Bơh kes priă dong kờl làng bol lơh broă sa, ală kấp Mpồl làng bol lơh broă sa càr Dăk Lăk neh ai mờr 2 rơbô 500 hìu in càn rơlao 52 tơmàn đong nàng bơcri tàm boă tơnguh bơtàu lơh sa hìu nhă. Bal mờ hơ̆, Mpồl pơgồp bal mờ Ngân hàng Cíñ sác xã hội, Ngân hàng Nông nghiệp mờ Phát triển Nông thôn ai rơlao 15 rơbô hìu làng bol in càn mờ khà priă ai càn geh rơlao 600 tơmàn đong.

Mờ lơh jăt broă ai ù tiah nàng yal mờ ală mpồl lơh sa kă bro dong kờl làng bol blơi git nđờ jơ̆t rơbô tấn phơng sih, sơn tìl phan tam, phan sa phan ròng in jăt mờ broă tơm lơyài, mờ kờp jơh khà rơlao 70 tơmàn đong. Nàng lơh geh cồng nha priă càn, tàm nam 2022, mpồl làng bol lơh broă sa càr Dăk Lăk pơn jăt tai lơh broă bal mờ làng bol tàm broă tam phan, ròng phan, tus bal lơh ală broă dong kờl làng bol lơh broă sa geh tus bal mờ bơta gơguh jăk khoa họk, kông nghệ; yal, tăc phan geh lơh bơh broă lơh sa suơn sre.