VOV4.K’ho- Tàm Hà Nội pa geh lơh Cribơyai broă lơh dà lơgar gơ wèt tus mờ ơruh pơnu mờ tơngume “Bơto bơtê broă lơh ai ơruh pơnu in”. Cribơyai nàng sền sơ wì bơta geh ngan, ai tơlik bơnàng jă ngan ngồn ai Ủy ƀan mờ ală anih lơh broă bơh Quôk hội dê in dan mờ Quôk hội, Cíñ phủ geh ală broă lơh bơto bơtê broă lơh ai ơruh pơnu in di mờ tŭ tơngai pa. Đơs tàm cribơyai, Phó Củ tịc Thường trựk Quôk hội ồng Trần Thanh Mẫn sồr: bơh jơnau sồr geh ai tơlik bơh ơruh pơnu dê, ală anih lơh broă kơlôi sơnơng, dan mờ Quôk hội, Cíñ phủ ai tơlik ală broă lơh di tŭ tă bơsong kal ke, ală broă lơh dong kờl pa nàng chồl pràn bơto bơtê broă lơh ai ơruh pơnu in, gơ jat bal mờ broă lơh bơtàu tơnguh wơl mờ bơtàu tơnguh lơh sa- mpồl bơtiàn bơh dà lơgar dê.

Tàm cribơyai, ơruh pơnu đơs bơta kơp kờñ, jơnau dan tus mờ ală anih lơh broă dà lơgar bè broă bơto bơtê broă lơh ai ơruh pơnu in. Bơh hơ̆ dong anih lơh broă geh gơnoar git mờ bơsong, pơgồp bơnah tơnguh jơnau git wă bơh ơruh pơnu mờ gùt mpồl bơtiàn dê bè broă bơto bơtê broă lơh. Bi Nguyễn Tường Lâm, Ƀí thư Đoàn Ơruh pơnu Kộng sản Hồ Chí Minh dà lơgar pà git, uă mpồl ơruh pơnu ai tơlik ală jơnau đơs bơh bơta geh ngan tàm broă bơto bơtê broă lơh ai ơruh pơnu in, jòi broă lơh geh cồng nha tơnơ̆ tŭ bơto bơtê: “Bol hi rơwah 150 nă ơruh pơnu tàm hơ̆ geh bal mờ ơruh pơnu kờñ jòi broă lơh, ală ơruh pơnu bè ơruh pơnu kông ñân, ơruh pơnu ƀòn lơgar neh rê ling, ơruh pơnu ală tiah, bơdìh hơ̆ tai bol hi geh jà ală cau ngui cau lơh broă, ơruh pơnu sơn đờm mut lơh broă bơt bơtàu rơn rơndap broă lơh ơruh pơnu ai geh broă lơh ai ơruh pơnu ndai in... tŭ do ală bơyô kung neh rơcang lài ală jơnau đơs nàng dan”.

Ală đoàn viên ơruh pơnu kung neh đơs tus ală kal ke, kòl yan tàm bơto bơtê broă lơh mờ jòi broă lơh tơnơ̆ tŭ bơsram ai ơruh pơnu ƀòn lơgar, ơruh pơnu jơi bơtìan kòn cau dùl êt nă cau, ơruh pơny kuet kơlte, ơruh pơnu là cau neh rê ling. Ai tơlik ală broă lơh gơlik bơta ƀươn ai ơruh pơnu in jòi broă lơh mờ geh bơto bơtê broă lơh di mờ pràn jak bơh să tờm dê.

