VOV4.K’ho- Đảng ủy Gah ală anih lơh broă Dà lơgar pa jàu priă tă lơh 1 tơmàn đong nàng lơh 20 nơm hìu pà ală hìu bơnhă cíñ săc, hìu bơnhă rƀah kal ke bè hìu ơm tàm càr Bình Định. Ồng Nguyễn Quang Trường, Phó Ƀí thư Đảng ủy Gah ală anih lơh broă Dà lơgar pà gĭt, nam 2021, Đảng ủy gah ală anih lơh broă Dà lơgar lơh jăt Cỉ thị sồ 05 bơh Ƀan Ƀí thư Đảng dà lơgar dê bè “Tơnguh tai bơta đơng lam bơh Đảng dê gơwèt mờ broă lơh tơrmù rƀah kơ̆ kơl jăp tus nam 2030”.

Jăt mờ hơ̆, tơl đảng ƀộ gơwèt bal dờp kơnòl tam tìp, lơh oh mi, dong kờl êt ngan rlau jơh dùl kơnhoàl rƀah, xã rƀah tàm gùt lơgar nàng dong kờl phan bơna, tàm jàu ngui bơta jak chài, măy mok dong kờl ƀòn lơgar tàm bơtàu tơnguh lơh sa, tơn jơh jơgloh tơrmù rƀah. Tus tơngai do, jơh gùt Đảng ƀộ Gah ală anih lơh broă Dà lơgar neh hòi jà tă pơgồp geh 17 tơmàn 600 tơlak đong bơh ală ngân hàng kă bro, mpồl lơh sa kă bro, cau geh nùs nhơm niam mờ bơh kwang bàng, kông cưk, viên cưk tàm ală đảng ƀộ gơwèt bal dê.

Cau mblàng Lơ Mu K’Yến