VOV4.K’ho - Phó Thủ tướng ồng Lê Minh Khái pa kĭ kơrnoăt bè broă ai càn priă gơwèt mờ kơnòm bơsram, cau bơsram dờng geh rài kis hìu nhă gơtìp kal ke nàng blơi măi vi tính, phan drơng tàm broă bơsram pờ tơlik tàm internet.

Kơrnoăt cih loh, kơnòm bơsram, cau bơsram dờng pal di pal mờ ală bơta càn priă bè tơnơ̆ do: Lài ngan, là cau tàm hìu nhă gơwèt dùl tàm ală cau: hìu rơƀah, hìu ndrờm mờ rơƀah, hìu geh khà rài kis bè ờs jăt khà geh ai bơh adăt boh lam ha là hìu geh rài kis kal ke tài gơrềng bơh kòp Kovid-19 (geh bèp ha là mè gơtìp chơ̆t tài bơh kòp Kovid-19). Dơ̆ bàr, ờ geh măi vi tính, phan tơl bơta di pal mờ broă kờñ bơsram sră mờ ờ hềt geh dờp broă dong kờl blơi măi vi tính, phan bơsram pờ tơlik tàm internet mờ ală broă lơh. Khà priă ai càn uă ngan là 10 tơlăk đong tàm 1 nă kơnòm bơsram, cau bơsram dờng. Tơngai ai càn uă ngan là 36 nhai. Priă cồng ai càn là 1,2% tàm 1 nam. Priă cồng dồs uă ir tơngai ndrờm mờ priă cồng ai càn hìu rơƀah tàm tŭ ai càn priă. Kơrnoăt do geh ngui lơh jăt bơh ngai 04 nhai 4 nam 2022.

Cau mblàng Ndong Brawl