VOV4.K’ho- Rài tam lơh neh lòt ngai ngan, dà lơgar neh ring lơngai, mơya ală cau ling bơh Mpồl ling klàng làng bol Việt Nam dê ờ hềt ngai lơi ơm rlô. Kơnòl broă sền gàr gơnoar tờm bồt bơlào dà lềng, tiah ù gờl tàm dà lềng dờng màng bơh Dà lơgar dê, gàr kơ̆ kơljap tiah ơm kis ring lơngai kơ̆ kơljap ơn tàm pơnì cau ling dà lềng dê kơnòl dờng màng ngan tềng đap Đảng, tềng đap Dà lơgar mờ làng bol. Bơta phi să bơh ală cau kòn jak chài ngan huĭ tĕ să tờm, chơ̆t phi să tài bơh dà lơgar geh rơnàng tŭ do dê sùm bơto tơngkah bal mờ gơ̆p mờ nùs nhơm ki ngàm ngan. Ală cau ling cơn đoà lòt jat jơng lòt bơh rài bèp rài bi dê sùm pơnđơl pràn lơh ngan, pơlam tàp, rcang lài tam lơh, phi să nàng sền gàr kơ̆ kơljap tơl “pèt ù tàm bồt bơlào pèt tiah tàm dà lềng” bơh Dà lơgar dê tiah nhàr lơgar tàm dà lềng bềng càl rơbŭt dờng lơm.

Tàm ù tiah dờng ơning ơnàng bơh dà lềng dê, jơnau ntas tiang liang bơh hìu yàng Phờk Sinh Tồn dê mpong mờ bơta ƀô thồm kơl hô dê, tàm bơrlŭ bal mờ nsừc dà lềng gơ rơya, bơta nggrồr bơh càl tàm dà lềng dê. Jơh ală bơta hơ̆ lơh ngoh rơngăc, mờ nùs nhơm ki ngàm ngan, gĭt ưn ngài ờ gĭt lơh, ling klàng mờ làng bol bồt Sinh Tồn chu ñàng kah kơlôi ală cau ling dà lền g khin cha jak chài sùm sùm ơm bĭc wơl tàm dà lềng jrô- tiah jơng trồ dê... Ơm tềng đap Anih cih mat 64 nă cau ling khin cha jak chài chơ̆t màng, chơ̆t phi să tàm dơ̆ sền gàr gơnoar tờm bồt bơlào dà lềng tàm tiah dà lềng Gạc Ma, bi Lữ Thị Kim Cúc, làng bol tàm xã bồt Sinh Tồn ngoh rơngăc đơs: Tŭ tus chu ñàng ai ală cau linh chơ̆t màng chơ̆t phi să tàm Gạc Ma in, să tờm añ gơ lơh ngoh rơngăc ngan. Pơn iờ să ngan bè ală bi. Kơ̆p kờñ hwềng soàn ală bi dê geh ai bơta lơngai ai tơl nă cau in tàm bồt do kis pràn kơl dang mờ mìu càl niam nàng tơl nă cau in iang nùs lơh broă, ơm kis tàm xã bồt do.

Trung tá Đinh Cao Toan, Kwang bàng bồt Sinh Tồn pà gĭt: Dơ̆ tơngkah ală cau ling chơ̆t màng sền gàr bồt Gạc Ma là dơ̆ nàng bơto bơtê bơhiàn kăc màng, nàng ling klàng làng bol tàm bồt in wă rlau tai bè ală cồng nha mờ bơta chơ̆t phi să bơh rơnàng lòt lài dê, tơngŏ nùs nhơm gĭt ưn ngài gơwèt mờ ală rơnàng rài bèp bi dê neh ờ pơlai ntìng mhàm he dê nàng sền gàr bồt bơlào dà lềng. Bơh hơ̆, tơl nă kwang bàng, cau ling bồt dê lơh ngan tàm pơrlòng, pơnđơl pràn lơh sir jak ngan tơl kơnòl broă geh jàu. Trung tá Đinh Cao Toan đơs: Kah rơngal bơta chơ̆t phi să bơh 64 nă cau ling khin cha jak chài chơ̆t màng chơ̆t phi să tàm Gạc Ma, bơh hơ̆ nàng bơto bơtê bơhiàn nùs nhơm kờñ gơboh dà lơgar mờ nùs nhơm ai ală kwang bàng, cau ling in cơn đoà jơng lòt jat rài rơnàng bèp bi dê tàm broă lơh bơt bơtàu mờ sền gàr dà lơgar, ngan là sền gàr gơnoar tờm bồt bơlào dà lềng.

Jat Cau duh broă Yàng Phờk Thích Tâm Thành, cau drơng gàr hìu Yàng Phờk Sinh Tồn đơs: Ală ngai nhai 7, hìu Yàng Phờk Sinh Tồn- tiah ơn Anih cih mat 64 nă cau ling chơ̆t màng chơ̆t phi să tàm broă lơh sền gàr bồt Gạc Ma geh uă ngan kwang bàng, cau ling, làng bol thị trấn Trường Sa mờ làng bol lơh ka gùt dar bồt tus chu ñàng, răc dan kơ̆p kờñ hwềng soàn bơh ală kwang bàng, cau ling dà lềng jak chài ngan neh chơ̆t phi să mờ nùs nhơm ki ngàm ngan mờ kah rơngal uă ngan rlau jơh. Hìu Yàng Phờk kung neh bơyai lơh hòi dan ai ală cau ling khin cha jak chài chơ̆t màng, phan ơn pơdơng là ală phan bơna bơkào, plai chi geh ling klàng làng bol tàm bồt dê lơh geh. Broă lơh do tơngŏ bơhiàn “Hùc dà kah tô dà”, “Kis gĭt jơnau gĭt adat” bơh jơi bơtiàn Việt Nam dê, kah rơngal ală cau ling khin cha jak chài chơ̆t màng neh chơ̆t phi să tài gơnoar tờm bồt bơlào dà lềng bơh dà lơgar dê, tài bơta tơl làm kơnhoàl ù tiah bơh dà lơgar dê.

