VOV4.K’ho - Lơh jăt broă jào brê ai mpồl hìu, mpồl ƀòn bơh UɃÑZ càr Kon Tum tàm nam 2014, rơlao 200 hìu kis tàm 6 ƀòn, xã Đăk Roong, kơnhoàl Đăk Glei neh dờp sền gàr rơlao 1 rơbô 100 lồ brê. Kơnờm mờ broă lơh jăt nền nòn tàm broă lòt sền gròi, bă brê dờp sền gàr sùm geh gàr niam, tàm hơ̆ geh bal tàm tŭ kòp Kovid-19 gơtờp pràn.

Ƀòn Đăk Bo, xã Đăk Roong geh 38 hìu dờp sền gàr brê, mờ mờr 300 lồ brê gơwèt bă brê 106 xã Đăk Roong bơh nam 2014. Ồng A Chương, Kwang atbồ Mpồl atbồ sền gàr brê ƀòn Đăk Bo yal, bơh tŭ brê geh jào ai mpồl bơtiàn in sền gàr, làng bol neh crơng gơs 12 mpồl sền gròi, bă brê sùm geh gàr niam. Geh bal tàm tŭ kòp Kovid-19 gơtờp pràn, broă lòt sền gròi, sền gàr brê kung gam geh lơh. Broă mus kơl chi brê, sơgràm ù brê ndrờm ờ geh. “Tàm nam pa do kòp Kovid-19 gơtìp kal ke, mơya ală mpồl sền gròi bơyai lơh lòt sền gròi, sền gàr brê kung gam geh lơh. Tơl mpồl den mìng ai 3 nă cau, lòt sền gròi nhai 3 geh 4 dơ̆. Tŭ lòt sền gròi, sền gàr brê den pal lơh jăt ală broă rơcang sơndră mờ kòp jăt broă lơh 5K bè: Pơn chèo, gàr bơta ngài, ờ ai gal ir cau. Di lah geh cau tàm mpồl gơtìp kòp Kovid-19, mpồl geh ai cau ndai lòt ala...”.

Kung ndrờm bal sơl, mpồl atbồ mờ sền gàr brê ƀòn Đăk Wăk, xã Dăk Roong geh 37 nă cau, dờp sền gàr rơlao 250 lồ brê hòn is gơwèt bă brê 211 mờ 108 bơh nam 2014. Ồng A Tùng, cau tàm mpồl atbồ, sền gàr brê mpồl bơtiàn ƀòn Đăk Wăk pà git, ƀòn neh tam pà lơh gơs 12 mpồl, tơl mpồl geh 5 nă cau mờ 1 nă cau sền gròi 2 nă cau lơh jăt broă sền gròi, sền gàr brê.

Tŭ kòp Kovid-19 gơtờp pràn, ală mpồl tam ala bal broă lòt sền gròi, sền gàr brê. Bal mờ broă tơmù khà cau tơl mpồl lòt sền gròi mờ gàr niam bơta ngài, ală mpồl gam ngui điện thoại nàng hòi bal mờ zalo ờ tìp bal tơn nàng rơcang sơndră mờ kòp gơtờp. Kơnờm mờ hơ̆, den tàng broă sền gròi, sền gàr brê geh lơh sùm, broă rơcang sơndră mờ kòp geh gàr niam. “Kòp gơtờp kal ke den bol añ mìng geh ai tơl mpồl 2 nă cau lòt sền gròi mờ gàr niam bơta ngài. Bă brê 211 rềp mờ thị trấn Đăk Glei di gơlan gơtìp cau mus kơl brê kal ke ngan, ƀòn geh ai 1 mpồl 2 nă cau sùm tàm ala bal sền gròi, sền gàr brê; gam tàm bă brê 108 den geh tàm tiah thòng rơlao, ơm bơh đang ƀòn den geh sền gŏ gùt dar, den tàng ƀuơn gŏ cau mus kơl brê, den tàng mìng geh ai 2 nă cau ala bal lòt sền gròi. Bol añ kung neh lơh zalo mpồl, tơngai sền gàr geh pơyoa tơn bal, cau lơi rê den yal nàng cau ndai tus ala sền gàr”.

Xã Đăk Roong, kơnhoàl Đăk Glei geh 6 ƀòn sền gàr rơlao 1 rơbô 100 lồ brê hòn is. Jăt ồng A Thông, Củ tịc UɃÑZ xã Đăk Bo yal, lài mờ tŭ ờ hềt geh gùng dà jào brê ai ƀòn lơgar in atbồ sền gàr den broă mus kơl chi brê ai chi, sơgràm ù brê gơtìp sùm. Tơnơ̆ mờ tŭ brê geh jào làng bol in, bơh ală dơ̆ lam sồr, crơng gơs ală mpồl atbồ, sền gàr brê den bă brê geh sền gàr niam. Bơdìh hơ̆ tai, tŭ tus bal tàm broă lòt sền gròi, sền gàr brê, làng bol geh dờp priă sền gàr tiah kis brê, kơnờm mờ hơ̆ den tàng rài kis làng bol geh tơnguh loh làng, kơnòl sền gàr brê lơh geh cồng nha.

Ồng A Thông pà git, tàm bơta kòp Kovid-19 gơtìp kal ke, uă cau sùm rơwah tàm tŭ do nàng mus kơl chi brê ờ di mờ adăt boh lam, sơgràm ù brê. Tềng đăp mờ bơta mùl màl do, ală mpồl ƀòn sùm geh ală mpồl cau tus bal sền gròi, sền gàr brê. Nàng lơh geh niam tàm broă sền gàr brê kung bè rơcang sơndră mờ kòp gơtờp geh cồng nha, kwang đơng lam UɃÑZ xã neh bơto sồr làng bol tŭ tus bal tàm broă lòt sền gròi, sền gàr brê pal lơh jăt nền nòn ală broă rơcang sơndră mờ kòp Kovid-19 gơtờp kung bè lơh jăt ală rơndăp broă lòt sền, sền gàr brê tàm bơta pa. “Kòp Kovid-19 gam gơtìp kal ke tàm 2 nam pa do, mơya gơwèt mờ ală mpồl sền gròi, atbồ, sền gàr brê tàm ală ƀòn kung gam geh sùm lơh broă. Ală mpồl sùm pơgồp bal mờ Mpồl sền gàr brê tàm kơnhoàl, Mpồl ală gah lơh broă bơ̆t bơtàu rơndăp broă jòi sền tàm ală tiah gơtìp bè broă mus kơl chi brê, sơgràm ù brê. Den tàng, tàm 2 nam pa do tàm xã ờ gơtìp dơ̆ mus kơl brê, sơgràm ù brê lơh mìr lơi kung bè kơl chi brê ờ di mờ adăt boh lam”.

Cau mblàng Ndong Brawl