VOV4.K’ho- Ƀan Jơi bơtiàn kòn cau, Hội đồng Ñân zân càr Dăk Nông pa lơh broă lơh lùp sền bè broă tàm rài kis bơh làng bol jơi bơtiàn kòn cau dùl êt nă cau neh klàs bơh rƀah tàm ù tiah càr dê tơngai bơh nam 2019- 2021.

Jăt tàm bơta lùp sền ngan ngồn, Hội đồng Ñân zân càr Dăk Nông sồr Ủy ƀan Ñân zân càr sồr ală sở, ngàñ, ală tiah pơgồp bal niam, dùl ròt mờ lam lơh wil tơl ală broă dong kờl bơtàu tơnguh lơh sa- mpồl bơtiàn, tơn jơh jơgloh tơrmù rƀah bơh Dà lơgar dê; sền gròi broă tàm tơrbŏ bal, pơgồp bal ală broă lơh dong kờl nàng lơh geh tai cồng nha.

Mơkung kơlôi sơnơng, dan geh ală broă dong kờl, broă lơh krơi is ai hìu rƀah là làng bol jơi bơtiàn kòn cau dùl êt nă cau in. Tŭ do, jơh gùt càr geh mờr 18 rbô 300 hìu rƀah, geh tus rlau 11% kờp jơh khà hìu làng bol. Tàm hơ̆, hìu rƀah là làng bol jơi bơtiàn kòn cau dùl êt nă cau mờr 12 rbô 800 hìu, geh tus mờr 28% kờp jơh khà hìu làng bol kòn cau dùl êt nă cau.

Cau mblàng Lơ Mu K’Yến