộ Nông nghiệp mờ Phát triển Nông thôn ồng Lê Minh Hoan hơ: “Bol he pal lam lơh wơl broă lơh sa, tam gơl cíñ quy wơl gah lơh phan. Yal tơnggit, loh làng, khà kàl tam ai tơl bơta phan lơh gơs bơh suơn sre in mờ tam pà tàm tơl bơta drà kă bro. Drà kă bro tac hờ lơgar ndai, drà kă bro tàm lơgar. Ƀộ Nông nghiệp mờ Phát triển Nông thôn kung dờp kơnòl tềng đap Thủ tướng Cíñ phủ, geh gờñ bal mờ ală anih lơh broă kă bro lơgar ndai bal mờ bol he lơh broă do”.

Lùp bè broă rơndap lơh sa gơ jat bal mờ drà kă bro tac phan lơh gơs bơh suơn sre, uă kwang bàng sền gròi tus broă rơndap lơh sa, yal tơnggit bè drà kă bro kung bè bơta gơ kòl phan lơh gơs bơh suơn sre pah tŭ mut tàm kàl tơnhàu. Ồng Hoàng Anh Công, mpồl kwang bàng càr Thái Nguyên đơs loh: “Dùl tàm ală jơnau là tài bơh broă lơh blơi phan bơh lơgar ndai gơ rềng tus tơl khà bơta niam phan bơna bơh suơn sre đah lơgar Lo dê geh uă tam gơl, sồr bơta niam phan blơi bơh lơgar ndai ngai pal sơlơ niam rlau tai, lơh jat ală tơl khà bè ală lơgar câu Âu mờ lơgar Mỹ dê. Jat Ƀộ trưởng den bol he pal lơh bè lơi nàng dong làng bol tơnguh bơta niam phan lơh gơs bơh suơn sre, tơnguh bơta kuơ phan lơh geh bơh suơn sre, bơh hơ̆ nàng gơtùi sơlơ tơnguh broă tac phan hờ lơgar ndai mờ bơt bơtàu dùl rài tac phan hờ lơgar ndai kơ̆ kơljap jŏ jòng sùm”.

Ƀộ trưởng Ƀộ Nông nghiệp mờ Phát triển Nông thôn ồng Lê Minh Hoan đơs loh: “Uă nam ngan bol he sùm geh bồ tơngoh kơlôi sơnơng là drà kă bro Lo là drà kă bro ƀuơn, tŭ Lo tam gơl ală broă lơh gròi sền kòp bơtờp kung bè ờdo ờdă kloh niam phan sa den bol he gơtìp kal ke, tàm do geh kơnòl bơh ală ƀộ, gah broă lơh dà lơgar dê, tàm hơ̆ geh Ƀộ Nông nghiệp mờ Phát triển Nông thôn tàm broă lơyài yal tơnggit nàng làng bol in git mờ să tờm cau lơh broă sa kung ờ huan tam gơl, ờ hềt sền gròi tus gah do”.

Tơlik jơnau lùp bè bơta khà priă phơng sih, sơnơm sền gàr phan tam, phan siam phan ròng, ală bơta phan ngui tàm broă lơh sa suơn sre gơguh jơnhua tàm ală nam do, lơh cau lơh broă sa gơtìp kal ke, lơh is nàng geh priă cồng, geh tŭ là hoàc huơr. Kuơmàng, bơh tŭ kòp Kovid-19 bơtờp uă, khà priă ală bơta phan bơna ngai sơlơ gơguh jơnhua. Ală kwang bàng đơs là, do loh làng là bơta jal mhar gơ wèt tus mờ gah lơh sa suơn sre; mờ kung sồr Ƀộ trưởng ồng Lê Minh Hoan đơs loh ală broă lơh tàm tơngai tus nàng dong kờl cau lơh broă sa gơ dờp mờ sơndră mờ bơta do: “Do là bơta jal mhar pal lam lơh rơndap gah lơh phan, rơndap wơl broă lơh sa. Rơndap wơl lơh sa, hòi jà làng bol mut tàm Hợp tak xã. Tŭ làng bol mut tàm Hợp tak xã den geh gơnoar loh làng nàng geh anih lơh broă  geh gơnoar bè adat boh lam, đal git khà priă, bơta niam, pơlam tơrmù hời rơhời hữu kơ mờ vô kơ, sơnơm sền gàr phan tam ờs mờng mờ sơnơm sền gàr phan tam siñ họk”.

Mờ jơnau lùp bơh mò Vương Thị Hương, mpồl kwang bàng càr Hà Giang dê bè ală broă lơh chồl pràn mpồl lơh sa kă bro tus bal tơrbŏ bal lơh sa gơ jat bal mờ tac phan lơh gơs, Ƀộ trưởng ồng Lê Minh Hoan hơ: “Ală tiah pal rơcang lài tàm tơrbŏ bal mờ ală tiah ndai nàng gơ hòi gơ jà mpồl lơh sa kă bro iang nùs geh phan bơna. Kâp hơ đơm pal gròi sền nền nòn broă nàng nggui bal mờ cau lơh broă sa, dùl gah là mpồl lơh sa kă bro. Jat añ den cồng nha bơh ală mpồl lơh sa kă bro neh bơcri priă, bơta pun dờn, tam pà bal bơh cau lơh broă sa dê, 2 gah tam pà bal mờ gơp. Geh tŭ bơta pin dờn gam pràn rlau mờ jơnau hơ pơrgon tai”.

Cau mblàng K’Duẩn