Nhai 9 nam 2022, oh Lương Thị Trâm Anh, Đoàn viên Ci đoàn ơdŭ 12A4, Hìu bơsram kấp pe Phan Bội Châu, kơnhoàl Krông Năng, càr Dăk Lăk chờ hờp ngan geh mŭt tàm mpồl Đảng tŭ tòm 18 sơnam. Do là bơta pơn yờ să ngan bè bơta cih dờp bơh cau pơgru, gơ̆p bơyô dê gơwèt mờ ală bơta lơh ngan tàm broă bơsram sră mờ bơsram tàp bơh oh dê sùm tàm uă nam do. Oh Trâm Anh, pà gĭt: Nùs nhơm bơh añ dê tŭ hơ̆ bè añ gơ gơs là dùl nă cau ndai. Hơ̆ bè là dùl bơta tam gơl tàm rài kis bơh añ dê. Den tàng bè hơ̆ mờ añ pal lơh sir niam ngan kơnòl broă bơh añ dê.

 Ai oh Võ Thị Như Ngọc- Ƀí thư Ci đoàn ơdŭ 12A1, Hìu bơsram kấp pe Lê Qúi Đôn, ƀòn dờng Buôn Ma Thuột, càr Dăk Lăk đơs, tàm tơngai bơsram sră, oh sùm lơh ngan pơnđơl pràn, bơsram tàp să tờm đòm jat bơhiàn hìu bơnhă dê nàng geh mŭt tàm mpồl Đảng. Tàm ală nam bơsram tàm hìu bơsram oh ndrờm lơh geh kơnòm bơsram jak tơl làm, lơh ngan tàm srơh Đoàn. Kơnờm ală bơta lơh ngan bơh să tờm dê, nhai 10 pa do, oh chờ hờp ngan geh Đảng ủy hìu bơsram yal tơngĭt bơsram ơdŭ gĭt wă bè Đảng. Do mìng là bơh sơn rờp lơm mơya oh chờ hờp ngan. Oh Võ Thị Như Ngọc, đơs:Añ sền gŏ să tờm chờ hờp ngan tŭ là dùl tàm ală cau ết ngan ală gơ̆p bơyô geh tus bal ơdŭ bơsram rcang mŭt Đảng. Do kung là tŭ niam nàng añ in sơlơ bơsram uă rlau tai bơta gĭt wă ai să tờm in mờ gơtùi lơh gơ rề bơta niam, bơta pơnđơl pràn lơh ngan tus mờ ală gơ̆p bơyô gùt dar tàm hìu bơsram.

 Ùr pơgru Nguyễn Thị Xuân Hương, Ƀí thư Đảng ủy, Kwang atbồ Hìu bơsram kấp pe Lê Qúy Đôn đơs là, broă bơtàu tơnguh bơto bơtê tơmŭt đảng viên bơh tŭ ală oh gam nggui tàm cơghĕ hìu bơsram là kờñ pal geh ngan mờ cèng wơl uă gah niam ngan. Tài bơh lơh niam broă lơh do ờ mìng bơtơl uă cau, bơta niam ai ală mpồl Đảng ƀòn lơgar, lơh sơlơ kơnòm să mpồl Đảng viên in lơm gời mờ gam pơgồp bơnah kwơ màng tàm broă pơlam broă lơh bơto bơtê cíñ trị bồ tơngoh tàm hìu bơsram. Mơkung lơh gơrề uă bơta pin dờn bơh rơnàng kơnòm să dê gơwèt mờ Đảng, dong ală gơ̆p bơyô in kis geh kơlôi sơnơng mờ geh bơta kơ̆p kờñ. Ùr pơgru Nguyễn Thị Xuân Hương, đơs: Rơnàng kơnòm să ală oh tŭ do ngăc ngar ngan mờ jơh nùs ngan, pal geh tơmŭt Đảng bơh sơn rờp nàng tŭ mŭt tàm hìu bơsram đại họk ală oh geh tŭ tơngai niam lơh nền să jan gờñ rlau tai.

