VOV4.K’ho - Bè bơta cau lơgar Việt Nam gơtìp pơrlồm lòt lơh broă tus tàm lơgar Campuchia, tàm dơ̆ pơrjum ƀăo pa do, Cau sơ pơ̆ bơr Ƀộ Ngoại giao mò Lê Thị Thu Hằng pà git, ală anih lơh broă ala măt lơgar Việt Nam tàm lơgar Campuchia neh sùm pơgồp bal mờ ală ƀộ, gah lơh broă, anih lơh broă geh gơnoar bal mờ ală càr, ƀòn dờng tàm lơgar, tàm hơ̆ uă ngan là ală càr kis rềp mờ tiah nhàr dà lơgar bal mờ ală anih lơh broă geh gơnoar tàm lơgar Campuchia lơh jăt uă broă lơh nàng dong kờl ală làng bol gơtìp kal ke, rềs àr nàng jun rê hờ lơgar tờm.

Đại sứ quán lơgar Việt Nam tàm lơgar Campuchia neh geh sồ điện dong kờl làng bol 24 jơ tàm 7 ngai, kung bè geh sồ điện thoại bơh Kụk lãnh sự nàng dờp jơnau tơngit bè ală cau gơtìp pơrlồm, kung bè ală jơnau tơngit yal lài ndai. Mờ broă pơgồp bal bơh ală anih lơh broă tàm lơgar bal mờ đah lơgar Campuchia, tus tŭ do, ală anih lơh broă bàr đah neh jun rê hờ lơgar di pơgăp 400 nă cau, bơto sồr mờ dong kờl adăt boh lam di pơgăp 1 rơbô 500 nă làng bol gơtìp kal ke tàm broă lik mŭt tàm lơgar, lòt rê, tơnjŏ tơngai ơm kis ha là gơtìp tìs mờ kơrnoăt tàm lơgar tŭ do. Ƀộ Ngoại giao mờ ală anih lơh broă ala măt tàm lơgar bơdìh geh pơn jăt tai pơgồp bal mờ ală anih lơh broă tàm lơgar bal mờ lơgar Campuchia nàng tơnguh broă lùp sền, di tŭ bơsong ală broă gơtìp nàng gờñ kơrian bơta do.

Cau mblàng Ndong Brawl