VOV4.K’ho- Tơnơ̆ tŭ tơn jơh pơrjum dơ̆ 3, Quôk hội khóa 15, Mpồl kwang bàng Quôk hội ală càr tàm tiah Tây Nguyên neh bơyai lơh tìp mat mờ cau tĕ khà. Ai tơnggŏ bơta chờ hờp tềng đap ală cồng nha bơh dơ̆ pơrjum dê, cau tĕ khà 2 càr Lâm Đồng mờ Gia Lai kung geh uă jơnau dan bè uă tơngume kuơmàng tàm càr.

Tàm càr Lâm Đồng, ồng Phan Đình Trạc, Ủy viên Ƀộ Cíñ trị, Ƀí thư Đảng dà lơgar, Kwang atbồ Ƀan Nội cíñ dà lơgar bal mờ Mpồl kwang bàng Quôk hội càr Lâm Đồng neh tìp mat mờ cau tĕ khà tàm xã Đại Lào, ƀòn dờng Bảo Lộc mờ xã Liên Đầm, kơnhoàl Di Linh.

Kwang atbồ Ƀan Nội cíñ dà lơgar ồng Phan Đình Trạc tìp mat cau tĕ khà càr Lâm Đồng

Tàm ală anih tìp mat mờ cau tĕ khà, cau tĕ khà ai tơnggŏ bơta chờ hờp bè ală cồng nha bơh pơrjum dơ̆ 3 dê, ngan là Quôk hội neh lời uă tŭ tơngai nàng cribơyai, ring bal uă tơngume kuơmàng. Bal mờ hơ̆, cau tĕ khà pơn jat tai geh jơnau dan tus Mpồl kwang bàng Quôk hội càr càr Lâm Đồng ală broă gơlik geh pal geh sền gròi mờ bơsong. Tàm hơ̆, đơs tus uă ngan rlau jơh là pơn jat tai lam lơh broă lơh dong kờl mpồl lơh sa kă bro mờ làng bol tơnơ̆ kòp dờng Kovid-19, broă lơh gàr kơ̆ kơljap khà priă ală bơta phan ngui sa pal geh bè xăng, zờu, phan ngui tàm broă lơh sa suơn sre; atbồ khà priă broă drơng ala kham, sơm kòp, broă kham mờ sơm kòp jat ƀảo hiểm y tế; broă lơh atbồ ù tiah, ring niam bơt bơtàu, atbồ, sền gàr brê, phan kuơ tàm ù; sră nggal gam kal ke; gùng lòt ƀòn lơgar gam ờ niam, pơhìn lơh roh bơta ờdo ờdă... Mò Nguyễn Thị Phương, ơm tàm thôn 3, xã Đại Lào, ƀòn dờng Bảo Lộc, đơs: “Bơta kơp kờñ bơh làng bol bol hi dê là tiah lơi pal rơndap ù tiah den pal rơndap, tiah lơi ờ rơndap lài ù tiah den ai pà ù làng bol in nàng làng bol geh sră ngui ù, lơh gơlik bơta niam nàng bơtàu tơnguh lơh sa. Pơn yơu là kờñ càn priă ngân hàng, halà tam pà ù oh kòn in. Làng bol bol hi geh jơnau đơs tus mờ kâp hơđang bè hơ̆”.

Bal mờ hơ̆, cau tĕ khà kung dan pal tơnguh pràn rlau tai broă lơh rơcang sơndră sa kuề sa kuà, lơh glài kràñ ală cau lơh tìs; mhar lam lơh rơndap broă lơh gùng rơndeh ntoat rat Dầu Giây- Tân Phú- Liang Khàng.

