VOV4.K’ho- Drim ngai 25/7, tàm ƀòn dờng Kon Tum geh lơh Dơ̆ cribơyai tơn đah Mpồl duh broă kơnòm dềt mờ Thường trựk Hội đồng Ñân zân càr Kon Tum dơ̆ 2 nam 2022. Do là broă lơh kuơmàng nàng kơnòm dềt càr dê geh đơs bơta kơp kờñ he dê mờ kung là tŭ nàng Thường trựk Hội đồng Ñân zân càr in kung bè ală kâp gơnoar atbồ ai tơnggŏ bơta gròi sền, sền gàr, iat jơnau đơs bơh kơnòm dềt dê.

Mò Nghe Minh Hồng, Phó Củ tịc Hội đồng Ñân zân càr Kon Tum hơ 2, 3 jơnau lùp mờ ală oh dềt sền gròi

Tàm broă lơh cribơyai, 55 nă kơnòm dềt là cau tàm Mpồl duh broă kơnòm dềt càr mờ kơnhoàl neh pơyua tus Thường trựk Hội đồng Ñân zân càr Kon Tum 19 jơnau lùp bè uă broă mờ ală oh sền gròi bè ngui mạng internet dùl bă ờdo ờdă; bơta lơh aniai bic bài kơnòm dềt; kơp kờñ geh bơto bơtê bơta chài tàm rài kis; blơi phan bơna, măi mok bơto bơtê, bơsram tàm ală hìu bơsram; tơnguh jơnau git wă bơh mè bèp dê tàm broă sền dờng màng gơnoar is kơnòm dềt dê...

Thường trựk Hội đồng Ñân zân, Ủy ƀan Ñân zân càr Kon Tum, ala mat ală sở, gah broă lơh geh gơnoar neh cih dờp, hơ nền nòn, mờ kung mblàng lơh loh, pơlam, bơto bơtê tai ală oh in jơnau git wă bè gah mờ he sền gròi mờ bơta chài bơsong broă gơlik geh tàm rài kis pah ngai.

Cau mblàng K’Duẩn