VOV4.K’ho- Nam bơsram pa neh sơn đờm. Broă lam lơh broă lơh dong kờl lài ai oh kòn làng bol jơi bơtiàn kòn cau dùl êt nă cau in geh Quôk hội sền gròi ngan. Pa do, Củ tịc Quôk hội ồng Vương Đình Huệ neh tus bal dơ̆ sơn đờm ai ngui Hìu bơsram kâp 3 Kỳ Sơn, càr Nghệ An mờ sơn đờm mut nam bơsram pa 2022- 2023. Củ tịc Quôk hội đơs nền, gròi sền, bơto bơtê niam ală oh in là bơnàng jă kuơmàng ngan rlau jơh, là bơta tờm nàng wèt tus tơnơ̆ do, dong kòn bơnus lik bơh bơta rƀah lơ ời, bơr ngơl gơla, nàng geh rài kis hờm ram, khat gơboh, chờ hờp.

Kỳ Sơn là kơnhoàl tiah nhàr dà lơgar, tiah kơh bơnơm, tiah jơi bơtiàn kòn cau dùl êt nă cau, gơwèt 1 tàm 74 kơnhoàl kal ke ngan rlau jơh gùt lơgar dê. Hìu bơsram kâp 3 Kỳ Sơn geh crơng gơs nam 1967 là hìu bơsram kâp 3 mìng dùl lơm bơh kơnhoàl Kỳ Sơn dê bal mờ rlau 95% là oh kòn làng bol jơi bơtiàn kòn cau dùl êt nă cau tus bơh 21 xã, thị trấn tàm kơnhoàl. Gơl gùng lòt tus hìu bơsram bơh ală oh dê pal lòt gan brê bơnơm, tiă dà croh ngòt rơngơt ngan, ngan là tàm kàl mìu tŭ dà kŏ dà cò, càl rbut dờng, tơrlah ù sùm gơlik geh.

Củ tịc Quôk hội ồng Vương Đình Huệ tus bal dơ̆ sơn đờm mut nam bơsram pa tàm càr Nghệ An

Lài mờ tŭ lơh hìu bơsram pa, phan bơna bơh hìu bơsram dê neh gơbàn ờ diơng kơn jơ̆ ngan, ờ geh hìu ơm wơl ai kơnòm bơsram mờ cau pơgru in, jơh ală kơnòm bơsram pal kơlôi rơcang is bè anih ơm, sàu sa, rài kis nàng lòt bơsram. Hìu bơsram kâp 3 Kỳ Sơn geh lơh pa bal mờ broă bơceh lơh pa ngan, jak chài, tơl khà dà lơgar drơng broă bơsram ai 2 rbô nă kơnòm bơsram in mờ kờp jơh geh 245 ơdŭ bơsram.

Đơs tàm dơ̆ bơyai lơh, Củ tịc Quôk hội ồng Vương Đình Huệ đơs wơl bồ tơngoh bơh Củ tịc Hồ Chí Minh dê bè bơto bơtê mờ bơsram, mờ kung đơs nền, Đảng mờ dà lơgar he sùm sền dờng màng broă bơto bơtê mờ bơsram, sền do là broă lơh dà lơgar lài ngan; sùm lời ai ală bơta niam ngan rlau jơh nàng gròi sền ai broă lơh bơto bơsram in, gàr jơh ală kơnòm bơsram, bulah tàm tiah ring halà tiah kơh bơnơm, tiah nhàr dà lơgar, bồt dà lềng, cau lơi kung geh bơsram, geh bơto bơtê ndrờm bal: “Bơtàu tơnguh bơto bơtê mờ bơsram, gàr ring bal tàm bơto bơsram, nàng ờ cau lơi gơtìp lời wơl hờ ngkời, ngan là làng bol kòn cau tiah sar lơgar ngài, tiah kal ke, làng bol jơi bơtiàn kòn cau dùl êt nă cau den pal sơlơ geh gròi sền, dong kờl nàng tơrmù ƀà kal ke, hời rơhời bơtàu tơnguh thàn mờ tiah ring là gùng dà đơng lam dờng mờ đơng lam sùm bơh Đảng, dà lơgar he dê. Ƀan Cấp hàñ Đảng dà lơgar neh tơlik Nghị quyết sồ 29 bè tam gơl pa kuơmàng, tơl làm broă bơto bơtê mờ bơsram. Quôk hội neh tơrgùm lơh gơs kơrnuat boh lam ală gùng dà bơh Đảng dê, lơh sir mờ ai tơlik uă broă lơh, adat boh lam nàng bơtàu tơnguh bơto bơsram, ngan là Nghị quyết sồ 88 bè tam gơl pa broă lơh, sră măi bơto bơtê 3 kâp. Gròi sền, bơto bơtê niam ală oh in là bơnàng jă kuơmàng ngan rlau jơh, là bơta tờm nàng wèt tus tơnơ̆ do, tơngklàs kòn bơnus lik bơh bơta rƀah lơ ời, bơr ngơl gơla nàng geh rài kis hờm ram, khat gơboh, chờ hờp”.

