VOV4.K’ho- Tơnơ̆ rlau 3 nhai lam lơh jat, tàm càr Kon Tum, Nghị quyết sồ 11 bơh Cíñ phủ dê bè Broă lơh bơtàu tơnguh wơl mờ bơtàu tơnguh lơh sa- mpồl bơtiàn neh lơh geh mơ cồng nha dong làng bol gàr kơ̆ kơljap rài kis, bơtàu tơnguh wơl lơh sa, kă bro tơnơ̆ kòp dờng Kovid-19.  

Rlau 1 nhai do, ồng A Veo, kòn cau Sơdàng, hìu tàm ƀòn Kà Bầy, xã Sa Bình, kơnhoàl Sa Thầy sền gŏ să jan he gơ lơh pràn wơl. Jơh gùt ngai lơh broă tàm mìr, trồ mho rê tàm hìu ồng gam tơ wès nhơt siam 2 nơm kơnrồ pa blơi in tai.

Pơlam lơh sră càn priă jat Nghị quyết sồ 11 bơh Cíñ phủ dê tàm ƀòn lơgar

Ồng A Veo pà git, gam gơtìp kal ke bè priă jền den geh càn 100 tơlak đông bơh bơnah dong kờl broă lơh sa, ai geh broă lơh jat Nghị quyết sồ 11 bơh Cíñ phủ dê. Geh priă, ồng blơi 2 nơm kơnrồ sơntìl jơh 50 tơlak đông, khà priă gam wơl ồng blơi tờm sơntìl, phơng sih nàng ơn suơn chi sa plai in. Gơtùi bơsong kal ke bè priă jền, geh bơta ƀuơn nàng bơtàu tơnguh lơh sa hìu bơnhă, ồng A Veo geh tai bơta pràn nàng bal mờ hìu bơnhă lơh ngan lơh broă, lơh sa: “Ưn ngài ngan Đảng, dà lơgar sền gròi. Gơ wèt mờ hìu bơnhă chờ hờp ngan. Geh càn priă ngân hàng dê nàng ròng kơnrồ, tam chi sa plai, lơh broă lơh sa hìu bơnhă dê sơlơ bơtàu tơnguh rlau”. Gơwèt mờ git nđờ rhiang hìu bơnhă tàm kơnhoàl Sa Thầy, khà priă càn mờ priă cồng lơyah jat Nghị quyết sồ 11 bơh Cíñ phủ dê tus di tŭ ngan neh dong bơsong ală kal ke jal mhar bơh hìu bơnhă dê. Bơh cau atbồ thôn mờ Ƀí thư Ci ƀộ, git geh priă càn drơng broă blơi phan bơna măi mok bơsram sră ai kơnòm bơsram in, hìu bơnhă bi Lương Văn Phúc gơ wèt hìu bơnhă rƀah tàm thôn 1, xã Ya Xier cih mat mờ Mpồl tềm pềr mờ càn priă thôn dê nàng dan càn priă. Bơh khà priă 20 tơlak đông geh càn, bi blơi măi mok bơsram sră ai 2 nă kòn in: “Hìu bơnhă añ là hìu bơnhă rƀah, gơtìp uă ngan kal ke, ngan là tàm tơngai kòp Kovid-19. Dà lơgar geh broă lơh ai càn priă do, añ blơi 2 nơm măi tíñ ƀảng nàng 2 nă kòn in geh tai phan bơsram sră niam rlau. Kơp kờñ 2 nă kòn bơsram jak, gơ gơs cau jak chài nàng tơnơ̆ do dong kờl mè bèp”.