Nàng tơmŭt mpồl Đảng viên kơnòm să tàm hìu bơsram, Đảng ủy, Ƀan Giám hiêụ hìu bơsram pal đơng lam, bơto pơlam ală mpồl cau lơh jat niam rlau tai gơnoar bơh mpồl Đoàn viên Ơruh pơnu tàm broă lơh bơto pơlam, bơto bơtê nùs nhơm, cíñ trị, gĭt wă bè Đảng ai kơnòm bơsram in. Mơkung bơyai lơh ală broă lơh nàng bơsram tàp nàng gĭt loh nùs nhơm, bơta kơ̆p kờñ mờ pơlam gùng dà ai ală kơnòm in pơnđơl pràn lơh ngan. Bơh bơta mờng chài tơmŭt Đảng viên tàm hìu bơsram bơh he dê, ồng Lã Mạnh Hà, Ƀí thư Đảng uỷ, Kwang atbồ Hìu bơsram kấp pe Phan Bội Châu, kơnhoàl Krông Năng, đơs: Mpồl Đoàn viên Ơruh pơnu Kộng sản Hồ Chí Minh tàm hìu bơsram geh bơta dong kờl uă bơh huyện Đoàn kung bè ală mpồl cíñ trị- mpồl bơtiàn tus di tŭ ală kơnòm tus bal nùs nhơm gĭt wă bơh chờm nàng hìu bơsram in kung gàr tơl broă jàu geh bơta sac rơwah niam ngan rlau jơh. Tàm broă lơh bơto bơtê den ală cau pơgru ƀộ môn kung bè cau pơgru atbồ ơdŭ kung pal pơlam gùng dà mờ jat sền nàng dong hìu bơsram in lơh sir kơnòl broă cíñ trị kwơ màng tơmŭt đảng viên là kơnòm bơsram.

Jat ồng Phạm Đăng Khoa, Kwang atbồ Sở Giáo dục mờ Đào tạo Dăk Lăk, nam bơsram 2021-2022 geh 18 nă kơnòm bơsram kấp pe geh tơmŭt Đảng. Do là khà dùl ết ngan pơndrờm mờ rlau 41 rơbô nă đoàn viên gam pơrjum tàm ală ci đoàn gơwèt ală Hìu bơsram bơh càr dê. Den tàng, Sở Giáo dục mờ Đào tạo sồr ală hìu bơsram pal sền gròi uă rlau tai tus broă lơh tơmŭt đảng viên là kơnòm bơsram, sền do là dùl tàm ală kơnòl broă cíñ trị tờm, lơh sùm bơh hìu bơsram dê. Ồng Phạm Đăng Khoa, pà gĭt: Bol añ sền gròi ngan lơh geh ală tiah nàng ală kơnòm in pơnđơl pràn lơh ngan bơsram tàp lơh sir kơnòl broă bơh he dê bè bơsram sră kung bè gĭt wă kơnòl bơh rơnàng kơnòm să dê là mŭt tàm mpồl Đảng nàng ală kơnòm in pơnđơl pràn lơh ngan tă pơgồp bơta pràn tàm broă lơh bơt bơtàu mờ sền gàr dà lơgar Việt Nam tơnơ̆ do.

Mờ bơta sền gròi tơmŭt đảng viên kơnòm să tàm hìu bơsram, gah Giáo dục mờ Đào tạo càr Dăk Lăk neh mờ gam pơgồp bơnah bơt bơtàu mpồl đảng viên kơnòm să geh bồ tơngoh jak, bơta jak chài, bơta kơ̆ dơn cíñ trị kơ̆ kơljap. Bơh hơ̆, lơh tơngkah wơl bơta kơ̆p kờñ tă pơgồp bơta pràn bơh rơnàng kơnòm să dê nàng bơt bơtàu Đảng, bơt bơtàu ală broă lơh cíñ trị mờ bơtàu tơnguh ală tiah mờ dà lơgar dê