Củ tịc Quôk hội ồng Vương Đình Huệ jañ sơnggơr sơn đờm mut nam bơsram pa

Bè hơ̆ den tàng, Củ tịc Quôk hội ồng Vương Đình Huệ kơp kờñ, ală cau pơgru geh là krơh àng bè nùs nhơm, niam chài boh bơr, jơh nùs geh kơnòl mờ broă lơh, jơh nùs kờñ gơboh, bơto bơtê jơh nùs; ờ mìng bơto bơtê jơnau git wă mờ gam là cau mblàng wơl bơta kờñ gơboh, bơta pràn pơn jờng nàng ală oh in kờñ bơsram sră, jòi git ală bơta pa bơh bồ tơngoh git wă mờ jak chài dê.

Củ tịc Quôk hội ồng Vương Đình Huệ kơp kờñ mờ pin dờn, ală kơnòm bơsram geh gàr niam bơhiàn bơsram jak bơh làng bol ƀòn Nghệ dê, lơh ngan pơn đơl pràn, bơsram tryăng tryồng, song dơpă, lơh ngan uă; bơsram lài ngan ai să tờm he in, nàng git, nàng lơh, nàng ơm kis bal, nàng đơs nền is; bơsram nàng rơcang he in phan bơna niam ngan rlau jơh nàng tơnơ̆ do sơn đờm mut lơh broă, tă pơgồp ai ƀòn tờm, dà lơgar in. Củ tịc Quôk hội sồr kâp ủy, gơnoar atbồ mờ gah bơto bơsram sền gròi đơng lam bơt bơtàu niam chài hìu bơsram, nàng tơl hìu bơsram ờ mìng geh broă bơto bơsram lơh krơh lài, pơgru là pơgru, kơnòm bơsram là kơnòm bơsram, hìu bơsram là hìu bơsram, ơdŭ là ơdŭ mờ gam là anih niam chài, bơhiàn chài rơgơi niam ngan bơh càr dê, bơh jơi bơtiàn dê geh ròng siam, bơt bơtàu, bơtàu tơnguh, dờng pràn tàm huềng nùs, tàm bồ tơngoh, tàm jơnau git wă bơh tơl nă kơnòm bơsram mờ jơh bal gùt hìu bơsram dê.

Hìu bơsram kâp 3 Kỳ Sơn pal là broă lơh lài bơh càr dê tàm broă bơt bơtàu niam chài hìu bơsram pơgồp bal mờ tam gơl pa, tơnguh cồng nha bơto bơtê mờ bơsram. Mờ kung tơrgùm bơt bơtàu mờ lam lơh lài broă lơh Hìu bơsram kâp 3 kòn cau ơm ngai pa gơ jat bal mờ bơt bơtàu bơta kuơ niam chài hìu bơsram cèng bơta niam krơi is bơh tiah kơh bơnơm Kỳ Sơn dê.

Củ tịc Quôk hội pà git, nam 2022- 2023 là nam sơn rờp lam lơh jat Nghị quyết sồ 88 bè tam gơl broă lơh, sră măi, broă bơto bơsram mờ sền sơ wì jat broă lơh bơto bơsram 3 kâp nam 2018 gơ wèt mờ ơdŭ 10. Ủy ƀan Thường vụ Quôk hội geh lam lơh jat sền bè broă lam lơh tam gơl pa broă lơh, sră măi 3 kâp tàm nam 2023 nàng di tŭ kờp sền, tă bơsong ală kòl yan, gàr niam ală jơnau kờñ bơh Đảng mờ Quôk hội dê ai tơlik geh lam lơh jat tơl làm, geh cồng nha.

Cau mblàng K’Duẩn