VOV4.K’ho - Ală nam do, kơnờm mờ priă càn bơh broă ai càn sa priă cồng ờ uă, rơlao 225 rơbô hìu rơƀah, hìu ndrờm mờ rơƀah bal mờ ală cau geh sră dong kờl bơh dà lơgar tàm càr Gia Lai neh geh phan nàng lơh broă, tơnguh bơtàu lơh sa, sơrlèt mờ bơta rơƀah mờ klàs mờ rơƀah kơl jăp. Priă ai càn sa priă cồng ờ uă neh gơs bơnàng jă dong kờl cau rơƀah kơ̆ kơl jăp tàm rài kis.

            Bơh broă ai càn priă sa priă cồng ờ uă, geh uă hìu rơƀah tàm càr Gia Lai neh klàs mờ rơƀah

Hìu bi Rơ Châm Tích, là dùl tàm ală hìu kis tàm ƀòn Lung Prông, xã Ia Kriêng, kơnhoàl Đức Cơ neh mùl màl “Tam gơl” tơnơ̆ mờ tŭ geh dong kờl mờ priă càn sa priă cồng ờ uă. Bơh tàm bơta kal ke, hìu gơtìp sèt, hìu nhă bi neh klàs mờ rơƀah, lơh wơl hìu niam. Bi Rơ Châm Tích yal bè cồng nha bơh priă càn sa priă cồng ờ uă mờ bi neh càn geh: “Bơh tŭ geh dờp priă càn bơh ngân hàng cíñ sác, hìu nhă añ neh geh dong kờl uă broă, tơnguh bơtàu broă sền gàr suơn tờm điều, kơphe. Tŭ ờ hềt geh càn priă den gam uă ngan kal ke, tàm nam 2017 añ tam kơphe, tơnơ̆ mờ hơ̆ añ tam tờm điều tai, den tàng broă lơh sa geh kơ̆ kơl jăp”.

Lŏ Kpă H’Nen kis tàm mpồl 9, thị trấn Phú Thiện geh bao mờ geh mè bèp pà 5 sào ù sre nàng lơh sa. Tài bă ù sre ờ dờng, bŭ lah bè hơ̆, ùr bơklao lŏ neh lơh ngan tơriang tơriồng tàm broă lơh sa, mơya kung gam ờ tơl sa sơl. Kơnờm mờ broă dong kờl bơh oh mi, ƀòn lơgar, gơnoar atbồ ƀòn lơgar, priă càn 30 tơlăk đong bơh Anih lơh broă Ngân hàng Cíñ sác Xã hội kơnhoàl, lŏ neh blơi tai ù, tam bùm blàng sơntìl pa. Lŏ Kpă H’Nen pà git, tus tŭ do hìu nhă neh tơm mờr jơh dồs, rài kis kung neh ring niam rơlao. “Lài do hìu nhă Nen kal ke ngan, tŭ añ geh càn priă bơh dà lơgar, den rài kis añ dê tŭ do neh tơl sa đao rơlao mờ lài uă ngan”.

Jăt Ngân hàng Cíñ sác Xã hội càr Gia Lai yal, ngân hàng do neh lơh jăt geh 17 broă ai càn poriă dờng mờ khà ai càn geh rơlao 16 rơbô 800 tơmàn đong, priă gam dồs cau càn kờp tus nhai 9 nam do geh mờr 5 rơbô 800 tơmàn đong, mờ di pơgăp 400 rơbô hìu càn priă nàng bơcri tàm broă tơnguh bơtàu lơh sa, pơgồp bal tàm broă lơh jăt jơnau kờñ dà lơgar dê bè tơmù rơƀah, bơ̆t bơtàu ƀòn lơgar pa tàm càr. Ồng Lê Văn Trí, Kwang atbồ Ngân hàng Cíñ sác Xã hội càr Gia Lai pà git, tàm tơngai tus, Ngân hàng geh ai 100% khà cau rơƀah mờ ală cau geh sră dong kờl geh càn priă sa priă cồng ờ uă bơh dà lơgar, pơgồp bal mờ ală gùng dà broă lơh bơh càr dê bè tam gơl broă lơh sa mờ bơ̆t bơtàu ƀòn lơgar pa. “Tàm 20 nam lơh jăt Nghị định sồ 78 neh ai gŏ geh broă bơyai lơh mờ gùng dà broă atbồ priă geh cồng nha. Ngân hàng cíñ sác xã hội càr Gia Lai neh pơgồp bal mờ ală sở, gah lơh broă, ală mpồl lơh broă cíñ trị mpồl bơtiàn nàng ai jơh priă càn tus di cau geh dờp, tơrgùm tàm ală broă atbồ priă càn, lam sồr hìu geh càn priă nàng tơnguh bơtàu lơh sa, bơto bơtê hìu càn priă ngui di priă mờ geh cồng nha nàng pơgồp bal tàm broă dong kờl hìu rơƀah bal mờ ală cau geh sră dong kờl bơh dà lơgar ndai tơnguh bơtàu lơh sa, kơ̆ kơl jăp rài kis mờ sơrlèt klàs mờ rơƀah kơl jăp”.

Tŭ do, càr Gia Lai geh 91 xã geh khà ƀòn lơgar pa, mơya rơlao 46% khà kờp làng bol là kòn cau, rài kis, lơh sa gam uă kal ke. Mờ bơta mùl màl do, priă càn sa priă cồng ờ uă gam là bơnàng jă geh cồng nha, dong kờl ală ƀòn geh tai bơta pràn tàm broă lơh sa. Ală mpồl lơh broă, mpồl ai càn priă, ờ mìng geh ai priă tus mờ di cau, mờ gam dong kờl làng bol git tàm broă lơh sa, tam pà bal, dong kờl bal brồ guh lơh sa.

Cau cih Hoàng Qui-Cau mblàng Ndong Brawl