VOV4.K’ho- Ủy ƀan Niam chài bơto bơsram bơh Quôk hội dê pơgồp bal mờ Ủy ƀan sền gàr adat boh lam mờ Uỷ ƀan Mpồl bơtiàn bơh Quôk hội dê pa bơyai lơh dơ̆ pơrjum mblàng lơh loh bè tơngume “Sơlơ lam lơh broă lơh dong kờl, adat boh lam bè rơcang sơndră pù pờng kơnòm dềt”. Tàm dơ̆ pơrjum do, ală kwang bàng đơs loh ală jơnau lơh gơbàn tam lah tam lơh tàm hìu bơnhă mờ bơta chài boh bơr bơh cau dờng dê tơnơ̆ sang bau, ngan là niam chài mpồl bơtiàn ờ niam tàm ờ uă cau lơh gơguh uă broă pù pờng kơnòm dềt. Bal mờ hơ̆, ală broă lơh nàng kờñ rơcang sơndră pù pờng tàm kơnòm dềt kung geh đơs tus tàm dơ̆ pơrjum mblàng lơh loh sơl.

Broă mè cồng lơh chơt kòn bơklau pa rơp 8 sơnam, broă tir mè dê pơng 9 nai điñ tàm tơngoh oh ùr 4 sơnam tơnơ̆ uă dơ̆ pù pờng, iơm sơnơm khih ờ gơtùi, broă bèp sang kòn dềt tàm dà dờng... ờ uă broă kơl tơ̆ bic bài, pù pờng kơnòm dềt nđàc sơnggit ngan gơlik geh tàm tơngai lài. Phó Củ tịc Thường trựk Quôk hội ồng Trần Thanh Mẫn đơs loh, ală broă sơgràm aniai, pù pờng kơnòm dềt kung gam uă mờ ai gŏ ală broă lơh neh mờ gam geh lam lơh gròi sền, ròng siam, bơto bơtê mờ sền gàr kơnòm dềt kung ờ hềt tơl sơl. Phó Củ ñiệm Ủy ƀan mpồl bơtiàn bơh Quôk hội dê, mò Nguyễn Thị Kim Thúy sồr: “Ală broă pù pờng kơnòm dềt uă nam ờ mìng ờ gơmù bè khà dơ̆ mờ gam gơguh uă bè bơta ngòt rơngơt, khà lơh tìs tai. Jơnau bơh bơta do dê là ñchi. Ƀộ Lao động Thương ƀiñ mờ Xã hội, Ƀộ Kwang àng mờ ală anih lơh broă geh gơ rềng pal geh broă lơh lơi nàng bơsong bơta do”.

Ƀộ trưởng Ƀộ Lao động, Thương ƀiñ mờ Xã hội ồng Đào Ngọc Dung dờp, ală bơta ờ niam bơh bơta geh ngan là tài Adat bè kơnòm dềt ờ hềt geh pơlam, lam lơh jat di tŭ. Pal đơs là neh geh uă tiah ờ hềt gròi sền tơl làm tus broă lơh sền gàr kơnòm dềt: “Nđờ broă gơlik geh tàm tơngai pa do là bơta ai tơnggŏ niam chài mpồl bơtiàn neh gơmù. Jat añ là tam lah tam lơh tàm hìu bơnhă mờ bơta chài boh bơr bơh cau dờng dê tơnơ̆ sang bau. Jơh ală broă gơlik geh pa do ndrờm sơn đờm gơlik geh bơh tam lah tam lơh tàm hìu bơnhă mờ ờ jòi gùng bơsong lơh gơlik broă ờ niam”.

