VOV4.K’ho- Càr Dăk Lăk gam lam lơh dùl ròt ală rơndap broă, broă lơh kuơmàng mờ jơnau kờñ ù cò tơnring, ù bồr bơ tơl gơguh tus git nđờ tơlak khối. Mơya, geh dùl bơta ờ di ngan là gùt càr ờ hềt dùl tiah tờ ù lơi geh lơh sră ai gơnoar. Jơnau gơ lời wơl là uă rơndap broă, broă lơh kuơmàng gam pơhìn gơtìp lơyài tơngai lam lơh tài bơh ờ tơl ù.

Rơndap broă lơh gùng Hồ Chí Minh gơl gùng pleh tiah đah mat tơngai lik Buôn Ma Thuột jòng mờr 40 kơi sồ, kờp jơh priă tă lơh rlau 1 rbô 500 tơmàn đông bơh Mpồl atbồ rơndap broă lơh bơcri priă lơh broă lơh gùng lòt mờ lơh sa suơn sre bơtàu tơnguh ƀòn lơgar càr Dăk Lăk lơh cau tờm bơcri priă. 

Rơndap broă lơh gùng Hồ Chí Minh gơl gùng pleh tiah đah mat tơngai lik Buôn Ma Thuột gam lam lơh mơya ờ tơl ù nàng bồr bơ tơl gùng

Rơndap broă lơh sơn đờm lam lơh tàm bồ nam do mờ jat broă rơndap lơh geh lơh gơs tàm nam 2023. Broă lam lơh rơndap broă gam gơtìp 2, 3 bơta kòl yan, kal ke, ngan là ù nàng drơng broă lơh gùng in. Ồng Hoàng Đình Chương, Kwang atbồ Kông ty An Nguyên, dờp lơh dùl bơnah broă lơh sồ 4 bơh rơndap broă dê jòng mờr 10 kơi sồ pà git, tŭ do gam ờ tơl mờr 200 rbô khối ù nàng bồr bơ tơl, lơh gơ rềng tus tơngai lam lơh broă lơh. Jat ồng Chương đơs, kơnòl gơ wèt tàm cau tờm bơcri priă mờ do là bơta kal ke tŭ ờ hềt jòi geh ù nàng lam lơh rơndap broă: “Tàm jơnau bơceh lơh là 1 tơlak khối ù mơya gam ờ tơl 200 rbô khối là tài bơh ờ geh tiah nàng tờ ù. Tàm hơ̆, bơta do gơ ơm tàm bơnah broă sồ 4 bơh Kông ty An Nguyên dê, tŭ do pal jòi 200 rbô khối ù tềng lơi. Cau tờm bơcri priă pà git ờ hềt jòi geh tiah nàng tờ ù”.

Ờ tơl ù cò tơnring, ù nàng bồr bơ tơl kung là bơta geh ngan gơlik geh tàm uă rơndap broă lơh kuơmàng tàm càr Dăk Lăk bè rơndap broă lơh tơnau dà Ea Tam mờ kờp jơh priă bơcri mờr 1 rbô 500 tơmàn đông mờ Rơndap broă lơh Gùng dờng đah mat tơngai lik- đah mat tơngai mut mờ kờp jơh priă bơcri rlau 1 rbô 200 tơmàn đông bơh Mpồl atbồ rơndap broă lơh ƀòn dờng Buôn Ma Thuột lơh ala mat cau tờm bơcri priă. Ồng Lê Khắc Đô, kwang atbồ cơldŭ phan kuơ tàm ù, Sở Tài nguyên mờ Môi trường càr Dăk Lăk pà git, tơngai lài do, jơnau kờñ bè ù cò tơnring, ù bồr bơ tơl ờ hềt geh sền gròi lơh gơlik bơta tàm ală rơndap ù tiah yau, gùt càr ờ geh tiah nàng tờ ù. Broă tờ ù uă ngan là ngui bơh ală rơndap broă, broă lơh ndai halà bơh tap ù glòm tàm ală tiah tơnhàu lŭ mơya khà ù ờ tơl nàng drơng ai dùl ròt broă lơh, rơndap broă gam lam lơh bè tŭ do in.

