VOV4.K’ho - Bơh bồ nam 2022 tus tŭ do, anih tờm broă lơh drơng ala broă lơh, gơwèt Sở Lao động-Thương binh mờ Xã hội càr Dăk Lăk neh bơsong broă ƀảo hiểm roh broă lơh mờ 8 rơbô 640 pang sră, gơguh 43,8% pơn drờm mờ tŭ do nam lài.

Cau lơh broă lơh sră dờp dong kờl priă ƀảo hiểm roh broă lơh tài gơrềng bơh kòp Kovid-19 tàm kơnhoàl Krông Ana

Jăt anih tờm broă lơh drơng ala broă lơh càr Dăk Lăk yal, geh rơlao 8 rơbô 600 pang sră geh dan bơsong broă dong kờl ƀảo hiểm roh broă lơh, geh rơlao 5 rơbô 700 nă cau lơh broă tàm ală càr ndai, rơlao 2 rơbô 800 nă cau lơh broă tàm càr, kờp jơh khà priă pal tơm broă dong kờl ƀảo hiểm là 132 tơmàn đong. Mờ anih do neh dong kờl bơto broă lơh ai 310 nă cau gam dờp broă dong kờl bảo hiểm roh broă lơh, tàm 3 nhai lồi nam do, anih do geh tơnguh bơta pràn lơh broă ai Cơl dŭ lơh broă tàm thị xã Buôn Hồ, kơnhoàl Ea Kar mờ Anih do nàng dờp, bơsong broă dong kờl bơh ƀảo hiểm roh broă lơh nàng gàr niam gùng dà 3 di, di cau, di broă dong kờl mờ di tơngai.

Cau mblàng Ndong Brawl