VOV4.K’ho- Poh lài, tàm Hìu Quôk hội neh geh lơh dơ̆ pơrjum dơ̆ 9, Ủy ƀan Thường vụ Quôk hội. Dơ̆ pơrjum dơ̆ do geh lơh 2 dơ̆ mờ kờp jơh tŭ jiơ lơh broă là 7 ngai mờ nggùl. Pal sền ngăc, tàm dơ̆ pơrjum do, Ủy ƀan Thường vụ Quôk hội lời dùl ngai lơh broă nàng bơyai lơh dơ̆ lùp mờ hơ jơnau lùp bơh kwang bàng Quôk dê mờ 2 nă kwang bàng Cíñ phủ. Kung tàm dơ̆ pơrjum dơ̆ do sơl, Ủy ƀan Thường vụ Quôk hội ai jơnau đơs tàm rơndăp lơh Kơrnoăt rơndăp tăp sèng, sră nggal sền swì, lơh nền jun cau ngir ma túy tơl bơh 12 sơnam tus hơđơm 18 sơnam mŭt tàm anih sơm tơn jơh ngir ma túy pal lơh; mờ bàr pe tơngume kwơmàng ndai.

Đơs sơnđờm mŭt pơrjum, Củ tịc Quôk hội ồng Vương Đình Huệ pà gĭt: Ủy ƀan Thường vụ Quôk hội neh lơh jăt ală broă pơlam lơh mờ dan jơnau đơs 6 mpồl broă. Jăt tàm sră đùh sră pờ tê ring bal neh lơh nền 2 mpồl broă lùp Ƀộ trưởng Ƀộ Kông thương ồng Nguyễn Hồng Diên mờ Ƀộ trưởng Ƀộ Tài nguyên mờ Môi trưởng ồng Trần Hồng Hà. Tơngume lùp Ƀộ trưởng Ƀộ Kông thương tơrgùm bè broă lơh gơlik mờ tăc bro xăng zờu; broă lơh đơng lam giă xăng zờu tơngai do. Broă lơh ătbồ drà kă bro, rơcăng sơndră tăc blơi kơñau mờ lơgar ndai, phan ờ ngan, phan ờ niam, phan ờ gĭt loh anih...Ƀộ trưởng Ƀộ Tài nguyên mờ Môi trường ồng Trần Hồng Hà hơ bè broă lơh jăt kơrnoăt bè broă lùp- hơ mờ jăt sền tơngume bơh Quôk hội dê gơrềng tus rơndăp ù tiah, ătbồ mờ ngui ù tiah tàm tiah drà. Kơnòl mờ broă lơh kơryan jơnau sơmờm broă cok giă tàm ală dơ̆ tàm pơrlòng giă ù mờ khà giă sơrlèt uă rlau ir mờ giă ngan ngồn bơh drà kă bro dê neh lơh giă ù ală tiah gùt dar gơguh jơnhoa nàng kờñ jòi sa kwề is.

Củ tịc Quôk hội ồng Vương Đình Huệ, đơs: Bal mờ broă lam lơh, jăt sền tơngume dờng ngan rlau jơh bơh Quôk hội mờ Ủy ƀan Thường vụ Quôk hội dê den ală tam gơl niam ngan bơh broă lơh lùp mờ hơ jơnau lùp dê neh đơs nền do là broă lơh jăt sền tơn, geh cồng nha bơh Quôk hội dê, pơgồp bơnah lơh gơrề bơta gơdan lơh broă bơceh lơh tàm broă lơh ngan tam gơl pa lơh broă jăt sền mờ lơh ai broă lơh bơh Quôk hội dê, jăt di bơta geh ngan mờ nhơm tă bơh rài kis dê; lơh geh jơnau kơ̆p kờñ ngan bơh làng bol mờ bơh cau tĕ khà dê sồr bơ̆t bơtàu Dà lơgar gơnoar kơrnoăt boh lam làng bol lơh tờm mpồl bơtiàn ring bal làng bol dê, bơh làng bol mờ tài làng bol.

Dơ̆ lùp mờ hơ̆ jơnau lùp digơlan geh lơh tàm ngai 16/03 do, geh bơyai lơh tàm Hìu pơrjum Diên Hồng, Hìu Quôk hội mờ tàm tơrbŏ sơñio rùp pờ tơlik tơn tàm internet mờ 63 Mpồl kwang bàng Quôk hội mờ geh yal tơn nàng gal ngan cau tĕ khà mờ làng bol in iăt mờ sền.