Cau duh broă Yàng Phờk Thích Tâm Thành đơs: Tàm dơ̆ chu ñàng, hòi dan, añ sùm jơh nùs hòi dan ală tiah, Yàng Phờk, ală cau ling chơ̆t màng chơ̆t phi să tàm  dà lềng bồt Trường Sa ai lơngap lơngai ai kwang bàng, oh mi cau ling, làng bol tàm do in kis chờ hờp, lơngap lơngai, kòp jê geh bời, ờ gơtìp rềs àr, geh uă pràn kơl dang să jan nàng sền gàr dà lềng bồt Trường Sa in geh bơta lơngap lơngai mờ bơtoah bơtoài.

Broă Gạc Ma tàm drim gờñ ngai 14/3/1988 neh gơmut tàm rài kah yau jơi bơtiàn dê bè là dùl jơnau lơh tềl ờ tŭ lơi roh tàm nùs nhơm tơl nă làng bol Việt Nam dê. 64 nă  ling dà lềng bềng nùs nhơm jơh nùs mờ bơta pràn rơnàng kơnòm să dê neh ơm bĭc wơl tàm dà lềng, mơ nùs nhờm kơ̆ dơn bơh ală bi dê neh gơ gơs là anih kơ̆ kơljap ờ tŭ lơi roh bè nùs nhơm cau ling khin cha jak chài chơ̆t màng kăc màng dê, bơto tơngkah ală rơnàng tơnơ̆ do in bè nùs nhơm lơh ngan phi să nàng sền gàr gơnoar tờm bồt bơlào dà lềng bơh Dà lơgar dê. Nùs nhơm hơ̆ neh gơmut jrô tàm tơl nă cau ling gam lơh kơnòl broă tàm bồt Trường Sa dê tŭ do.

Trung sĩ Nguyễn Quốc Thịnh, cau ling bồt Cô Lin pơn iờ să đơs: Là rơnàng tơnơ̆ do, să tờm añ gơ lơh pơn iờ să ngan bè ală cồng nha dờng màng ngan bơh ală rơnàng rài bèp bi dê neh bơt bơtàu gơs bơhiàn lơh ngan tam lơh jai pha bơh Ling klàng he dê, chờ hờp geh lơh pôs đồng tàm bồt Trường Sa, tiah kwang bàng, cau ling gam ngai mang sơr lèt gan ală bơta kal ke bòl gar, sền gàr kơ̆ kơljap gơnoar tờm bồt bơlào dà lềng bơh Dà lơgar dê. Añ neh sùm lơh ngan bơsram, tơnguh uă nùs nhơm geh kơnòl tàm broă rcang lài tam lơh; sùm lơh ngan pơlam tàp pràn kơldang să jan lơh geh jơnau sồr kơnòl broă dê tàm tiah bồt bơlào dà lềng kal ke ngan do.

Thượng tá Lương Xuân Giáp, Chính uỷ Lữ đoàn 146 (Đoàn Trường Sa), Tiah 4 ling dà lềng đơs ngan: Sền gàr gơnoar tờm bơh dà lơgar dê tàm bồt Trường Sa tơl làm, lơngap lơngai là gơnoar broă bơh cau ling Trường Sa dê rài lơngap lơngai do bơh bol añ dê. Dờng màng ngan mơya kung bòl glar ngan sơl, ngềt ngơ̆t, phi să, ờ mìng geh săp ñŏ mờ geh bal bơta roh rui, jơh bal mờ bơta phi să ntìng mhàm he dê . Den tàng, tơl nă kwang bàng, cau ling Trường Sa bol añ ngai do sùm sùm cih kah, sền gàr kơ̆ kơljap gơnoar tờm bồt bơlào dà lềng bơh dà lơgar dê. Bơt bơtàu bồt bơlào pràn bè rcang sơndră lài, niam bè rài kis, niam bơnĕ bè ù tiah ƀòn lơgar; lam lài lơh krơh bè tam klăc bal ling klàng làng bol, gàr kơ̆ wil tơl Trường Sa, gơnoar tờm dà lơgar dê.

Nàng geh dùl dà lơgar khat gơboh is, lơngap lơngai is, ring lơngai bè ngai do, gĭt nđờ ntìng mhàm bơh rài bèp rài ồng dê neh gơtuh. Rơnàng tơnơ̆ do pơn tai jat cơn đoà jơng lòt jat bơhiàn rài bèp rài ồng dê, rcang lài tam lơh phi să sền gàr tơl pèt ù tàm bồt bơlào pèt tiah tàm dà lềng, ù tiah kềng gah dà lềng dờng màng uă ngan bơh dà lơgar dê tiah nhàr lơgar tàm dà lềng bềng càl bŭt dờng lơm.

Cau mblàng K’Hạnh