VOV4.K’ho- Ủy ƀan Thường vụ Quôk hội neh lơh nền bơyai lơh pơrjum dơ̆ 3, Quôk hội khóa 15 mut lơh tàm ngai 23/5 do mờ kờp dŭ tơn jơh tàm ngai 17/6 tus do. Tơngai lài, Mpồl kwang bàng Quôk hội ală càr tàm tiah Tây Nguyên neh geh uă dơ̆ tìp mat cau tĕ khà nàng cih dờp ală jơnau đơs, jơnau dan pơyua tus pơrjum dơ̆ 3 bơh Quôk hội dê.

Lồi nhai 4 pa do, ồng Phan Đình Trạc, Ủy viên Ƀộ Cíñ trị, Ƀí thư Đảng dà lơgar, Kwang atbồ Ƀan Nội cíñ dà lơgar bal mờ Mpồl kwang bàng Quôk hội càr Lâm Đồng neh geh dơ̆ tìp mat cau tĕ khà tàm xã Ka Đô, kơnhoàl Đơn Dương. Tàm do, cau tĕ khà geh jơnau sồr ai tơlik mờ jơnau dan pơyua tus Mpồl kwang bàng Quôk hội càr Lâm Đồng uă broă kal ke, ờ niam kờñ geh càr, kơnhoàl mờ dà lơgar sền gròi tă bơsong.

Ồng Phan Đình Trạc tìp mat cau tĕ khà tàm kơnhoàl Đơn Dương, càr Lâm Đồng

Broă geh làng bol cau tĕ khà sền gròi uă ngan rlau jơh là khà priă gơguh kas ngan. Tàm hơ̆ khà priă phan ngui drơng broă lơh sa suơn sre gơguh nisơna, tàm tŭ broă tac phan lơh gơs den ờ kơ̆ kơljap, lơh broă lơh sa tàm tiah tam uă biap gơtìp uă kal ke. Cau tĕ khà Phan Tùng Châu ơm tàm thôn Nghĩa Hiệp 2, xã Ka Đô đơs: “Tŭ do, phan ngui drơng broă lơh sa suơn sre tac jơnhua ir, pơn yơu dùl ƀàu phơng tac tus 1 tơlak 350 rbô đông, lài hơ̆ mìng tac 950 rbô đông tàm dùl ƀàu, tàm tŭ biap ală bơta tàm do den tac ndrờm geh khà priă lơyah, anih blơi ờ kơ̆ kơljap. Dan kâp hơđang lơh bè lơi nàng phan bơna tàm do geh kơ̆ kơljap khà priă nàng làng bol bol hi ờ huan kal ke”.

Tàm dơ̆ tìp mat, ala mat mpồl kwang bàng Quôk hội càr Lâm Đồng, ồng Phan Đình Trạc, Kwang atbồ Ƀan Nội cíñ dà lơgar cih dờp ală jơnau đơs, jơnau dan bơh làng bol cau tĕ khà dê. Mpồl kwang bàng Quôk hội càr geh tơrgùm jơh, pơyua tus ală anih lơh broă geh gơnoar sồr bơsong, mìng is ală broă bơdìh mờ gơnoar bơsong he dê den Mpồl geh yal Quôk hội in tàm dơ̆ pơrjum mờr tus: “Jơh ală broă lơh mpồl bơtiàn tàm kơnhoàl, càr, xã, thôn, ƀòn ndrờm tài bơh jơnau kờñ drơng làng bol in mờ ai làng bol in dờp kuơ. Kơp kờñ làng bol git mờ tam pà kal ke mờ ală kâp gơnoar atbồ. Đơs bal là ală jơnau đơs do là đơs tus bơta lơh bal đah gơnoar atbồ mờ làng bol tàm broă lam lơh jat. Añ sồr kwang đơng lam bồ kơnhoàl, càr mờ xã kờp sền wơl broă rơndap lơh he dê bè lơi, lơh bè lơi gơ in dipal mờ ƀuơn ƀuài ai làng bol in rlau tai”.

Cau tĕ khà Dăk Lăk dan uă tơngume pơyua tus pơrjum dơ̆ 3

Lồi nhai 4 pa do, Mpồl kwang bàng Quôk hội càr Dăk Lăk kung neh bơyai lơh pơrjum tìp mat cau tĕ khà lài mờ pơrjum dơ̆ 3, Quôk hội khóa 15. Tàm ală anih tìp mat, cau tĕ khà càr Dăk Lăk ndrờm dan Quôk hội, Cíñ phủ pal pơn jat tai sơlơ tơnguh broă lam lơh geh cồng nha ală broă lơh rơcang sơndră kòp Kovid-19, bal mờ bơtàu tơnguh wơl mờ bơtàu tơnguh lơh sa- mpồl bơtiàn tàm càr; geh broă lơh kràñ rlau nàng gàr kơ̆ kơljap khà priă, gàr kơ̆ drà kă bro mờ dong kờl tă bơsong kal ke ai broă lơh sa, kă bro bơh Mpồl lơh sa kă bro mờ làng bol dê in.

