VOV4.K’ho- Tàm 2 ngai (29- 30/09), Mpồl Cau ling yau càr Dăk Lăk bơyai lơh Pơrjum dờng cau ala măt dơ̆ 7, tơngai lơh broă bơh nam 2022- 2027. Bơta pơnrơ ngan bơh broă lơh mpồl dê tàm tơngai lơh broă pa do là neh hòi jà tă pơgồp jơh ală bơta pràn nàng dong kờl rlau 1 rbô 700 hìu bơnhă cau ling yau klàs bơh rƀah, brồ guh bơtàu tơnguh lơh sa. Là mpồl geh pin dờn jàu kơnòl càn priă dong kờl priă cồng bơh dà lơgar dê, ală kâp Mpồl cau ling yau tàm càr gam ătbồ mờr 30 rbô hìu bơnhă càn priă mờ kờp jơh priă gam dồs rlau 1 rbô 100 tơmàn đong, lơh geh broă lơh ai gĭt nđờ rbô nă cau lơh broă, cau tàm mpồl mờ oh kòn in; tă pơgồp priă lơh geh kes priă tàm dơlam is geh mờr 92 tơmàn đong, sền gròi ngui mờ rề ơnàng lơh uă ală broă lơh cau ling yau lơh sa jak, lơh sa kă bro lơh geh cồng nha.

Tàm 5 nam do geh 1 rbô 753 hìu bơnhă cau ling yau tàm Dăk Lăk lơh ngan brồ guh klàs bơh rƀah

Tàm tơngai lơh broă pa, mờ jơnau đơs “Dòn song, Tam klăc, Lơh krơh, Tam gơl pa”, Mpồl cau ling yau càr Dăk Lăk geh jơnau kờñ pah nam lơh bơh 1 tus 2 broă lơh cau ling yau lơh sa, kă bro jak, geh broă lơh bơ̆t bơtàu ƀòn lơgar pa tiah drà jak chài bơtàu tơnguh, tus bal sền gàr niam bơta lơngăp lơngai tàm ƀòn lơgar, sền gàr lơngăp lơngai lòt rê tàm gùng mờ rề ơnàng lơh uă broă lơh kâu lạc ƀộ cau ling yau sền gàr tiah ơm kis tàm càr.

Cau cih VOV Tây Nguyên- Cau mblàng Lơ Mu K’Yến