VOV4.K’ho- Mang do 28/04, Mpồl Cữ thập đỏ Việt Nam pơgồp bal mờ Ủy ƀan Ñân zân càr Thừa Thiên- Huế bơyai lơh Dơ̆ lam lơh Nhai dong kờl cau nam 2022 mờ tơngume “Tam klăc bal mpồl bơtiàn- Lơh gơrềng broă lơh kờñ gơboh kòn bơnus” mờ tơngkah kir sơnrai Ngai Cữ thập đỏ mờ Àng kơnhai sề mơ̆ pơrhê dunia ngai 08/05.

Nhai Dong kờl cau nam 2022 lam lơh tàm nhai 05, mờ ală broă lơh geh lơh uă là dong kờl ai làng bol geh rài kis kal ke in bơh ngai 08/5 tus ngai 19/05. Tàm dơ̆ bơyai lơh Nhai dong kờl cau nam 2022, Mpồl Cữ thập đỏ Việt Nam sơnđờm lơh bàr broă lơh tờm kwơmàng ngan geh lơh tàm nhai 05 tus, hơ̆ là: Broă lơh “Ờdo ờdă ai làng bol lơh ka rƀah, kal ke in” mờ Phan sa bơkah tơl pràn ai kơnòm dềt rƀah, kuĕt kơlte in” tàm jơh ală mpồl cữ thập đỏ dê. Broă lơh geh jàu dơ̆ sơnrờp ai 14 càr mờ ƀòn dờng tiah tàm gùl lơgar in; bơyai lơh Drà dong kờl cau ai làng bol geh rài kis kal ke gơtìp gơrềng tài bơh trồ tiah, kòp bơtờp lơh aniai.

Cau mblàng Lơ Mu K’Yến