Kơlôi rơcang bè broă khà priă ù gơguh jơnhua nisơna, lơh gơlik bơta tac bro uă ù tàm tơngai lài tà, ală tiah geh đơs là geh lam lơh ală rơndap broă lơh dờng tàm ƀòn dờng Buôn Ma Thuột mờ ală kơnhoàl rềp bal, cau tĕ khà Bùi Minh Bảo, ơm tàm thôn 2A, xã Ea Mnang, kơnhoàl Cư Mgar geh jơnau đơs: “Lài ngan là pal yal rơndap ù tiah bơh tơl tiah dê, gàr niam lơngap lơngai kung bè bơta sền sơ wì bơh làng bol dê nàng kờñ pleh bơta yal jơnau tơngit ờ ngan, ờ di rơndap ù tiah bơh ală anih lơh broă geh gơnoar dê. Bè jơnau kờñ ngan ngồn, làng bol kờñ lơh sa suơn sre mơya ală cau bơcri priă den khi ngui uă ngan là ù gời. Cau ngan ngồn kờñ ù den ờ geh, ai cau ờ ngan ngồn kờñ ù den blơi ù uă ngan, lơh gơbàn hoàc huơr bơta kuơ dờng ngan. Den tàng dan ală anih lơh broă geh gơnoar geh 2, 3 broă lơh nàng kờñ kơryan bơta blơi prap ù tŭ do nàng gàr niam lơngap lơngai bơh càr mờ dà lơgar dê in”.

Tàm pơrjum, ală cau tĕ khà neh sền gròi mờ dan uă tơngume gơ rềng tus bơtàu tơnguh wơl mờ bơtàu tơnguh lơh sa mpồl bơtiàn; ai tơlik ală broă lơh kràñ rlau tai nàng gàr kơ̆ kơljap khà priă, gàr kơ̆ drà kă bro mờ dong kờl tă bơsong kal ke ai broă lơh sa, kă bro bơh mpồl lơh sa kă bro mờ làng bol dê in tơnơ̆ gơ rềng bơh kòp Kovid-19 dê. Cau tĕ khà Lê Văn Lập ơm tàm thôn 3, xã Ea Mnang, kơnhoàl Cư Mgar dan: “Broă gơlik geh bơh kòp Kovid-19 mờ tơnơ̆ kòp Kovid-19 den rài kis làng bol dê gơtìp uă ngankal ke. Bơdìh hơ̆ tai, kal ke gơ tàm rơndap rơn dồl bal mờ khà priă phan lơh broă gơguh jơnhua den hơ̆ kung là 1 bơta kơn jơ̆ dờng ngan làng bol in. Dơ̆ 3 là khà priă phan lơh gơs bơh suơn sre den ờ tơl nàng tơm priă tă lơh. Dan mờ kâp hơđang geh broă lơh bè lơi nàng bơtàu tơnguh wơl làng bol in. Ngân hàng kung geh broă lơh dong kờl làng bol, ai làng bol in càn priă ƀuơn rlau nàng làng bol in pơn jat tai brồ guh tàm rài kis”.

Bơdìh hơ̆ tai, cau tĕ khà càr Dăk Lăk kung dan ală kâp, ală gah broă lơh pal pơn jat tai ai lài bơta niam bè broă lơh, càn priă bơtàu tơnguh lơh sa ai cau lơh broă tàm càr in; sền gròi bơcri priă, lơh niam ală gơl gùng lòt tàm tiah drà mờ ală xã tài tŭ do ờ uă gơl gùng neh gơbàn ờ diơng kơn jơ̆ ngan; pal sền sơ wì cồng nha broă lam lơh ală broă lơh bơtàu tơnguh lơh sa- mpồl bơtiàn tàm càr, kuơmàng là tàm tiah jơi bơtiàn kòn cau dùl êt nă cau; sền sơ wì, jat sền ală bơnah priă bơcri dà lơgar mờ broă lơh cok khà priă phan bơna, măi mok lơh sơnơm mờ bơto bơsram.

Cau mblàng K’Duẩn