VOV4.K’ho- Tềng đăp bơta geh ngan brê gơtìp sơgràm aniai uă ngan, tàm tŭ uă jơnau cih bơh kơrnoăt boh lam dê, kơrnoăt mờ broă dong kờl ờ di pal mờ bơta geh ngan, càr Dăk Lăk pa pơyua jơnau sồr tam gơl, lơh wơl bàr pe adat, ală kơrnoăt, broă dong kờl nàng tơnguh uă cồng nha sền gàr, bơtàu tơnguh brê tàm càr.

Ală jơnau dan, jơnau sồr geh Ủy ƀan Ñân zân càr Dăk Lăk yal tàm dơ̆ lơh broă pa do đah mpồl đơng lam tờm càr mờ kwang đơng lam bồ Ƀộ Nông nghiệp mờ Phát triển Nông thôn. Jăt Ủy ƀan Ñân zân càr Dăk Lăk yal, priă tă sền gàr brê jăt Kơrnoăt 28 nam 2016 bơh Thủ tướng Cíñ phủ dê cih khà dong kờl là 300 rbô đong dùl lồ tàm dùl nam là lơyah ngan ir pơndrờm mờ jơnau kờñ ngan ngồn, ờ tơl nàng ătbồ sền gàr brê. Dăk Lăk sồr Ƀộ Nông nghiệp mờ Phát triển Nông thôn dan mờ Cíñ phủ tơnguh khà dong kờl gơguh tus khà êt ngan rlau jơh là bơh 1 tơlak 300 rbô đong tàm dùl lồ dùl nam. Càr Dăk Lăk kung đơs, mpồl sền gàr brê tŭ do gam ờ tơl uă ngan mờ uă bơta ờ hềt loh làng tàm broă dong kờl, kal ke ngan sền gàr geh brê. Dăk Lăk dan mờ Cíñ phủ geh broă lơh dong kờl cau sa priă nhai is ai mpồl sền gàr brê in mơkung dan mờ Cíñ phủ geh jơnau cih tơnguh gơnăp gơnoar ai mpồl sền gàr brê mờ mpồl sùm lơh kơnòl broă sền gàr brê bơh ală cau tờm brê dê in nàng tơnguh uă cồng nha sền gàr brê.

Cau mblàng Lơ Mu K’Yến