VOV4.K’ho- Di dơ̆ tơngkah kir sơnrai 75 nam Ngai Cau ling sồt să- Cau ling chơ̆t màng (27/07), càr Dăk Lăk lời rlau 13 tơmàn đong nàng pà phan ai ală cau cíñ săc, cau geh màng mờ kăc màng in. Priă rlau 13 tơmàn đong do geh jàu ai mờr 42 rbô 500 nă cau geh màng mờ kăc màng in tàm ù tiah càr dê.

Tàm hơ̆, phan pà bơh Củ tịc lơgar dê mờ kờp priă rlau 4 tơmàn 200 tơlak đong, priă gam wơl là phan pà bơh càr dê mờ ală tiah dê. Phan pà geh tam pà gơs bàr khà: 600 rbô đong mờ 300 rbô đong. Mùl màl, phan pà 600 rbô đong geh lời ai ală Mè Việt Nam khin cha jak chài in; Cau pròc mhàm tờm cau ling chơ̆t màng dê gam dờp bơta dong kờp priă chơ̆t ròng siam sền gàr pah nhai; Cau ling sồt să geh bơta sồt să jan bơh 81% rlau hơđang.

Khà phan pà 300 rbô đong pà Cau ling sồt să, cau ling kòp tê jê să gơmù bơta pràn lơh broă bơh 80% tus hơđơm; Cau ling sồt să gam dờp bơta dong kờl roh pràn lơh broă; cau lơh broă tam lơh gơtìp sơnơm khih dioxin lơh aniai geh bơta sồt să jan bơh 80% tus hơđơm; ala măt cau pròc mhàm tờm cau ling chơ̆t màng, cau duh khuai cau ling chơ̆t màng.

Cau mblàng Lơ Mu K’Yến