Nàng tă bơsong kal ke bè ù ai ală broă lơh, rơndap broă lơh in, nhai 2 nam 2022, Sở Tài nguyên mờ Môi trường neh ai tơlik jơnau đơs Ủy ƀan Ñân zân càr Dăk Lăk in ring bal rơndap ù tiah phan kuơ tàm ù, yal 59 tiah tờ ù mờ khà ù kờp dŭ mờr 20 tơlak khồi, gơtùi drơng jơnau kờñ ù ai ală rơndap broă, broă lơh in. Bulah bè hơ̆, broă rơndap tŭ tơngai nàng lơh sră ai gơnoar tờ ù kờñ pal roh bơh 7 tus 8 nhai, ờ uă rơndap broă digơlan gơtìp lơyài tơngai lam lơh. Ồng Lê Khắc Đô kung mblàng lơh loh, gơ wèt mờ ală rơndap broă ờ tơl ù bồr bơ tơl đơs is, ờ tơl phan bơna đơs bal, geh kơnòl bơh cau tờm bơcri priă mờ mpồl tờm pơlam lơh dê: “Kơnòl khi dê là pal lòt sền, rơ wah phan bơna. Kơrnuat bơt bơtàu rơndap broă bơcri priă lơh broă lơh den bơta tàm pơnring đah tờ mờ bồr bơ tơl là he pal đal git tiah tuh tơlik dilah phan bơna tàm rơndap broă gam jơngkah, ai dilah ờ tơl den pal jòi git tiah tờ. Mpồl lòt sền, bơceh lơh pal rơ wah ală tiah tờ dipal ai rơndap broă in, tơnơ̆ hơ̆ hơ̆ sồng ai tơlik ală broă rơndap lơh. Hơ̆ là tàm tŭ bơt bơtàu rơndap broă bơcri priă den khi pal lơh ală broă hơ̆ bloh, bơh lài mờ tŭ lam lơh ngan ngồn tus tŭ rơndap broă geh lam lơh ngan ngồn den rơndap broă pal lòt gan 3 bơnah broă”.

Tàm bơta ndai, ồng Trần Đình Nhuận, Kwang atbồ Sở Tài nguyên mờ Môi trường càr Dăk Lăk pà git, kòl yan tàm broă tờ ù drơng ală broă lơh, rơndap broă in gam tài bơh bơta ờ niam bơh kơ cế, broă lơh dê tai. Jat Adat ù tiah, gơ wèt mờ phan kuơ tàm ù ờs mờng bè ù den pal lam lơh jat jơnau ring bal. Mơya broă mpồl lơh sa kă bro lòt ring bal mờ làng bol sùm ờ gơtùi tài bơh khà priă kas ir, geh tŭ gơguh tus git nđờ jơt tơmàn tơl lồ, ờ gơtùi lam lơh. Gơ wèt mờ ală rơndap broă kuơmàng dà lơgar, Quôk hội, Cíñ phủ geh Nghị quyết is nàng tă bơsong kòl yan mơya gơ wèt mờ ală broă lơh tàm kâp hơ đơm den kal ke ngan: “Jat sèng 3, bơta 62 Adat ù tiah den Dà lơgar ai wơl ù, phan kuơ tàm ù mơya ờ kờp phan bơna ờs mờng, hơ̆ là ù nàng bồr bơ tơl, bràs, lŭ rơ đeh, broă lơh pal ring bal. Tàm bơta do, dilah dà lơgar ai wơl nàng lơh sră ai gơnoar gròi sền nàng bơcri priă dà lơgar den bơh broă rơcang bơcri priă pal đal git hơ̆ là bơceh sơn rờp bơh broă lơh bơcri priă dà lơgar dê den hơ̆ sồng geh cơng tàng adat boh lam nàng ai wơl. Tàm ală rơndap broă dờng, pơn yơu bè gùng rơndeh ntoat rat tiah đah tô- tiah đah jum dà lơgar den Quôk hội, Cíñ phủ geh nghị quyết is. Mơya ală broă lơh gơ wèt kâp càr, kâp kơnhoàl den kal ke ngan”.

Broă ờ tơl ù tơnring, ù bồr bơ tơl lơh uă rơndap broă, broă lơh kuơmàng tàm Dăk Lăk pơhìn gơtìp lơyài tơngai lam lơh. Bal mờ ală bơta ờ niam tàm broă rơndap ù tiah, lòt sền, bơt bơtàu rơndap broă, gam geh kơnòl bơh cau tờm bơcri priă mờ ală mpồl geh gơ rềng dê tai den broă tờ ù nàng drơng ai ală broă lơh, rơndap broă in kung gam gơtìp ală bơta kòl yan pal geh tă bơsong bơh kơ cế, broă lơh bè ù tiah, phan kuơ tàm ù.

Cau mblàng K’Duẩn