Priă càn jat Nghị quyết sồ 11 bơh Cíñ phủ dê neh ai geh broă lơh rlau 1 rbô 200 nă cau lơh broă bơh càr Kon Tum dê in

Mùl màl tàm càr Kon Tum ai gŏ, Nghị quyết sồ 11 ngai 30/01/2022 bơh Cíñ phủ dê bè Broă lơh bơtàu tơnguh wơl mờ Bơtàu tơnguh lơh sa- mpồl bơtiàn neh mhar geh ai ngui tàm rài kis mờ lơh geh cồng nha. Nàng gơtùi lơh geh bơta do, ală kâp, ală gah broă lơh bơh càr dê neh jal mhar lam lơh jat mờ lơh gơlik ală bơta niam pal geh dong làng bol mhar geh càn priă. Ồng Nguyễn Minh Thuận, Ƀí thư Đảng ủy xã Sa Bình, kơnhoàl Sa Thầy pà git, tơnơ̆ tŭ Nghị quyết sồ 11 geh ai tơlik, Đảng ủy, gơnoar atbồ xã neh pơlam lơh jat tus jơh kwang bàng, đảng viên mờ tus tơl thôn, ƀòn: “Bơh bồ quý 1 tơn, gơnoar atbồ xã neh pơgồp bal mờ Ngân hàng cíñ sác kơnhoàl Sa Thầy kờp sền, tơrgùm jơh, cih mat ală hìu bơnhă gơtìp kal ke tài gơ rềng bơh kòp Kovid-19 nàng dong kờl ai càn priă. Mờ tus tŭ do geh 30 hìu bơnhă càn mờ kung gam lam lơh tă mờr 1 tơmàn 400 tơlak đông. Đảng ủy kung tam pà kơnòl broă ai ală gah broă lơh, mpồl cau in dong kờl làng bol ngui priă càn bè lơi gơ in geh cồng nha jơnhua ngan rlau jơh”.

Là dùl tàm ală mpồl lam lơh jat tơn bơnah priă ai càn geh dong kờl priă cồng jat Nghị quyết sồ 11 bơh Cíñ phủ dê, ồng Nguyễn Văn Trung, Phó Kwang atbồ Ngân hàng Cíñ sác xã hội càr Kon Tum pà git, kờp jơh jơnau kờñ càn priă jat Nghị quyết sồ 11 tàm càr Kon Tum nam 2022 mờ nam 2023 là rlau 1 rbô 200 tơmàn đông, geh 5 broă lơh ai càn priă. Tŭ do, Ngân hàng gam tơnguh mhar broă tă priă càn dơ̆ 1 bơh 3 broă lơh ai càn priă dê mờ kờp jơh khà priă càn 112 tơmàn đông tus tơl mpồl cau geh càn: “Cíñ phủ geh Nghị quyết di tŭ ngan nàng ală mpồl cau in, ngan là ală cau bơh Ngân hàng Cíñ sác xã hội dê drơng lơh. Hìu bơnhă rƀah mờ ală cau geh sră dong kờl bơh dà lơgar khi hoàc huơr uă ngan tàm rlau 2 nam do tài gơ rềng bơh kòp dờng, tŭ do khi geh priă jền do nàng bơtàu tơnguh wơl lơh sa, kă bro, gàr kơ̆ kơljap wơl rài kis”.

Kờp tus ngai 11/5, Ngân hàng Cíñ sác xã hội càr Kon Tum neh tă geh 75 tơmàn 400 tơlak đông, ndrờm 67% priă càn dơ̆ 1 jat Nghị quyết sồ 11 bơh Cíñ phủ dê. Kơnờm geh priă càn do, rlau 1 rbô 200 nă cau lơh broă tàm càr geh broă lơh; mờr 400 nă kơnòm bơsram geh măi tíñ bơsram; 30 hìu bơnhă kwang bàng kông ñân, viên cứk geh càn priă lơh hìu jat Nghị địñ sồ 100 bơh Cíñ phủ dê mờ khà priă 15 tơmàn đông. Kung bơh broă lơh jat Nghị quyết sồ 11 bơh Cíñ phủ dê, Ngân hàng Cíñ sác xã hội càr Kon Tum neh tam gơl tơngai tơm, priă cồng ai càn 320 hìu bơnhă làng bol in mờ kờp jơh khà priă 13 tơmàn đông.

Cau mblàng K’Duẩn