Tàm hìu kấp 4, ƀòn Ea Rông, xã Krông Na, kơnhoàl Buôn Đôn, càr Dăk Lăk, oh H’ Hải Niê Kdăm, bơsram ơdŭ 7A, hìu bơsram kấp 2 Võ Thị Sáu gam bơsram wơl jơnau neh bơsram lài, mờ nùs nhơm kơ̆p kờñ tơnơ̆ do gơs dùl nă cau pơgru. Bèp oh gơtìp chơ̆t bơh tŭ oh rơ̆p 2 sơnam, hìu nhă gơwèt tàm mpồl gơtìp kal ke, mè sùm gơtìp kòp tê jê să. Gŏ rài kis oh gơtìp kal ke, nam 2019, Pôs ling sền gàr tiah nhàr dà lơgar Srepok neh dờp dong kờl oh H’ Hải bơh broă lơh “Dong kờl oh lòt bơsram”. Bal mờ broă dong kờl pah nhai 500 rơbô đong, kwang bàng, cau ling tàm pôs ling sền gàr tiah nhàr dà lơgar Srepok kung sùm tus còp să, lam sồr mờ bơto oh bơsram sră.

Wă bơta kal ke bơh hìu nhă mờ git geh nùs nhơm kờñ gơboh bơh ală cau ling sền gàr tiah nhàr dà lơgar dê, oh H’ Hải sùm lơh ngan mờ geh cồng nha niam tàm broă bơsram sră: “Ală wa neh dong kờl oh uă ngan, oh ưn ngài ală wa tài ală wa neh dong kờl oh lòt bơsram. Oh kung lơh ngan tàm broă bơsram sră, ală wa neh lam sồr lơh ngan bơsram sră mờ ală wa kung dong kờl bơto oh bơsram ală môn”.

Kung gơtìp chơ̆t bèp mờ hìu nhă gơtìp kal ke ngan sơl, oh Hà Duy Khánh, kis tàm ƀòn Đừng Nhạp, xã tiah nhàr dà lơgar Ia Lốp, kơnhoàl Ea Súp neh geh Pôs ling sền gàr tiah nhàr dà lơgar Ea H’ Leo dong kờl lòt bơsram. Lŏ Lò Thị Loan, mè oh Khánh pà git, broă sền gròi, dong kờl bơh ală cau ling sền gàr tiah nhàr dà lơgar neh cèng geh nùs nhơm chờ hờp, pơn dờm pơn diang uă ngan tus mờ cau tàm hìu nhă: “Cau ling sền gàr tiah nhàr dà lơgar dong kờl oh là 500 rơbô đong tàm 1 nhai, geh tai ală phan pà, sră măi, sră cih, phan ngui, hơ̆ sồng kung tus hờ hìu nàng còp să, pơn dờm pơn điang, sền gròi, bơto sồr oh bơsram sră. Tàm tơngai pa do den oh neh git wă rơlao tàm broă bơsram sră”.

Trung úy Hà Văn Tân, kwang bàng Mpồl lam sồr làng bol Pôs ling sền gàr tiah nhàr dà lơgar Ea H’ Leo là dùl tàm ală kwang bàng lơh jăt kơnòl “Dong kờl oh lòt bơsram” mờ “Kòn ròng pôs ling sền gàr tiah nhàr dà lơgar”. Bi pà git, ală kơnòm geh dong kờl ndrờm là kơnòm dềt kòn đời, gơtìp kal ke bè phan bơna, mờ ờ tơl nùs nhơm niam. Den tàng, ală bi sùm ai gùng dà broă lơh ờ mìng dong kờl bè phan bơna mờ lơh bè lơi pal lơh geh uă nùs nhơm kờñ gơboh, dong kờl ală kơnòm dềt geh bơta pràn nàng sơrlèt mờ kal ke: “Oh mi kwang bàng, cau ling bơh pôs ling sùm tus còp să, bơto pơlam ală kơnòm bơsram sră. Bơh tơngai lơh jăt broă lơh den ală kơnòm dềt ndrờm neh gơguh tàm broă bơsram sră, ală kơnòm dềt geh broă lơh ngan mờ sơrlèt kal ke tàm broă bơsram sră”.

Lơh jăt broă lơh “Dong kờl oh lòt bơsram” mờ broă lơh “Kòn ròng pôs ling sền gàr tiah nhàr dà lơgar”, bơh nam 2014 tus tŭ do, cau ling sền gàr tiah nhàr dà lơgar càr Dăk Lăk neh dờp dong kờl mờr 250 nă kơnòm dềt. Mờ khà priă dong kờl pah nhai là 500 rơbô đong, ală pôs ling sền gàr tiah nhàr dà lơgar gam geh uă broă lơh jào pà priă bơsram, ală bơnah phan pà geh bơta kwơ dong kờl ală oh iang nùs bơsram sră. Thiếu tá Vũ Văn Dương, Cíñ trị viên phó Pôs ling sền gàr tiah nhàr dà lơgar Ea H’ Leo pà git, đơs bè broă lơh jăt broă lơh: “Lơh jăt jơnau đơng lam bơh Đảng ủy, Mpồl đơng lam ling sền gàr tiah nhàr dà lơgar càr, pôs ling neh pơgồp bal mờ kấp ủy, gơnoar atbồ xã bal mờ ală hìu bơsram kung bè hìu nhă ală kơnòm dềt tàm xã Ia Lốp nàng bơyai lơh tus sền, sền wơl, rơwah ală kơnòm bơsram geh rài kis gơtìp kal ke nàng dong kờl. Tus tŭ do, pôs ling neh dong kờl ai 50 nă kơnòm dềt. Bè gơnoar broă ƀòn lơgar den dùl nùs bal, kờñ bal uă, gam ală hìu bơsram bal mờ cau tàm hìu nhă ală kơnòm dềt den chờ hờp mờ gơboh gơbài ngan”.

Mờ broă lơh bal bơh ală cau ling sền gàr tiah nhàr dà lơgar dê, uă kơnòm dềt tàm tiah nhàr dà lơgar càr Dăk Lăk neh mờ gam dong kờl lòt bơsram, sơrlèt mờ kal ke nàng tơnơ̆ do gơs cau geh kwơ, dong kờl ƀòn lơgar, dà lơgar.