Tàm tŭ tơngai kòp Kovid-19 lơh gơbàn hoàc huơr kơn jơ̆ kơn jut ngan, gơ rềng tus broă lòt rê, gơ jat bal mờ bơta kal ke priă jền gơguh uă, lơh gơbàn bơta ờ niam tàm hìu bơnhă. Uă broă pù pờng bơh ală cau mè, cau bèp, cau tờm pròc mhàm tàm hìu bơnhă lơh gơlik. Mblàng lơh loh tai bè broă lơh rơcang sơndră pù pờng kơnòm dềt tàm hìu bơnhă, Thứ trưởng Ƀộ Văn hóa, Thể thao mờ Zu lịc ồng Tạ Quang Đông pà git: “Pa do, bol hi neh yal Adat rơcang sơndră tam lơh tàm pờng tàm hìu bơnhă (tam gơl) mờ jat broă rơndap lơh geh yal Quôk hội pơrjum dơ̆ 3 in, ring bal tàm pơrjum dơ̆ 4. Adat do tơnơ̆ tŭ geh ring bal geh là ală bơta niam ngan rlau jơh tàm broă sơlơ tơnguh broă lơh rơcang sơndră tam lơh tam pờng tàm hìu bơnhă, tàm hơ̆ geh broă rơcang sơndră pù pờng kơnòm dềt đơs is tàm adat do”.

Bè broă lơh tơrgùm jơh ală bơta sền gàr kơnòm dềt, tàm hơ̆ geh tam lơh tam pờng tàm hìu bơnhă, Ƀộ trưởng Đào Ngọc Dung đơs loh: “Bol hi geh tơrgùm lam lơh dùl bă nền nòn, jơh nùs, lam lơh jat ngan ngồn rlau jơh Nghị quyết 121, cih loh làng ngan kơnòl bơh tơl gah, tơl kấp mờ bơh Ủy ƀan sền gàr kơnòm dềt dê. Bơh bồ nam bol hi sồr Ủy ƀan Ñân zân ală càr, ƀòn dờng yal jơh broă gơlik geh bè bơcri priă, kes priă atbồ dà lơgar, kes priă ai broă lơh kơnòm dềt in nam 2022. Bơh hơ̆, ală, càr, ƀòn dờng rơndap ờ niam geh lòt sền mờ geh broă lơh dipal”.

Mờ kơnòl bơh cau atbồ dê, kong kơnòl atbồ dà lơgar bè kơnòm dềt, lam lơh jat mờ gròi sền broă lơh jat adat boh lam gơ rềng tus kơnòm dềt, Ƀộ trưởng Đào Ngọc Dung đơs nền: “Là cau kong kơnòl tềng đap Cíñ phủ, ờ di mìng ală adat tàm gah do mờ Cíñ phủ ai tơlik, mờ jơh ală adat boh lam, ală sră nggal pơlam lơh jat adat boh lam geh gơ rềng tus broă lơh gròi sền, sền gàr kơnòm dềt. Lơh gơlik bơnàng jă adat boh lam, bơh bơta gàr niam gơnoar kơnòm dềt dê, kung bè ală jơnau hơ pơrgon dunia dê. Broă dơ̆ 2, pơlam ală càr, ƀòn dờng mblàng yal jơnau git wă, bơta chài, gròi sền kơnòm dềt. Broă dơ̆ 3, chồl pràn broă lơh bal bơh mpồl bơtiàn, sền gàr kơnòm dềt bơh ală bơta tă pơgồp mpồl bơtiàn dê”.

Củ ñiệm Ủy ƀan Niam chài Bơto bơsram bơh Quôk hội dê ồng Nguyễn Đắc Vinh sồr tơngai tus, sền gròi tàm broă lơh sir ală jơnau cih bè rơcang sơndră pù pờng kơnòm dềt tàm broă tam gơl Adat rơcang sơndră tam lơh tam pờng tàm hìu bơnhă. Sồr Mpồl duh broă atbồ dơ̆ cah rơña bơh Anih cah rơña jơnhua ngan rlau jơh dà lơgar dê ai tơlik Nghị quyết pơlam bơsong ală broă tàm sang bàu tŭ lơh nền gơnoar ròng kòn pal sền sơ wì tus gơnoar kuơ tơl gah bơh kòn dê, tàm hơ̆ sền sơ wì tus bơta pràn sền gàr kòn bơh jơnau pơhìn gơtìp sơgràm aniai, pù pờng. Mờ kung sơlơ tơnguh broă lơh rơcang sơndră tam lơh tam pờng tàm ală hìu bơsram tơnơ̆ kòp Kovid-19.

Cau mblàng K’Duẩn