VOV4.K’ho- Mho ngai 08/8, tàm hìu lơh broă Quôk hội, Củ tịc Quôk hội ồng Vương Đình Huệ đơng lam dơ̆ lơh broă bơh Kwang đơng lam bồ Quôk hội dê mờ Ƀộ Tài nguyên mờ Môi trường bè broă tam gơl, bơtơl Adat Ù tiah. Yal tàm dơ̆ lơh broă, Ƀộ trưởng Ƀộ Tài nguyên mờ Môi trường ồng Trần Hồng Hà pà git, jơnau rơcang cih tam gơl Adat Ù tiah gam ai jơnau đơs ală cau kong gơ rềng geh bơt bơtàu jat bơnàng jă lơh jat Nghị quyết sồ 18, ală Nghị quyết, jơnau pơn dut ndai nàng tam gơl gơs kơrnuat boh lam tơl làm, di tŭ ală gùng dà, nùs nhơm bơh Đảng dê bè atbồ mờ ngui ù tiah; gàr niam bơta tàm pơ dờn, kơ̆ kơljap bơh ală adat boh lam dê.

Tàm tŭ bơt bơtàu rơndap lơh adat boh lam, Ƀộ Tài nguyên mờ Môi trường kung neh rơcang lài kờp sền rlau 100 adat boh lam geh gơ rềng tus gah ù tiah nàng ai tơlik jơnau sồr tam gơl tàm adat do halà ai tơlik jơnau sồr tam gơl ală Adat geh gơ rềng nàng kờñ gàr niam bơta ring bal, ndrờm bal bơh ală adat boh lam dê jat di nùs nhơm bơh Nghị quyết sồ 18 dê. Tơnơ̆ tŭ iat ală jơnau đơs cribơyai, Củ tịc Quôk hội ồng Vương Đình Huệ đơs nền: Rơndap lơh Adat Ù tiah (tam gơl) geh Quôk hội ai jơnau đơs dơ̆ sơn rờp tàm pơrjum dơ̆ 4, Quôk hội khoă 15 mờ kờp dŭ sền sơ wì ring bal jat broă rơndap lơh 3 dơ̆ pơrjum, lơh ngan tàm nam 2023 lơh gơs broă tam gơl Adat Ù tiah. Củ tịc Quôk hội ồng Vương Đình Huệ sồr, Cíñ phủ yal sră nggal Rơndap lơh Adat boh lam tus ală anih lơh broă bơh Quôk hội dê lài mờ ngai 01/9 tus nàng kơlôi sơnơng, ai jơnau đơs tàm dơ̆ pơrjum Ủy ƀan Thường vụ Quôk hội dê.

Cau mblàng K’Duẩn