Hơ tơn ală jơnau lùp bơh ơruh pơnu dê bè broă lơh bơto bơtê broă lơh kông nghệ kao, ồng Trương Anh Dũng, kwang atbồ Tổng kụk bơto bơtê broă lơh, gơ wèt Ƀộ Lao động, Thương ƀiñ mờ Xã hội pà git, tŭ do, Ciñ phủ neh rơndap lài bơtàu tơnguh ală hìu bơsram geh bơta niam uă. Kờp dŭ, nam 2025 geh 70 hìu bơsram geh bơta niam uă, 135 gah bơsram broă lơh tờm ngan tàm ală kâp, tàm hơ̆ tơrgùm tàm ală gah broă lơh geh gơ rềng tus kông nghệ kao. Pa do, Ƀộ neh tă pơgồp jơnau đơs, Cíñ phủ neh ai gơnoar jàu ală Broă lơh bơto bơtê bơh ală lơgar bơtàu tơnguh dê nàng bơto bơtê, ai ƀằng ndrờm bal. Tŭ do gam lam lơh 12 broă lơh tơrlòng lài bơh Australia dê, mờ 25 broă lơh tơrlòng lài bơh lơgar Đức dê. Cíñ phủ mờ Thủ tướng Cíñ phủ neh geh broă lơh ai tơlik lài mờ pơlam bơsram broă lơh ai kơ nòm bơsram, cau bơsram dờng in tơnơ̆ tŭ jơh bơsram ală kâp bơsram. Tŭ do neh geh ứng zụng rơ wah hìu bơsram, rơ wah gah broă lơh mờ hìu bơsram bơto bơtê, pơlam, geh clip pơlam gah broă lơh ngan ngồn: “Jơnau sồr gơ wèt mờ gah broă lơh geh jơnau kờñ uă ală hìu bơsram bơtê broă lơh gơtùi bơt bơtàu rơndap broă, ai gơnoar bơto bơtê tơrlòng lài. Bơdìh hơ̆ tai, Cíñ phủ pa ring bal rơndap broă bè tam gơl sồ tàm bơto bơtê broă lơh, 4 jơnau kờñ ai tơlik tàm rơndap broă geh lam lơh tàm tơngai tus gơ rềng tus broă rơcang lài bơta chài sồ, bơt bơtàu phan bơna bơsram, bơt bơtàu sră nggal bơsram”.

Pơrjum ƀău lài mờ tŭ bơyai lơh cribơyai broă lơh dà lơgar bè ơruh pơnu Việt Nam

Bơh ală jơnau dan, jơnau đơs ai tơlik bơh ơruh pơnu dê tàm criơyai, Phó Củ tịk Thường trựk Quôk hội ồng Trần Thanh Mẫn sồr ală anih lơh broă bơh Quôk hội, Cíñ phủ, ală ƀộ, gah broă lơh dà lơgar, kâp hơ đơm kơlôi sơ nơng mờ geh ală broă lơh geh cồng nha, lơh ală jơnau bơceh, jơnau đơs gơ gơs broă lơh ngan ngồn nàng tơnguh bơta niam mpồl cau lơh broă, tơnguh cồng nha lơh broă, chồl pràn gơguh lơh sa, tơnguh pràn jak tàm pơrlòng dà lơgar. Ồng Trần Thanh Mẫn sồr: “Ủy ƀan Niam chài, bơto bơsram bơh Quôk hội dê, Ƀộ Lao động - Thương ƀiñ mờ Xã hội mờ Ủy ƀan dà lơgar bè ơruh pơnu Việt Nam pơn jat tai lam lơh niam mờ gròi sền broă lam lơh bè bơto bơtê broă lơh ai ơruh pơnu in; mờ kung kơlôi sơ nơng, ai tơlik jơnau đơs, jơnau dan tus mờ Quôk hội, Cíñ phủ ai tơlik ală broă lơh di tŭ bơsong kal ke, ală broă lơh pa nàng chồl pràn bơto bơtê broă lơh ai ơruh pơnu in, gơ jat bal mờ broă lơh bơtàu tơnguh wơl mờ bơtàu tơnguh lơh sa- mpồl bơtìan bơh dà lơgar dê””.

Tàm cribơyai, Phó Thủ tướng ồngVũ Đức Đam đơs nền, ala mat Ƀộ Lao động neh hơ tơn ală jơnau lùp bơh ơruh pơnu dê, mơya Ƀộ pal pơgồp bal mờ ală gah geh gơ rềng cribơyai gùng dà lam lơh ală broă lơh tàm bơta ngan ngồn. Phó Thủ tướng đơs là, gơ wèt mờ ơruh pơnu, bơdìh mờ ală bơta chài broă lơh den pal bơto bơtê tai bơta chài ndai nàng ơruh pơnu in gơtùi tus bal tă pơgồp ai mpồl bơtìan in uă rlau tai.

Cau mblàng K’Duẩn