Cau tĕ khà càr Lâm Đồng dan uă broă pal sền gròi tàm càr

Ala mat Mpồl kwang bàng Quôk hội càr Lâm Đồng, ồng Phan Đình Trạc- Ủy viên Ƀộ Cíñ trị, Ƀí thư Đảng dà lơgar, Kwang atbồ Ƀan Nội cíñ dà lơgar neh cih dờp ală jơnau đơs, jơnau dan bơh cau tĕ khà dê mờ hơ tơn 2, 3 tơngume gơ wèt gơnap gơnoar he dê. Mìng is mờ broă lơh rơcang sơndră sa kuề sa kuà, ồng Phan Đình Trạc đơs nền geh “ờ geh tiah kơryan, ờ geh tiah ờ kờp” mờ geh pơn jat tai lam lơh kràñ cê rlau tai tàm tơngai tus: “Bơh bồ tơngai lơh broă khóa 13 tus tŭ do, pa rlau 1 nam mờ nggùl lơm gời mơya bol he neh lơh glài 45 nă kwang bàng gơ wèt dà lơgar atbồ mờ yă 21 nă kwang bàng gơ wèt dà lơgar atbồ. Mờ ờ hềt tŭ lơi bol he tơlik bơdìh Đảng tus dơ̆ lĕ 2 nă Ủy viên Đảng dà lơgar mờ kung lah yă, kup jàm ing tơn. Hơ̆, broă lơh rơcang sơndră sa kuề sa kuà kràñ ngan. Pal geh nùs nhơm kràñ, pal phi să ngan bơh ală cau tàm dơlam den bol he hơ̆ sồng gơtùi lơh bè hơ̆. Mờ ngan là geh pơn jat tai lơh kràñ rlau tai”.

Di dơ̆ do, Mpồl kwang bàng Quôk hội càr Lâm Đồng neh jàu 40 bơnah phan pà ai ală hìu bơnhă rƀah in, jàu pà 1 rbô thùng dà toh Tập đoàn TH True milk dong kờl ai kơnòm bơsram rƀah 2 xã Đại Lào mờ Liên Đầm in.

Kung tàm poh lài, Mpồl kwang bàng Quôk hội càr Gia Lai neh tìp mat mờ cau tĕ khà tàm 2, 3 tiah gơ wèt ală kơnhoàl Kông Chro, Ia Pa, Mang Yang mờ thị xã Ayun Pa. Ală broă geh sền gròi uă bè khà priă xăng zờu, phan ngui tàm broă lơh sa suơn sre gơguh kas; broă tac phan lơh gơs bơh suơn sre gơtìp kal ke; lơyài lơh sră ngui ù; ai geh broă lơh ai cau tàm ƀòn lơgar in; bơcri priă lam lơh broă lơh bơtơt rbòng dà drơng lơh sa... neh geh cau tĕ khà đơs mờ ală kwang bàng Quôk hội. Mùl màl, ồng Nguyễn Đức Hướng, Phó Củ tịc Hội đồng Ñân zân kơnhoàl Krông Chro geh jơnau dan: Tài gơ rềng bơh uă bơta den tàng khà priă xăng zờu, phan ngui tàm broă lơh sa suơn sre tàm drà kă bro tàm khà dà jơnhua ngan, lơh gơ rềng uă ngan tus rài kis lơh sa bơh làng bol dê. Dan Quôk hội, Cíñ phủ sền sơ wì, geh broă lơh gàr kơ̆ kơljap khà priă, tam gơl khà priă xăng zờu, phan ngui tàm broă lơh sa suơn sre tàm tơngai tus nàng kờñ lơh gơlik bơta niam nàng làng bol in geh bơta ƀuơn bơtàu tơnguh lơh sa, ngan là tàm ală xã tiah sar lơgar ngài bơh kơnhoàl dê.

Tàm kơnhoàl Mang Yang, cau tĕ khà dan Quôk hội geh broă lơh tơnguh broă tac phan lơh gơs bơh suơn sre ai làng bol in, ngan là ală phan tờm ngan bơh kơnhoàl dê, pleh bơta “tơnhàu geh uă mơya tac ờ yòm, tac yòm den tơnhàu ờ geh” bè ală nam lài. Bơdìh hơ̆ tai, cau tĕ khà đơs là, ală broă bè ù tiah, phan bơna gùng lòt, broă lơh atbồ bơt bơtàu gam uă bơta ờ niam; khà priă phơng sih gơguh jơnhua tàm tŭ bơta phơng sih ờ ngan ờ hềt geh kơryan jơh lơh gơ rềng uă ngan tus broă lơh sa bơh làng bol dê.

Cau mblàng K’Duẩn