VOV4.K’ho- Rcang mŭt bơsram nam bơsram pa 2022-2023, Dăk Lăk gam lơh ngan lơh mhar tơnga lơh, lơh niam wơl hìu bơsram, cơldŭ bơsram; blơi phan bơna kờñ geh nàng drơng broă bơto bơtê ai ală hìu bơsram in. Nam bơsram do, càr Dăk Lăk bơcri priă mờr 488 tơmàn đong nàng lơh pa mờ lơh niam wơl, lơh niam hìu bơsram mờ blơi phan bơna măy mok bơto bơtê ai ală hìu bơsram bơh kấp mầm non tus kấp pe in. Priă tă do tơrgùm lơh lài ai ală tiah sar lơgar ngài, tiah kal ke, tiah nhàr lơgar in mờ ngan là ală hìu bơsram kấp 1 in nàng gàr niam broă bơsram sră 2 ƀùi dùl ngai jat broă lơh bơto bơtê phổ thông nam 2018 dê.

Hìu bơsram kấp 1 Y Jŭt, kơnhoàl Buôn Đôn, càr Dăk Lăk geh bơcri priă lơh pa 3 nơm cơldŭ bơsram

Jat Sở Giáo dục mờ Đào tạo càr Dăk Lăk yal, bulah khà priă tă bơcri ai gah bơto bơtê in sùm geh càr sền gròi, ai lài, mơya, nàng lơh geh jơnau kờñ bè phan bơna măy mok nàng lam lơh broă lơh bơto bơtê phổ thông pa, gùt càr gam ờ tơl 500 nơm cơldŭ bơsram. Sở Giáo dục mờ Đào tạo càr Dăk Lăk neh geh sră nggal cribơyai, dan mờ Ủy ƀan Ñân zân càr bơsong bơta do.

Cau mblàng K’Hạnh