Kung tàm poh lài sơl, tơnơ̆ dơ̆ bơyai lơh sơnđờm mŭt pơrjum dơ̆ 9, Ủy ƀan Thường vụ Quôk hội neh ring bal mờ bơta kờñ ngan pal yal mờ ai lơh jăt Kơrnoăt bè rơndăp tăp sèng, sră nggal sền swì, kơrnoăt jun cau ngir ma túy bơh tơl 12 sơnam tus hơđơm 18 sơnam tơmŭt tàm anih sơm tơn jơh ngir ma túy pal lơh tàm ală cau: cau ngir ma túy ờ lơh sră cih mat, ờ lơh jăt halà khăt nùs is tơn jơh sơm tơn jơh ngir ma túy lơh is; cau ngir ma túy tàm tơngai sơm tơn jơh ngir ma túy lơh is gơtìp gŏ ngui kơñau sơnơm ma túy; cau ngir ma túy ală bơta jràu phiện ờ lơh sră cih mat, ờ lơh jăt halà khăt nùs is tơn jơh sơm tơn jơh ngir ma túy.

Bulah bè hơ̆, jăt ală kwang bàng đơs, cau tam gơl bơh rơndăp cih Kơrnoăt dê là cau ngir ma túy bơh tơl 12 sơnam tus hơđơm 18 sơnam mờ broă jun khi mŭt tàm anih sơm tơn jơh ngir ma túy pal lơh ờ di là broă lơh bơsong sră nggal hàñ cíñ ờ, den tàng pal tơngŏ bơta krơi is do, sră nggal rềp mềl, bơto tơngkah kòn bơnus mờ gàr bơta kwơ niam ngan rlau jơh bơh cau gơtìp sồr dê. Kwang ătbồ Ủy ƀan Sền gàr dà lơgar- Lơngăp lơngai Quôk hội dê ồng Lê Tấn Tới, đơs: Geh ală cau kis gơlềng gơlàng, jòi tơrgùm bè sră nggal rài kis hìu bơnhă, să tờm kal ke ngan, ờ gŏ ờ hềt đơs tus broă bơh lài neh lơh tìs neh gơtìp kŭp jàm, mờ cau hơđơm 18 sơnam. Añ kơlôi rơcăng bơta geh ngan, tŭ gam lơh sră nggal, gĭt nền cau lòt sơm tơn jơh ngir ma túy, cau đơs “kòn añ lơh sră cih mat dan sơm tơn jơh ngir ma túy is” den sồr lời ờ lơh, bè hơ̆ roh dà kơlhề tŭ tơngai he lơh. Do là bơta ờ hềt niam tàm bơta geh ngan nàng ală cau sơmờm.

Tàm dơ̆ pơrjum do, Thứ trưởng Ƀộ Y tế ồng Trần Văn Thuấn đơs là: ngir ma túy là kòp jŏ sơnam bơh tơngoh dê geh WHO dờp là kòp jŏ sơnam ờ hềt geh sơnơm sơm bời. Ƀộ Y tế ring bal bơtơl cau ờ lơh sră cih mat sơm tơn jơh ngir ma túy lơh is jăt jơnau cih bơh kơrnoăt boh lam dê mờ tàm ală tŭ anih cah rña sền swì lơh nền jun tơmŭt tàm anih sơm tơn jơh ngir ma túy pal lơh, halà mè bèp cau ala măt bơh cau ngir dê lơh sră cih mat dan sơm tơn jơh ngir ma túy lơh is.

Tàm dơ̆ dùl do, Ủy ƀan Thường vụ Quôk hội gam ai jơnau đơs bè Jơnau yal cồng nha bơh sơnrờp bơh mpồl jăt sền tơngume dê bè broă rơndăp tăp sèng ală anih lơh broă sră nggal dà lơgar kâp kơnhoàl, kâp xã tàm tơngai bơh nam 2019- 2021”. Yal cồng nha bơh sơnrờp bơh mpồl jăt sền tơngume “Broă lơh jăt kơrnoăt boh lam bè wă làng bol mờ bơsong jơnau lùp, jơnau yal yă bơh ngai 01/07/2016 tus ngai 01/07/2021”.

Bal mờ hơ̆, tàm dơ̆ pơrjum do, Ủy ƀan Thường vụ Quôk hội gam ai jơnau đơs bè jơnau yal bơh Cíñ phủ dê bè tơn jơh, sền swì jơh ală bơta broă lơh jăt gùng dà bơcri priă lơh gùng Hồ Chí Minh; sền swì broă bơtơl kờp dŭ lài kes priă dà lơgar priă dong kờl ờ tơm wơl bơh lơgar ndai dê; broă tơn jŏ tŭ tơngai lơh jăt mờ ai priă bơcri kes priă dà lơgar nam 2021 tus nam 2022; ai jơnau đơs bè broă kờp dŭ lài broă rơndăp lơh bơcri priă dà lơgar di mơ tơngai bơh nam 2021- 2025 ai ală rơndăp broă lơh in, ală bơnah priă ờ hềt tam pà.

            Cau cih VOV1- Cau mblàng Lơ Mu K’Yến