Ồng Nguyễn Văn Nam, Phó Kwang atbồ Sở Xây dựng càr Dăk Nông pà gĭt, tus tŭ do, tàm ù tiah càr dê pa mìng lam lơh dùl rơndap broă hìu ơm mpồl bơtiàn lơh ơ nàng mờr 18 rơbô thơk vuông, tàm hơ̆ geh 127 nơm hìu. Rơndap broă lơh do lam lơh tàm sơnah ƀòn Nghĩa Tân, ƀòn dờng Gia Nghĩa, kờp jơh priă bơcri lơh 139 tơmàn đong. Tơnơ̆ 5 nam lam lơh, 3 dơ̆ tam gơl jơnau lơh nền gùng dà broă lơh bơcri priă lơh, tam gơl cau bơcri priă mờ tơnguh khà priă bơcri lơh rlau 162 tơmàn đong, rơndap broă lơh pa mìng lơh sir 16 nơm hìu, 28 nơm hìu ndai gam lời gời. Geh tŭ, broă lam lơh rơndap broă lơh rơndap tus tŭ do gam geh uă bơta ờ niam, lơh tìs mờ gam geh sền sơ wì tơn jơh rơndap broă lơh do.

Tơnơ̆ 7 nam, Cíñ phủ geh Nghị địñ sồ 100 bè bơtàu tơnguh mờ atbồ hìu ơm mpồl bơtiàn, tàm Dăk Nông pa lam lơh ờ hềt gơs 1 rơndap broă lơh lơm

Đơs tơl làm, ồng Nam pà gĭt, broă bơtàu tơnguh hìu ơm mpồl bơtiàn tàm ù tiah càr tŭ do kal ke ngan. Dùl bơnah tài bơh càr gam rƀah, ờ hềt tơl ală bơta nàng ngui kes priă dà lơgar nàng lam lơh halà dong kờl ai ală mpồl lơh sa kă bro lam lơh ală rơndap broă lơh. Bơnah ndai den ală cau bơcri priă cau dùl nă să is ờ hềt sền gròi uă tus gah broă do tàm càr tài bơh ală tiah lơh sa mờ măy mok ờ hềt bơtàu tơnguh, jơnau kờñ hìu ơm mpồl bơtiàn gam ờ hềt geh uă.