VOV4.K’ho- Mho ngai 12/08, tàm Hìu lơh broă Quôk hội geh bơyai lơh pơrjum lùp lăp jơnau đơs kwang bàng jak chài dê bè rơndap rcang cih Adat kham kòp, sơm kòp (tam gơl) bơh Viện kơlôi sơnơng lơh adat mờ Ủy ƀan Mpồl bơtiàn bơh Quôk hội dê đơng lam. Củ tịc Quôk hội ồng Vương Đình Huệ tus bal pơrjum.

Đơs tàm dơ̆ pơrjum, Củ tịc Quôk hội ồng Vương Đình Huệ đơs sùm, Adat kham kòp, sơm kòp (tam gơl) là dùl rơndap broă lơh adat kwơ màng ngan rlau jơh. Do kung là dùl rơndap broă lơh adat kal ke, ngan là tàm bơta bè tŭ do, tơnơ̆ tŭ gơrềng kơn jơ̆ kơn jŭt ngan tài bơh kòp Kovid-19. Tàm dơ̆ pơrjum, ală kwang bàng jak chài, cau khoa họk, neh cribơyai tă pơgồp jơnau đơs bè lơh sir ală jơnau cih bè giă drơng broă ala kham sơm kòp; gah lơh sơnơm geh mpồl bơtiàn lơh bal; lơh broă bal dà lơgar mờ cau dùl nă să is tàm gah lơh sơnơm mờ bàr pe tơngume ndai bơh rơndap rcang cih Adat kham kòp, sơm kòp (tam gơl); bơta pràn bơcri priă ai broă lơh kham kòp, sơm kòp mờ mpồl bơtiàn lơh bal. Ală kwang bàng đơs là, ală adat boh lam bè lơh sơnơm kờñ geh jơh bal jơnau đơs mờ bơta geh ngan, sền gàr kơrnoat priă jền kờñ pal lơh loh làng song dơpă, gàr niam bơta niam nùs bơh làng bol dê, do là bơta kwơ màng ngan rlau jơh tàm broă lơh sền gàr rài kis mpồl bơtiàn dê.

Cau mblàng K’Hạnh